---
title: "മൂന്ന് പേരുടെ ജീവനെടുത്ത മിനി കൂപ്പർ അപകടം; സുഹൈലിന് ഇന്ന് നിർണായകം, ജാമ്യം തടയാൻ ശാസ്ത്രീയ തെളിവുകളുമായി പൊലീസ്"
english_title: "Mini Cooper Crash Case: Suhail’s Bail Plea Today as Scientific Evidence Takes Center Stage"
publisher: "truevisionnews.com"
canonical_url: "https://truevisionnews.com/news/387285/mini-cooper-crash-bail-plea-today"
published_at: "2026-10-16T08:02:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6ad18d8950abb_mini-cooper-crash-bail-plea-today.jpg"
keywords: ["MiniCooperCrash", "BailPlea", "PoliceInvestigation", "ScientificEvidence", "KeralaNews", "NedumbasseryCrash"]
---

# മൂന്ന് പേരുടെ ജീവനെടുത്ത മിനി കൂപ്പർ അപകടം; സുഹൈലിന് ഇന്ന് നിർണായകം, ജാമ്യം തടയാൻ ശാസ്ത്രീയ തെളിവുകളുമായി പൊലീസ്

> **Lead Summary:** കൊച്ചി: മൂന്ന് കൗമാരക്കാരുടെ മരണത്തിനിടയാക്കിയ നെടുമ്പാശ്ശേരി മിനി കൂപ്പർ വാഹനാപകടക്കേസിലെ ഒന്നാം പ്രതി സുഹൈൽ സജീവിന്റെ ജാമ്യാപേക്ഷ അങ്കമാലി മജിസ്ട്രേറ്റ് കോടതി ഇന്ന് പരിഗണിക്കും. പ്രതിക്ക് ജാമ്യം അനുവദിക്കുന്നതിനെ എതിർക്കാൻ ശാസ്ത്രീയ തെളിവുകൾ കോടതിയിൽ ഹാജരാക്കാനാണ് അന്വേഷണസംഘത്തിന്റെ നീക്കം.

## Article Content

കൊച്ചി: മൂന്ന് കൗമാരക്കാരുടെ മരണത്തിനിടയാക്കിയ നെടുമ്പാശ്ശേരി മിനി കൂപ്പർ വാഹനാപകടക്കേസിലെ ഒന്നാം പ്രതി സുഹൈൽ സജീവിന്റെ ജാമ്യാപേക്ഷ അങ്കമാലി മജിസ്ട്രേറ്റ് കോടതി ഇന്ന് പരിഗണിക്കും. പ്രതിക്ക് ജാമ്യം അനുവദിക്കുന്നതിനെ എതിർക്കാൻ ശാസ്ത്രീയ തെളിവുകൾ കോടതിയിൽ ഹാജരാക്കാനാണ് അന്വേഷണസംഘത്തിന്റെ നീക്കം.

അപകടസമയത്ത് സുഹൈൽ മദ്യപിച്ചിരുന്നതായി റിമാൻഡ് റിപ്പോർട്ടിൽ പൊലീസ് വ്യക്തമാക്കിയിരുന്നു. ഇത് സാധൂകരിക്കുന്ന റീജിയണൽ അനലിറ്റിക്കൽ ലബോറട്ടറിയുടെ പരിശോധനാഫലം കോടതിയിൽ സമർപ്പിക്കാനാണ് അന്വേഷണസംഘം ഒരുങ്ങുന്നത്.

കേസിന്റെ ഗൗരവം കണക്കിലെടുത്ത് പ്രതിക്ക് ജാമ്യം അനുവദിക്കരുതെന്ന് പ്രോസിക്യൂഷൻ ആവശ്യപ്പെടും. അതേസമയം, പ്രതിയുടെ പ്രായം പരിഗണിക്കണമെന്നും തുടർന്നുള്ള ജുഡീഷ്യൽ കസ്റ്റഡി ആവശ്യമില്ലെന്നും വാദിക്കാനാണ് പ്രതിഭാഗത്തിന്റെ നീക്കം.

കഴിഞ്ഞ ഞായറാഴ്ച പുലർച്ചെ നെടുമ്പാശ്ശേരി എയർപോർട്ട് വിഐപി റോഡിലായിരുന്നു മൂന്ന് പേരുടെ മരണത്തിനിടയാക്കിയ അപകടം. അമിതവേഗത്തിലെത്തിയ മിനി കൂപ്പർ കാർ സ്കൂട്ടറിൽ ഇടിച്ചതിനെ തുടർന്ന് ഇയാസ്, ദേവിക, ഗോപിക എന്നിവരാണ് മരിച്ചത്. അപകടസമയത്ത് കാർ ഓടിച്ചിരുന്ന സുഹൈൽ മദ്യലഹരിയിലായിരുന്നുവെന്നാണ് പൊലീസിന്റെ ആരോപണം.

കേസിൽ പൊലീസ് കസ്റ്റഡിയിൽ ലഭിച്ച സുഹൈൽ സജീവുമായി വ്യാഴാഴ്ച വിവിധ സ്ഥലങ്ങളിൽ അന്വേഷണസംഘം തെളിവെടുപ്പ് നടത്തി. അന്വേഷണ ഉദ്യോഗസ്ഥനായ ആലുവ ഡിവൈഎസ്പി ബൈജു പൗലോസിന്റെ നേതൃത്വത്തിൽ രാവിലെ 9.25ഓടെയാണ് പ്രതിയെ സുരക്ഷാസന്നാഹങ്ങളോടെ അപകടസ്ഥലത്തെത്തിച്ചത്.

അപകടം നടന്ന സ്ഥലവും വാഹനങ്ങൾ എത്തിയ ദിശയും സ്കൂട്ടർ തെറിച്ചുവീണ ഭാഗവും സംബന്ധിച്ച് പ്രതിയിൽനിന്ന് അന്വേഷണസംഘം വിവരങ്ങൾ ശേഖരിച്ചു. അപകടസമയത്തെ കാറിന്റെ വേഗത സംബന്ധിച്ചും സുഹൈലിനോട് വിശദീകരണം തേടി.

സമീപവാസികളായ ഈരാളി ജോജിൻ, കണിയത്ത് വർഗീസ് എന്നിവരുടെ ദൃക്‌സാക്ഷിമൊഴികളും പൊലീസ് രേഖപ്പെടുത്തി.

അപകടസ്ഥലത്ത് പ്രതിയെ തെളിവെടുപ്പിന് കൊണ്ടുവരുന്നതറിഞ്ഞ് മാധ്യമപ്രവർത്തകരടക്കം നിരവധി പേർ എത്തിയിരുന്നു. ജനക്കൂട്ടം തടിച്ചുകൂടിയ സാഹചര്യത്തിൽ സുഹൈലിനെ പൊലീസ് വാഹനത്തിൽനിന്ന് പുറത്തിറക്കാതെയാണ് തെളിവെടുപ്പ് പൂർത്തിയാക്കിയത്.

അപകടം നടന്ന ദിവസം വൈദ്യപരിശോധനയ്ക്കായി സുഹൈലിനെ അങ്കമാലി താലൂക്ക് ആശുപത്രിയിലെത്തിച്ചപ്പോൾ ചിലർ മർദിച്ചിരുന്നു. രണ്ടാം പ്രതി നിനവിനും അത്താണിയിൽ കൈയേറ്റമേറ്റിരുന്നു. ഈ സാഹചര്യത്തിലാണ് പ്രതികൾക്ക് പൊലീസ് കനത്ത സുരക്ഷ ഒരുക്കിയത്.

അത്താണിയിൽ ഒരുമണിക്കൂറോളം തെളിവെടുപ്പ് നടത്തിയശേഷം രാവിലെ 10.35ഓടെ പ്രതിയെ നെടുമ്പാശ്ശേരിയിലെ ഹോട്ടൽ മാരിയറ്റിലെത്തിച്ചു. അവിടെയും തെളിവെടുപ്പ് നടത്തിയശേഷം നെടുമ്പാശ്ശേരി പൊലീസ് സ്റ്റേഷനിലേക്ക് മടങ്ങി.

ഉച്ചയ്ക്കുശേഷം കടവന്ത്രയിലെ ദയ ബാറിലും പാലാരിവട്ടത്തെ മൺസൂൺ എംപ്രസിലും സുഹൈലിനെ എത്തിച്ച് അന്വേഷണസംഘം തെളിവുകൾ ശേഖരിച്ചു.

കേസിൽ പ്രേരണക്കുറ്റത്തിന് അറസ്റ്റിലായ മറ്റ് മൂന്ന് പ്രതികളെയും പൊലീസ് വിശദമായി ചോദ്യം ചെയ്തിരുന്നു. എന്നാൽ ഇവരെ അപകടസ്ഥലത്ത് തെളിവെടുപ്പിന് കൊണ്ടുവന്നില്ല.

ചോദ്യം ചെയ്യലും തെളിവെടുപ്പും പൂർത്തിയാക്കിയശേഷം വ്യാഴാഴ്ച വൈകുന്നേരത്തോടെ സുഹൈൽ ഉൾപ്പെടെയുള്ള നാല് പ്രതികളെയും അങ്കമാലി കോടതിയിൽ ഹാജരാക്കി.

തുടർന്ന് കാക്കനാട് സീപോർട്ട്–എയർപോർട്ട് റോഡിന് സമീപം തൃക്കാക്കരയിലെ ബോസ്റ്റൽ സ്കൂളിലേക്ക് ഇവരെ വീണ്ടും മാറ്റി.

അതേസമയം, സുഹൈലിന്റെ ജാമ്യാപേക്ഷയിൽ ഇന്നത്തെ കോടതി നടപടികൾ നിർണായകമാകും. മദ്യപാനം സംബന്ധിച്ച ലബോറട്ടറി പരിശോധനാഫലവും അന്വേഷണസംഘം സമർപ്പിക്കുന്ന മറ്റ് തെളിവുകളും പരിഗണിച്ചായിരിക്കും കോടതി തുടർനടപടികൾ സ്വീകരിക്കുക.

The Angamaly magistrate court will consider the bail plea of the first accused, Suhail Sajeeb, in the Nedumbassery Mini Cooper crash case today. Police plan to submit scientific evidence, including lab results indicating he was allegedly intoxicated at the time of the accident, to oppose bail.

### Related Links & Sources
- [Original Story Source](https://truevisionnews.com/news/387285/mini-cooper-crash-bail-plea-today)