---
title: "മലബാർ ചിക്കൻ ഇഡ്ഡിയപ്പം നെസ്റ്റ്; നാടൻ രുചിക്ക് ഒരു മോഡേൺ ടച്ച്"
english_title: "Malabar Chicken Idiyappam Nest: A Modern Twist on a Traditional Dish"
publisher: "truevisionnews.com"
canonical_url: "https://truevisionnews.com/news/386280/malabar-chicken-idiyappam-nest-new"
published_at: "2026-10-09T14:37:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/6ac8bd94d11b8_malabar-chicken-idiyappam-nest-NEW-update.jpg"
keywords: ["MalabarCuisine", "ChickenRecipe", "Idiyappam", "FusionFood", "KeralaFood"]
---

# മലബാർ ചിക്കൻ ഇഡ്ഡിയപ്പം നെസ്റ്റ്; നാടൻ രുചിക്ക് ഒരു മോഡേൺ ടച്ച്

> **Lead Summary:** ** **നാടൻ ഇഡ്ഡിയപ്പത്തിന് ഒരു അടിപൊളി ഫ്യൂഷൻ ടച്ച്. മലബാറിന്റെ തനതായ രുചിക്കൂട്ടുകളാൽ തയ്യാറാക്കുന്ന ചിക്കൻ മസാലയും മൃദുവായ ഇഡ്ഡിയപ്പവും ഒന്നിക്കുമ്പോൾ രുചിയിലും കാഴ്ചയിലും വ്യത്യസ്തമായൊരു വിഭവമാണ് ഒരുങ്ങുന്നത്.

## Article Content

** **നാടൻ ഇഡ്ഡിയപ്പത്തിന് ഒരു അടിപൊളി ഫ്യൂഷൻ ടച്ച്. മലബാറിന്റെ തനതായ രുചിക്കൂട്ടുകളാൽ തയ്യാറാക്കുന്ന ചിക്കൻ മസാലയും മൃദുവായ ഇഡ്ഡിയപ്പവും ഒന്നിക്കുമ്പോൾ രുചിയിലും കാഴ്ചയിലും വ്യത്യസ്തമായൊരു വിഭവമാണ് ഒരുങ്ങുന്നത്.

ഇഡ്ഡിയപ്പം മനോഹരമായ നെസ്റ്റ് രൂപത്തിലാക്കി അതിനുള്ളിൽ എരിവും മണവും നിറഞ്ഞ ചിക്കൻ മസാല ചേർക്കുന്നതാണ് ഇതിന്റെ പ്രത്യേകത. പ്രഭാത ഭക്ഷണമായും വൈകുന്നേരത്തെ സ്നാക്കായും വിളമ്പാവുന്ന മലബാർ ചിക്കൻ ഇഡ്ഡിയപ്പം നെസ്റ്റ്, നാടൻ രുചിയിൽ പുതുമ തേടുന്നവർക്ക് പരീക്ഷിക്കാവുന്ന ഒരു കിടിലൻ വിഭവമാണ്.

ഇഡ്ഡിയപ്പം നെസ്റ്റ് തയ്യാറാക്കാൻ

ഇഡ്ഡിയപ്പം – 6 എണ്ണം

നെയ്യ് – 1 ടേബിൾസ്പൂൺ

കുരുമുളകുപൊടി – ഒരു നുള്ള്

ഉപ്പ് – ആവശ്യത്തിന്

**ചിക്കൻ മസാല തയ്യാറാക്കാൻ**

എല്ലില്ലാത്ത ചിക്കൻ – 200 ഗ്രാം

സവാള – 1 എണ്ണം

തക്കാളി – 1 ചെറിയത്

ഇഞ്ചി-വെളുത്തുള്ളി പേസ്റ്റ് – 1 ടീസ്പൂൺ

മുളകുപൊടി – ½ ടീസ്പൂൺ

മല്ലിപ്പൊടി – ½ ടീസ്പൂൺ

ഗരം മസാല – ¼ ടീസ്പൂൺ

കറിവേപ്പില – ആവശ്യത്തിന്

എണ്ണ – ആവശ്യത്തിന്

ഉപ്പ് – ആവശ്യത്തിന്

**അലങ്കരിക്കാൻ**

തേങ്ങ ചിരകിയത് – 2 ടേബിൾസ്പൂൺ

മല്ലിയില – ആവശ്യത്തിന്

ചെറുനാരങ്ങാനീര് – ഏതാനും തുള്ളികൾ

**തയ്യാറാക്കുന്ന വിധം**

ആദ്യം എല്ലില്ലാത്ത ചിക്കൻ ചെറിയ കഷണങ്ങളാക്കി ആവശ്യത്തിന് ഉപ്പും വെള്ളവും ചേർത്ത് വേവിച്ചെടുക്കുക. വെന്ത ചിക്കൻ ചെറിയ കഷണങ്ങളായി പിച്ചിയെടുത്ത് മാറ്റിവയ്ക്കാം. തുടർന്ന് ഒരു പാനിൽ എണ്ണ ചൂടാക്കി അരിഞ്ഞ സവാളയും കറിവേപ്പിലയും ചേർത്ത് വഴറ്റുക. സവാള നന്നായി വഴന്നുവരുമ്പോൾ ഇഞ്ചി-വെളുത്തുള്ളി പേസ്റ്റ് ചേർത്ത് പച്ചമണം മാറുന്നതുവരെ വഴറ്റണം.

ഇതിലേക്ക് അരിഞ്ഞ തക്കാളി, മുളകുപൊടി, മല്ലിപ്പൊടി, ഗരം മസാല, ആവശ്യത്തിന് ഉപ്പ് എന്നിവ ചേർത്ത് നന്നായി ഇളക്കുക. ശേഷം വേവിച്ച ചിക്കൻ ചേർത്ത് മസാല നന്നായി പിടിക്കുന്നതുവരെ വഴറ്റിയെടുക്കാം. അധികം വെള്ളമില്ലാതെ മസാല കട്ടിയായിവരുമ്പോൾ തീ അണയ്ക്കുക. ഇനി തയ്യാറാക്കിയ ഇഡ്ഡിയപ്പം നൂലുകൾ ഒട്ടിപ്പിടിച്ചിട്ടുണ്ടെങ്കിൽ കൈകൊണ്ട് പതുക്കെ വേർതിരിച്ചെടുത്ത് അൽപം നെയ്യും കുരുമുളകുപൊടിയും ചേർത്ത് ഇളക്കുക.

ചെറിയ സ്റ്റീൽ കപ്പുകളിലോ മഫിൻ മോൾഡുകളിലോ നെയ്യ് പുരട്ടി ഇഡ്ഡിയപ്പം നിരത്തി നടുവിൽ കുഴിയുള്ള നെസ്റ്റിന്റെ രൂപത്തിലാക്കാം. തുടർന്ന് 180 ഡിഗ്രി സെൽഷ്യസിൽ പ്രീഹീറ്റ് ചെയ്ത ഓവനിൽ 8–12 മിനിറ്റ് ബേക്ക് ചെയ്ത് നെസ്റ്റുകളുടെ അരികുകൾ ചെറുതായി ക്രിസ്പിയാക്കുക. ഓവൻ ഇല്ലെങ്കിൽ കട്ടിയുള്ള പാനിൽ കുറഞ്ഞ തീയിൽ മൂടിവെച്ച് ചൂടാക്കിയെടുക്കാം.

നെസ്റ്റുകൾ പൊട്ടാതെ ശ്രദ്ധയോടെ പുറത്തെടുത്തശേഷം നടുവിൽ തയ്യാറാക്കിയ ചിക്കൻ മസാല നിറയ്ക്കുക. അവസാനമായി ചിരകിയ തേങ്ങയും മല്ലിയിലയും ഏതാനും തുള്ളി ചെറുനാരങ്ങാനീരും ചേർത്ത് അലങ്കരിക്കാം. രുചിയും പുതുമയും നിറഞ്ഞ മലബാർ ചിക്കൻ ഇഡ്ഡിയപ്പം നെസ്റ്റ് ചൂടോടെ വിളമ്പാം.

*ഒരു ചെറിയ ടിപ്പ്*

*ഇഡ്ഡിയപ്പം നെസ്റ്റിന്റെ രൂപം നിലനിർത്താൻ മോൾഡിൽനിന്ന് പുറത്തെടുക്കുന്നതിന് മുമ്പ് അത് നന്നായി ഉറച്ചിട്ടുണ്ടെന്ന് ഉറപ്പാക്കണം. ചിക്കൻ മസാല അധികം വെള്ളമില്ലാതെ തയ്യാറാക്കുന്നതും നെസ്റ്റ് മൃദുവായി പൊട്ടിപ്പോകാതിരിക്കാൻ സഹായിക്കും.നാടൻ ഇഡ്ഡിയപ്പത്തിന് വ്യത്യസ്തമായൊരു രുചി നൽകുന്ന ഈ വിഭവം വീട്ടിൽ പരീക്ഷിച്ചുനോക്കാവുന്ന പുതുമയുള്ള രുചിക്കൂട്ടാണ്.*

This recipe puts a modern fusion spin on idiyappam by shaping it into a nest and filling it with flavorful Malabar chicken masala. It combines familiar Kerala flavors with an attractive presentation, making it a creative home-cooking idea.

### Related Links & Sources
- [Original Story Source](https://truevisionnews.com/news/386280/malabar-chicken-idiyappam-nest-new)