---
title: "നെഞ്ച് തുറക്കാതെ അന്നനാളിയിലെ ചോര്‍ച്ച അടച്ചു; കണ്ണൂര്‍ ആസ്റ്റര്‍ മിംസില്‍ വടകര സ്വദേശിക്ക് അപൂര്‍വ ചികിത്സയിലൂടെ പുതുജീവൻ"
english_title: "Esophageal Leak Closed Without Open Surgery; Vadakara Native Recovers at Kannur Aster MIMS"
publisher: "truevisionnews.com"
canonical_url: "https://truevisionnews.com/news/386788/esophageal-leak-endoscopic-vacuum-therapy"
published_at: "2026-10-13T06:38:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6acd850a3a6d1_esophageal-leak-endoscopic-vacuum-therapy.jpg"
keywords: ["Endoscopy", "Gastroenterology", "AsterMIMS", "MedicalInnovation", "KeralaHealth"]
---

# നെഞ്ച് തുറക്കാതെ അന്നനാളിയിലെ ചോര്‍ച്ച അടച്ചു; കണ്ണൂര്‍ ആസ്റ്റര്‍ മിംസില്‍ വടകര സ്വദേശിക്ക് അപൂര്‍വ ചികിത്സയിലൂടെ പുതുജീവൻ

> **Lead Summary:** കണ്ണൂർ: അന്നനാളിയിലെ ശസ്ത്രക്രിയയെ തുടർന്ന് രൂപപ്പെട്ട ഗുരുതരമായ ചോർച്ച മൂലം അതീവ സങ്കീർണാവസ്ഥയിലായ രോഗിക്ക് രക്ഷകരായി കണ്ണൂർ ആസ്റ്റർ മിംസിലെ മെഡിക്കല്‍ സംഘം.

## Article Content

കണ്ണൂർ: അന്നനാളിയിലെ ശസ്ത്രക്രിയയെ തുടർന്ന് രൂപപ്പെട്ട ഗുരുതരമായ ചോർച്ച മൂലം അതീവ സങ്കീർണാവസ്ഥയിലായ രോഗിക്ക് രക്ഷകരായി കണ്ണൂർ ആസ്റ്റർ മിംസിലെ മെഡിക്കല്‍ സംഘം.

വീണ്ടും ശസ്ത്രക്രിയ നടത്താതെ അത്യാധുനിക എൻഡോസ്കോപ്പിക് വാക്വം തെറാപ്പിയിലൂടെയാണ് വടകര ഇരിങ്ങല്‍ സ്വദേശിയായ രോഗിയെ ഡോക്ടർമാർ വിജയകരമായി ജീവിതത്തിലേക്ക് മടക്കിക്കൊണ്ടുവന്നത്. ആശുപത്രിയിലെ ഗ്യാസ്‌ട്രോഎൻ്ററോളജി വിഭാഗം വിദഗ്ധരുടെ നേതൃത്വത്തില്‍ മലബാറില്‍ ആദ്യമായാണ് ഈ സങ്കീർണ എൻഡോസ്കോപ്പിക് ചികിത്സ വിജയകരമായി പൂർത്തിയാക്കുന്നത്.

അന്നനാളിയിലെ അർബുദത്തെ തുടർന്ന് രോഗി നേരത്തെ മറ്റൊരു സ്വകാര്യ ആശുപത്രിയില്‍ സങ്കീർണമായ ശസ്ത്രക്രിയയ്ക്ക് വിധേയനായിരുന്നു. എന്നാല്‍ ശസ്ത്രക്രിയയ്ക്കു പിന്നാലെ അന്നനാളിയിലെ തുന്നിച്ചേർത്ത ഭാഗത്ത് ഗുരുതരമായ ചോർച്ച രൂപപ്പെട്ടു.

ഇതിനെ തുടർന്ന് അവിടെ വെച്ചുതന്നെ വീണ്ടും ശസ്ത്രക്രിയ നടത്തിയെങ്കിലും ചോർച്ച ആവർത്തിക്കുകയായിരുന്നു. രോഗിയുടെ ആരോഗ്യനില ഗുരുതരമായതോടെയാണ് കൂടുതല്‍ വിദഗ്ധ ചികിത്സയ്ക്കായി കണ്ണൂർ ആസ്റ്റർ മിംസിലേക്ക് എത്തിച്ചത്.

**എന്താണ് വാക്വം തെറാപ്പി?**

വീണ്ടുമൊരു വലിയ ശസ്ത്രക്രിയ ഒഴിവാക്കി ചോർച്ച സുരക്ഷിതമായി പരിഹരിക്കുന്നതിനായാണ് എൻഡോസ്കോപ്പിക് വാക്വം തെറാപ്പി നടത്താൻ ഡോക്ടർമാർ തീരുമാനിച്ചത്. എൻഡോസ്കോപ്പിൻ്റെ സഹായത്തോടെ പ്രത്യേകം തയാറാക്കിയ വാക്വം സ്പോഞ്ച് ചോർച്ചയുള്ള ഭാഗത്ത് കൃത്യമായി സ്ഥാപിക്കുകയും, നിയന്ത്രിതമായ വാക്വം സംവിധാനവുമായി അത് ബന്ധിപ്പിക്കുകയും ചെയ്തു.

ഇതിലൂടെ ചോർച്ചയുള്ള ഭാഗത്തെ സ്രവങ്ങള്‍ തുടർച്ചയായി നീക്കം ചെയ്യുന്നതിനൊപ്പം മുറിവ് വേഗത്തില്‍ ഉണങ്ങാനും ആരോഗ്യകരമായ പുതിയ കോശങ്ങള്‍ രൂപപ്പെടാനും സാഹചര്യമൊരുങ്ങുന്നു.

വിവിധ ഘട്ടങ്ങളിലായി നടത്തിയ ഈ ചികിത്സയിലൂടെ ചോർച്ച ക്രമേണ അടയുകയും മുറിവ് പൂർണമായി ഉണങ്ങുകയും ചെയ്തു. തുടർന്ന് രോഗിക്ക് വായിലൂടെ ഭക്ഷണം കഴിക്കാൻ ആരംഭിക്കാനായി. നിലവില്‍ രോഗി സാധാരണ ഭക്ഷണം കഴിക്കുകയും പൂർണ സുഖം പ്രാപിക്കുകയും ചെയ്തിട്ടുണ്ട്.

**വിദഗ്ധരുടെ നേതൃത്വം**

ഗ്യാസ്‌ട്രോഎൻ്ററോളജി വിഭാഗത്തിലെ ഡോ. ജസീം അൻസാരിയുടെ നേതൃത്വത്തിലാണ് ഈ എൻഡോസ്കോപ്പിക് ചികിത്സ നടത്തിയത്.

അന്നനാളിയിലെ ശസ്ത്രക്രിയയ്ക്കുശേഷം ഉണ്ടാകുന്ന ഇത്തരം ഗുരുതരമായ ചോർച്ചകള്‍ ചികിത്സിക്കുക എന്നത് ഏറെ വെല്ലുവിളി നിറഞ്ഞതാണെന്നും, എൻഡോസ്കോപ്പിക് വാക്വം തെറാപ്പി പോലുള്ള നൂതന ചികിത്സാരീതികള്‍ ഇത്തരം സങ്കീർണ സാഹചര്യങ്ങളില്‍ ഏറെ പ്രയോജനകരമാണെന്നും ഡോ. ജസീം അൻസാരി വ്യക്തമാക്കി.

'കണ്ണൂർ ആസ്റ്റർ മിംസില്‍ അഡ്വാൻസ്ഡ് എൻഡോസ്കോപ്പിയില്‍ പ്രത്യേക വൈദഗ്ധ്യമുള്ള മെഡിക്കല്‍ സംഘവും അത്യാധുനിക സാങ്കേതിക സംവിധാനങ്ങളും ലഭ്യമാണ്. സങ്കീർണമായ ദഹനനാള രോഗങ്ങളും ശസ്ത്രക്രിയാനന്തര സങ്കീർണതകളും ഉള്‍പ്പെടെ വിവിധ രോഗാവസ്ഥകള്‍ നൂതന എൻഡോസ്കോപ്പിക് ചികിത്സാരീതികളിലൂടെ കൈകാര്യം ചെയ്യുന്നതിനുള്ള സൗകര്യങ്ങള്‍ ഇവിടെ സജ്ജമാണ്.

എൻഡോസ്കോപ്പിക് വാക്വം തെറാപ്പി പോലുള്ള അത്യാധുനിക ചികിത്സകള്‍ മലബാറിലെ രോഗികള്‍ക്ക് ഇവിടെത്തന്നെ ലഭ്യമാക്കാൻ കഴിയുന്നത് ഏറെ പ്രാധാന്യമുള്ളതാണ്,' ഗ്യാസ്‌ട്രോഎൻ്ററോളജി വിഭാഗം മേധാവി ഡോ. സാബു കെ.ജി. പറഞ്ഞു.

സങ്കീർണമായ രോഗാവസ്ഥകളില്‍ നൂതന സാങ്കേതികവിദ്യ പ്രയോജനപ്പെടുത്തി മികച്ച ചികിത്സ നല്‍കാൻ വിദഗ്ധ സംഘത്തിന് സാധിച്ചതില്‍ അതിയായ അഭിമാനമുണ്ടെന്ന് കണ്ണൂർ ആസ്റ്റർ മിംസ് ചീഫ് ഓപ്പറേറ്റിങ് ഓഫീസർ ഡോ. അനൂപ് നമ്പ്യാർ പറഞ്ഞു.

A Vadakara native who developed a severe post-surgical esophageal leak was successfully treated at Kannur Aster MIMS using advanced endoscopic vacuum therapy. The minimally invasive procedure, performed by the gastroenterology team, helped seal the leak, heal the wound and restore the patient to normal eating.

### Related Links & Sources
- [Original Story Source](https://truevisionnews.com/news/386788/esophageal-leak-endoscopic-vacuum-therapy)