---
title: "പുഴയോരത്ത് സ്കൂട്ടറും ചെരിപ്പും....പയ്യന്നൂരിൽ പ്രതിശ്രുത വരനൊപ്പം കൗൺസിലിങ് കേന്ദ്രത്തിലെത്തിയ ശ്രുതി പെട്ടെന്ന് ഇറങ്ങിപ്പോയി, പിന്നാലെ കാണാതായ 24കാരി പുഴയിൽ മരിച്ച നിലയിൽ"
english_title: "Fiancée Who Went Missing in Payyannur Found Dead in River"
publisher: "truevisionnews.com"
canonical_url: "https://truevisionnews.com/news/386849/payyannur-fiancee-found-dead-river"
published_at: "2026-10-13T12:52:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6acddd22f00b3_payyannur-fiancee-found-dead-river.jpg"
keywords: ["PayyannurNews", "KeralaNews", "MissingPerson", "RiverDeath", "PoliceInvestigation"]
---

# പുഴയോരത്ത് സ്കൂട്ടറും ചെരിപ്പും....പയ്യന്നൂരിൽ പ്രതിശ്രുത വരനൊപ്പം കൗൺസിലിങ് കേന്ദ്രത്തിലെത്തിയ ശ്രുതി പെട്ടെന്ന് ഇറങ്ങിപ്പോയി, പിന്നാലെ കാണാതായ 24കാരി പുഴയിൽ മരിച്ച നിലയിൽ

> **Lead Summary:** പയ്യന്നൂർ: വിവാഹം നിശ്ചയിച്ച യുവതിയെ പയ്യന്നൂരിൽ പുഴയിൽ മരിച്ച നിലയിൽ കണ്ടെത്തി. പയ്യന്നൂർ ടൗണിലെ മാളിൽ ജീവനക്കാരിയായിരുന്ന കോറോം കാനായി മുക്കൂട് സ്വദേശിനി സി. ശ്രുതി ആണ് മരിച്ചത്.

## Article Content

പയ്യന്നൂർ: വിവാഹം നിശ്ചയിച്ച യുവതിയെ പയ്യന്നൂരിൽ പുഴയിൽ മരിച്ച നിലയിൽ കണ്ടെത്തി. പയ്യന്നൂർ ടൗണിലെ മാളിൽ ജീവനക്കാരിയായിരുന്ന കോറോം കാനായി മുക്കൂട് സ്വദേശിനി സി. ശ്രുതി ആണ് മരിച്ചത്.

ഒക്ടോബർ 12ന് വൈകിട്ട് കൗൺസിലിങ് കേന്ദ്രത്തിൽനിന്ന് ഇറങ്ങിപ്പോയ ശ്രുതിയെ കാണാതാവുകയായിരുന്നു. തുടർന്ന് നടത്തിയ തിരച്ചിലിൽ ഇന്ന്  രാവിലെ 11.15ഓടെ പെരുമ്പ ചിറ്റാരിക്കൊവ്വൽ റോട്ടറി ക്ലബ്ബ് റോഡിലെ തണൽ ഇക്കോ പാർക്കിന് സമീപമുള്ള പുഴയിൽനിന്നാണ് മൃതദേഹം കണ്ടെത്തിയത്.

ഒക്ടോബർ 12ന് വൈകിട്ട് നാലുമണിയോടെയാണ് ശ്രുതി കോറോം കൂർക്കരയിലെ കൗൺസിലിങ് കേന്ദ്രത്തിലെത്തിയത്. അമ്മായി സുലേഖ, വിവാഹം നിശ്ചയിച്ച അഖിൽ, അഖിലിന്റെ അമ്മാവൻ സുരേഷ് എന്നിവരും ഒപ്പമുണ്ടായിരുന്നു. കേന്ദ്രത്തിൽ സംസാരിച്ചുകൊണ്ടിരിക്കെ ശ്രുതി പെട്ടെന്ന് പുറത്തേക്ക് ഇറങ്ങി സ്കൂട്ടറിൽ കയറി പോകുകയായിരുന്നുവെന്നാണ് ലഭ്യമായ വിവരം.

രാത്രിയായിട്ടും ശ്രുതി വീട്ടിൽ തിരിച്ചെത്താത്തതിനെത്തുടർന്ന് അമ്മാവൻ എം. ശ്രീധരൻ പയ്യന്നൂർ പൊലീസിൽ പരാതി നൽകി. പരാതിയുടെ അടിസ്ഥാനത്തിൽ പൊലീസ് കേസെടുത്ത് അന്വേഷണം ആരംഭിച്ചു. ഇതിനിടെ ഇന്നലെ രാത്രിയോടെ ചിറ്റാരിക്കൊവ്വൽ റോട്ടറി ക്ലബ്ബ് റോഡിൽ തണൽ ഇക്കോ പാർക്കിന് സമീപം ശ്രുതിയുടെ സ്കൂട്ടർ ഉപേക്ഷിച്ച നിലയിൽ കണ്ടെത്തി. യുവതിയുടെ ചെരിപ്പും ഇവിടെനിന്ന് ലഭിച്ചു.

ഇതോടെ ശ്രുതി പുഴയിൽ വീണതാകാമെന്ന സംശയത്തെത്തുടർന്ന് തിരച്ചിൽ ആരംഭിക്കുകയായിരുന്നു. പയ്യന്നൂർ ഫയർ സ്റ്റേഷൻ ഓഫീസർ സി.പി. രാജേഷിന്റെ നേതൃത്വത്തിൽ സ്കൂബാ ടീമിന്റെ സഹായത്തോടെ ഇന്നലെ രാത്രിയും ഇന്ന് രാവിലെയും തിരച്ചിൽ നടത്തി. തുടർന്ന് രാവിലെ 11.15ഓടെയാണ് പുഴയിൽനിന്ന് മൃതദേഹം കണ്ടെത്തിയത്.

കാനായി മുക്കൂടിലെ പരേതനായ ചന്ദ്രന്റെയും ജാനകിയുടെയും മകളാണ് ശ്രുതി. ശ്രീലക്ഷ്മിയാണ് സഹോദരി.

മൃതശരീരം പരിയാരത്തെ കണ്ണൂർ ഗവ. മെഡിക്കൽ കോളേജ് മോർച്ചറിയിലേക്ക് മാറ്റി. പയ്യന്നൂർ പൊലീസ് ഇൻക്വസ്റ്റ് നടപടികൾ സ്വീകരിക്കും. മരണവുമായി ബന്ധപ്പെട്ട സാഹചര്യങ്ങൾ പൊലീസ് അന്വേഷിച്ചുവരികയാണ്.

Shruti, a 24-year-old mall employee from Payyannur, was found dead in a river near Thanal Eco Park after going missing on Sunday evening. She had arrived at a counselling centre with her fiancé and relatives, but left abruptly and later disappeared; police are investigating the circumstances.

### Related Links & Sources
- [Original Story Source](https://truevisionnews.com/news/386849/payyannur-fiancee-found-dead-river)