---
title: "ഔദ്യോഗിക പദവി ദുരുപയോഗം ചെയ്തുവെന്ന് നിഗമനം; മെസ്സിയുടെ പേരിലെ തട്ടിപ്പില്‍ വി അബ്ദുറഹിമാനെ പ്രതി ചേര്‍ത്തേക്കും"
english_title: "Messi Fraud Case: V. Abdurahiman May Be Named Accused Over Official Misuse"
publisher: "truevisionnews.com"
canonical_url: "https://truevisionnews.com/news/385277/messi-fraud-case-abdurahiman-accused"
published_at: "2026-10-03T08:47:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6ac074101a868_messi-fraud-case-abdurahiman-accused.jpg"
keywords: ["MessiFraud", "VAbdurahiman", "SITInvestigation", "KeralaPolitics", "SportsScam"]
---

# ഔദ്യോഗിക പദവി ദുരുപയോഗം ചെയ്തുവെന്ന് നിഗമനം; മെസ്സിയുടെ പേരിലെ തട്ടിപ്പില്‍ വി അബ്ദുറഹിമാനെ പ്രതി ചേര്‍ത്തേക്കും

> **Lead Summary:** തിരുവനന്തപുരം: ലിയോണല്‍ മെസ്സിയെ കേരളത്തിലെത്തിക്കാമെന്ന പേരിലെ തട്ടിപ്പില്‍ മുന്‍ കായിക മന്ത്രി വി. അബ്ദുറഹിമാനെ പ്രതി ചേര്‍ത്തേക്കും. അബ്ദുറഹിമാന്‍ ഔദ്യോഗിക പദവി ദുരുപയോഗം ചെയ്തുവെന്നാണ് നിഗമനം.

## Article Content

തിരുവനന്തപുരം: ലിയോണല്‍ മെസ്സിയെ കേരളത്തിലെത്തിക്കാമെന്ന പേരിലെ തട്ടിപ്പില്‍ മുന്‍ കായിക മന്ത്രി വി. അബ്ദുറഹിമാനെ പ്രതി ചേര്‍ത്തേക്കും. അബ്ദുറഹിമാന്‍ ഔദ്യോഗിക പദവി ദുരുപയോഗം ചെയ്തുവെന്നാണ് നിഗമനം.

സ്‌പോണ്‍സര്‍ക്ക് അന്യായമായ ലാഭം ഉണ്ടാക്കാന്‍ മന്ത്രി സഹായം ചെയ്തുവെന്നും എസ്‌ഐടി വിലയിരുത്തലുണ്ട്. വഴിവിട്ട ഇടപെടല്‍ മന്ത്രിയുടെ ഓഫീസില്‍ നിന്നുണ്ടായെന്നും അന്വേഷണ സംഘം വിലയിരുത്തുന്നുവെന്നാണ് വിവരം.

സ്‌പോണ്‍സര്‍ക്ക് അന്യായമായ ലാഭം ഉണ്ടാക്കാന്‍ സഹായം ചെയ്തുവെന്നും വിലയിരുത്തലുണ്ട്. അബ്ദുറഹിമാന്റെ മൊഴി എസ്‌ഐടി പരിശോധിക്കുകയാണ്. പ്രതി ചേര്‍ക്കുന്നതില്‍ അന്തിമ തീരുമാനം മൊഴിയും രേഖകളും വിശദമായി പരിശോധിച്ച ശേഷമായിരിക്കും.

കേസില്‍ എസ്‌ഐടി അന്വേഷണം ഇനി നിര്‍ണായക ഘട്ടത്തിലാണ്. പ്രാഥമിക റിപ്പോര്‍ട്ട് ഡിജിപിക്ക് കൈമാറി. വി. അബ്ദുറഹിമാന്റെ മൊഴിയും റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്.

മന്ത്രിയുടെ ഓഫീസില്‍നിന്നുള്ള കത്തിടപാടുകള്‍, ടെന്‍ഡറില്ലാതെ റിപ്പോര്‍ട്ടര്‍ ബ്രോഡ്കാസ്റ്റിംഗ് കമ്പനിയെ സ്‌പോണ്‍സറായി തിരഞ്ഞെടുത്തത്, അര്‍ജന്റീന ഫുട്‌ബോള്‍ അസോസിയേഷനുമായുള്ള ചര്‍ച്ചകള്‍ക്കായുള്ള വിദേശയാത്ര അങ്ങനെ എല്ലാം അന്വേഷണത്തിന്റെ പരിധിയിലുണ്ട്.

കഴിഞ്ഞ ദിവസം തിരുവനന്തപുരത്ത് നിന്ന് മലപ്പുറത്തെത്തിയ പ്രത്യേക അന്വേഷണ സംഘം നോട്ടീസ് നല്‍കിയ ശേഷമാണ് ഔദ്യോഗികമായി മൊഴി രേഖപ്പെടുത്തിയത്. ഇപ്പോള്‍ നിര്‍ണായകമാകുന്നത് അന്വേഷണ സംഘത്തിന്റെ ശുപാര്‍ശയാണ്.

അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്നാണ് പ്രാഥമിക റിപ്പോര്‍ട്ടിലെ നിര്‍ദേശം. വഴിവിട്ട സഹായം നല്‍കിയതില്‍ ആര്‍ക്കൊക്കെ പങ്കുണ്ട്, സാമ്പത്തിക ഇടപാടുകളില്‍ ആരുടെയൊക്കെ പങ്കാളിത്തമുണ്ട് എന്നുള്ള ചോദ്യങ്ങള്‍ക്കാണ് തുടര്‍ അന്വേഷണത്തിലൂടെ ഉത്തരം തേടുക.

**The SIT has reportedly concluded that former Sports Minister V. Abdurahiman misused his official position in the alleged fraud linked to bringing Lionel Messi to Kerala. The team’s preliminary report, already submitted to the DGP, says the investigation is now at a crucial stage and a final decision on adding him as an accused will follow a detailed review of his statement and records.**

### Related Links & Sources
- [Original Story Source](https://truevisionnews.com/news/385277/messi-fraud-case-abdurahiman-accused)