---
title: "'തോറ്റ ടീമിലായിരിക്കുമ്പോൾ ഈ ഇരട്ട സെഞ്ചുറിക്ക് എന്ത് വില?'; ചരിത്രനേട്ടത്തിനിടയിലും ഹാരി ബ്രൂക്കിന് നിരാശ"
english_title: "What Is a Double Century Worth in a Losing Cause? Harry Brook Disappointed"
publisher: "truevisionnews.com"
canonical_url: "https://truevisionnews.com/news/388317/harry-brook-double-century-loss-sri-lanka"
published_at: "2026-10-23T11:36:00+05:30"
category: "Sports"
language: "ml"
image: "https://cf.zdn.im/img/truevisionnews.com/0/image-uploads/6adafa9c97331_harry-brook-double-century-loss-sri-lanka.jpg"
keywords: ["HarryBrook", "EnglandCricket", "SriLankaCricket", "ODICricket", "TriSeries"]
---

# 'തോറ്റ ടീമിലായിരിക്കുമ്പോൾ ഈ ഇരട്ട സെഞ്ചുറിക്ക് എന്ത് വില?'; ചരിത്രനേട്ടത്തിനിടയിലും ഹാരി ബ്രൂക്കിന് നിരാശ

> **Lead Summary:** റാവൽപിണ്ടി: ത്രിരാഷ്ട്ര ക്രിക്കറ്റിൽ 430 റൺസ് എന്ന കൂറ്റൻ വിജയലക്ഷ്യം പ്രതിരോധിക്കുന്നതിൽ തന്റെ ടീം ശ്രീലങ്കയോട് പരാജയപ്പെട്ടതിന് പിന്നാലെ പ്രതികരണവുമായി ഇംഗ്ലണ്ട് ക്യാപ്റ്റൻ ഹാരി ബ്രൂക്ക്.

## Article Content

റാവൽപിണ്ടി: ത്രിരാഷ്ട്ര ക്രിക്കറ്റിൽ 430 റൺസ് എന്ന കൂറ്റൻ വിജയലക്ഷ്യം പ്രതിരോധിക്കുന്നതിൽ തന്റെ ടീം ശ്രീലങ്കയോട് പരാജയപ്പെട്ടതിന് പിന്നാലെ പ്രതികരണവുമായി ഇംഗ്ലണ്ട് ക്യാപ്റ്റൻ ഹാരി ബ്രൂക്ക്.

ഏകദിന ക്രിക്കറ്റിലെ ഏറ്റവും വേഗമേറിയ തന്റെ ഇരട്ട സെഞ്ചുറിക്ക് യാതൊരു വിലയുമില്ല എന്നാണ് ബ്രൂക്ക് പ്രതികരിച്ചത്. ഏകദിനത്തിൽ ഇരട്ട സെഞ്ചുറി നേടുന്ന ആദ്യ ഇംഗ്ലണ്ട് താരമായും ബ്രൂക്ക് റെക്കോർഡിട്ടിരുന്നു. 114 പന്തിലാണ് ഇംഗ്ലീഷ് ക്യാപ്റ്റൻ 200 റൺസിലെത്തിയത്.

'അവിശ്വസനീയമായ ഒരു മത്സരം, രണ്ട് ടീമുകളും മികച്ച രീതിയിലാണ് കളിച്ചത്. ശ്രീലങ്ക ഞങ്ങളെ മറികടന്നു. 430 റൺസ് പിന്തുടർന്ന് ജയിക്കാൻ അവർ മികച്ച ക്രിക്കറ്റാണ് കാഴ്ചവെച്ചത്. അതൊരു നല്ല ഇന്നിങ്‌സ് ആയിരുന്നു.

എന്നാൽ തോറ്റ പക്ഷത്ത് നിൽക്കുമ്പോൾ എന്റെ കണ്ണിൽ ഇതിന് യാതൊരു വിലയുമില്ല. ഞങ്ങൾ കുറച്ചുകൂടി കാര്യങ്ങൾ വിലയിരുത്തേണ്ടതുണ്ട്. ഫൈനലിൽ ഒരു സ്ഥാനം ഉറപ്പാക്കാൻ വരും മത്സരങ്ങളിൽ ഞങ്ങൾക്ക് അവസരമുണ്ട്' - ബ്രൂക്ക് വ്യക്തമാക്കി.

ടോസ് നേടിയ ശ്രീലങ്ക ഇംഗ്ലണ്ടിനെ ബാറ്റിങ്ങിന് അയക്കുകയായിരുന്നു. ടോം ബാന്റണും (51 പന്തിൽ 50, 9 ഫോർ) ബെൻ ഡക്കറ്റും (39 പന്തിൽ 29, 2 ഫോർ) ചേർന്ന് 74 റൺസിന്റെ ഓപ്പണിങ് കൂട്ടുകെട്ടോടെയാണ് ഇംഗ്ലണ്ട് തുടങ്ങിയത്. ഇരുവരും പുറത്തായതോടെ ഇംഗ്ലണ്ട് 85/2 എന്ന നിലയിലായി. അവിടെ നിന്ന് യോർക്ക്‌ഷെയർ താരങ്ങളായ ബ്രൂക്കും ജോ റൂട്ടും (66 പന്തിൽ 69, 8 ഫോർ) ചേർന്ന് 159 റൺസിന്റെ കൂട്ടുകെട്ടുണ്ടാക്കി.

റൂട്ടും തന്റെ കരിയറിൽ ചരിത്രം കുറിച്ചു. ഏകദിനത്തിൽ 8,000 റൺസ് തികയ്ക്കുന്ന ആദ്യ ഇംഗ്ലീഷ് താരമായി അദ്ദേഹം മാറി. നിലവിൽ 197 മത്സരങ്ങളിൽ നിന്നും 186 ഇന്നിങ്‌സുകളിൽ നിന്നും 50.66 ശരാശരിയിൽ 20 സെഞ്ചുറികളും 49 അർദ്ധസെഞ്ചുറികളും സഹിതം 8,005 റൺസ് അദ്ദേഹത്തിന്റെ പേരിലുണ്ട്. ഉയർന്ന സ്‌കോർ 166* ആണ്.

ഇന്നിങ്‌സിന്റെ അവസാന ഘട്ടത്തിൽ, വില്ല് ജാക്‌സിന്റെ അർദ്ധസെഞ്ചുറിയുടെയും (30 പന്തിൽ 66*, 8 ഫോർ, 3 സിക്‌സ്) നായകൻ ഹാരി ബ്രൂക്കിന്റെ ചരിത്രപരമായ ഇരട്ട സെഞ്ചുറിയുടെയും (116 പന്തിൽ 202, 21 ഫോർ, 10 സിക്‌സ്) കരുത്തിൽ ഇംഗ്ലണ്ട് നാല് വിക്കറ്റിന് 429 എന്ന സ്‌കോറിലെത്തി.

ശ്രീലങ്കൻ ബൗളർമാരിൽ ദുനിത് വെല്ലലഗെ (2/56) മികച്ച പ്രകടനം പുറത്തെടുത്തപ്പോൾ, ഇഷാൻ മലിംഗയും (0/91) ദിൽഷൻ മധുശങ്കയും (0/89) തങ്ങളുടെ 10 ഓവറുകളിൽ വലിയ രീതിയിൽ തല്ലുവാങ്ങി. ദസുൻ ഷാനക ആറ് ഓവറിൽ 74 റൺസാണ് വഴങ്ങിയത്.

വലിയ ലക്ഷ്യത്തിലേക്ക് ബാറ്റേന്തിയ ശ്രീലങ്കയുടെ തുടക്കം മോശമായിരുന്നു. കമിന്ദു മെൻഡിസ് (18), നായകൻ കുശൽ മെൻഡിസ് (0) എന്നിവരുടെ നിർണായക വിക്കറ്റുകൾ നഷ്ടമായ അവർ 24/2 എന്ന നിലയിലേക്ക് തകർന്നു.

തുടർന്ന് പവൻ രത്നനായക്കയ്ക്കൊപ്പം ഒത്തുചേർന്ന അവിഷ്‌ക ഫെർണാണ്ടോ (83 പന്തിൽ 97, 12 ഫോർ, 2 സിക്‌സ്) കരുതലോടെയുള്ള പ്രത്യാക്രമണം ആരംഭിക്കുകയും മൂന്നാം വിക്കറ്റിൽ 166 റൺസിന്റെ കൂട്ടുകെട്ട് പടുത്തുയർത്തുകയും ചെയ്തു.

തന്റെ കരിയറിലെ ഏറ്റവും ഉയർന്ന സ്‌കോറായ 130 റൺസ് (106 പന്തിൽ, 15 ഫോർ, 3 സിക്‌സ്) നേടിയ പവനും ദസുൻ ഷാനകയും (50 പന്തിൽ 97, 6 ഫോർ, 8 സിക്‌സ്) ചേർന്ന് 133 റൺസിന്റെ കൂട്ടുകെട്ടുണ്ടാക്കിയതോടെ ലങ്കയുടെ വിജയപ്രതീക്ഷകൾ സജീവമായി നിലനിന്നു.

44-ാം ഓവറിൽ ഷാനക പുറത്താകുമ്പോൾ ലങ്കയ്ക്ക് ആറ് ഓവറിൽ 67 റൺസ് കൂടിയാണ് ജയിക്കാൻ വേണ്ടിയിരുന്നത്. ജോഷ് ടോങ് അവസാന ഓവറിൽ തുടർച്ചയായ വിക്കറ്റുകൾ വീഴ്ത്തി മത്സരം ഇംഗ്ലണ്ടിന്റെ പക്ഷത്തേക്ക് തിരിക്കാൻ ശ്രമിച്ചെങ്കിലും, വാലറ്റത്തിന്റെ പിന്തുണയോടെ ജനിത് ലിയാനഗെ (27 പന്തിൽ 61*, 7 ഫോർ, 3 സിക്‌സ്) ശ്രീലങ്കയ്ക്ക് അവിശ്വസനീയമായ വിജയം സമ്മാനിച്ചു.

England captain Harry Brook said his record-breaking ODI double century meant little after Sri Lanka chased down 430 to beat England in a thrilling tri-nation match in Rawalpindi. Brook became the first England batter to score an ODI double hundred, while Sri Lanka produced a stunning run chase led by Avishka Fernando, Dasun Shanaka and Janith Liyanage.

### Related Links & Sources
- [Original Story Source](https://truevisionnews.com/news/388317/harry-brook-double-century-loss-sri-lanka)