---
title: "മഴയിൽ മുങ്ങി തലസ്ഥാനം...! നദികൾ കരകവിഞ്ഞു, വീടുകളിൽ വെള്ളം കയറി, പേപ്പാറയിൽ ആദിവാസി ഊര് ഒറ്റപ്പെട്ടു; ജില്ലയിൽ ഓറഞ്ച് അലർട്ട്"
english_title: "Thiruvananthapuram Flooded by Heavy Rain; Rivers Overflow, Orange Alert Issued"
publisher: "truevisionnews.com"
canonical_url: "https://truevisionnews.com/news/387962/thiruvananthapuram-rain-flood-orange-alert-new"
published_at: "2026-10-20T22:25:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6ad79dcc80109_thiruvananthapuram-rain-flood-orange-alert.jpg"
keywords: ["KeralaRain", "OrangeAlert", "Thiruvananthapuram", "Flooding", "WeatherUpdate"]
---

# മഴയിൽ മുങ്ങി തലസ്ഥാനം...! നദികൾ കരകവിഞ്ഞു, വീടുകളിൽ വെള്ളം കയറി, പേപ്പാറയിൽ ആദിവാസി ഊര് ഒറ്റപ്പെട്ടു; ജില്ലയിൽ ഓറഞ്ച് അലർട്ട്

> **Lead Summary:** തിരുവനന്തപുരം: തലസ്ഥാനത്ത് അതിശക്ത മഴ തുടരുന്ന സാഹചര്യത്തിൽ ജില്ലയിൽ രാത്രി ഓറഞ്ച് അലർട്ട് പ്രഖ്യാപിച്ചു. തിരുവനന്തപുരത്ത് മലയോര, തീരദേശ മേഖലകളിൽ കനത്ത മഴയെത്തുടർന്ന് പലയിടത്തും വീടുകളിൽ വെള്ളം കയറി.

## Article Content

തിരുവനന്തപുരം: തലസ്ഥാനത്ത് അതിശക്ത മഴ തുടരുന്ന സാഹചര്യത്തിൽ ജില്ലയിൽ രാത്രി ഓറഞ്ച് അലർട്ട് പ്രഖ്യാപിച്ചു. തിരുവനന്തപുരത്ത് മലയോര, തീരദേശ മേഖലകളിൽ കനത്ത മഴയെത്തുടർന്ന് പലയിടത്തും വീടുകളിൽ വെള്ളം കയറി.

വിതുര, പൊൻമുടി മേഖലകളിൽ ശക്തമായ മഴയാണ് തുടരുന്നത്. വാമനപുരം നദിയുടെ പോഷക നദിയായ മക്കിയാർ കരകവിഞ്ഞൊഴുകുന്നതിനൊപ്പം നദിയിലെ ജലനിരപ്പും ഉയർന്നിട്ടുണ്ട്.

മക്കി, മരുതാമല, പേപ്പാറ, ആനപ്പാറ തുടങ്ങിയ മേഖലകളിൽ വീടുകളിലേക്ക് വെള്ളം കയറാൻ സാധ്യതയുള്ളതിനാൽ അധികൃതർ ജാഗ്രതാ നിർദ്ദേശം നൽകിയിട്ടുണ്ട്. വിതുര പഞ്ചായത്തിലെ മണിതൂക്കി, മരുതാമല വാർഡുകളിൽ വെള്ളം കയറിയ വീടുകളിൽ കഴിഞ്ഞിരുന്നവരെ സുരക്ഷിതമായ മറ്റ് വീടുകളിലേക്ക് മാറ്റിപ്പാർപ്പിച്ചു.

പേപ്പാറ ഡാമിന്റെ റിസർവോയറിൽ നിന്നുള്ള വെള്ളം റോഡിലേക്ക് കയറിയതിനെ തുടർന്ന് പേപ്പാറ പൊടിയക്കാല ആദിവാസി ഊരിയിലേക്കുള്ള വഴികൾ പൂർണ്ണമായും മുങ്ങി. ഇതോടെ പൊടിയക്കാല ഊര് ഒറ്റപ്പെട്ട അവസ്ഥയിലാണ്.

വാമനപുരം നദിയിലെ ജലനിരപ്പ് ഉയർന്നതിനെ തുടർന്ന് രണ്ട് ചെറുപാലങ്ങൾ വെള്ളത്തിനടിയിലായി ചെറിയ തോടുകളും കരകവിഞ്ഞൊഴുകുന്നുണ്ട്. തിരുവനന്തപുരത്ത് ഓറഞ്ച് അലർട്ട് തുടരുന്നതിന് പുറമെ കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ഉൾപ്പെടെയുള്ള ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.

നാളെ സംസ്ഥാനത്തെ പത്ത് ജില്ലകളിൽ യെല്ലോ അലർട്ട് ആയിരിക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മലയോര മേഖലകളിലേക്കുള്ള യാത്രകൾ ഒഴിവാക്കണമെന്നും, നദിക്കരകളിലും താഴ്ന്ന പ്രദേശങ്ങളിലും താമസിക്കുന്നവർ അതീവ ജാഗ്രത പാലിക്കണമെന്നും ജില്ലാ ഭരണകൂടം മുന്നറിയിപ്പ് നൽകിയിട്ടുണ്ട്.

Heavy rain continued to lash Thiruvananthapuram, prompting an orange alert in the district at night. Overflowing rivers and rising water levels led to flooding in several homes, while an indigenous settlement in Peppara was left isolated after roads were submerged. Authorities have urged residents in hilly, riverside and low-lying areas to remain alert and avoid unnecessary travel.

### Related Links & Sources
- [Original Story Source](https://truevisionnews.com/news/387962/thiruvananthapuram-rain-flood-orange-alert-new)