---
title: "ഗ്യാനേഷ് കുമാറിനെ ഉടനടി സ്ഥാനത്തുനിന്ന് നീക്കണം; ഭരണഘടനയെയും ജനാധിപത്യത്തെയും സംരക്ഷിക്കാനുള്ള പോരാട്ടത്തിൽ നാം ഒറ്റക്കെട്ടായി അണിനിരക്കണം - പിണറായി വിജയൻ"
english_title: " Pinarayi Vijayan Says Constitutional Institutions Under Threat Slams Election Commission Gyanesh Kumar SIR SSR Voter List Revision"
publisher: "truevisionnews.com"
canonical_url: "https://truevisionnews.com/news/384179/pinarayi-vijayan-constitutional-institutions-threat-election-commission-gyanesh-kumar-criticism"
published_at: "2026-09-25T17:12:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6ab65e8b8fee2_pinarayi-vijayan-constitutional-institutions-threat-election-commission-gyanesh-kumar-criticism.jpg"
keywords: ["Pinarayi Vijayan", "Election Commission", "Gyanesh Kumar", "SIR SSR Voter List Revision Allegation"]
---

# ഗ്യാനേഷ് കുമാറിനെ ഉടനടി സ്ഥാനത്തുനിന്ന് നീക്കണം; ഭരണഘടനയെയും ജനാധിപത്യത്തെയും സംരക്ഷിക്കാനുള്ള പോരാട്ടത്തിൽ നാം ഒറ്റക്കെട്ടായി അണിനിരക്കണം - പിണറായി വിജയൻ

> **Lead Summary:** തിരുവനന്തപുരം : രാജ്യത്തിന്റെ ഭരണഘടനാ സ്ഥാപനങ്ങൾ മുമ്പൊരിക്കലുമില്ലാത്തവിധം വലിയ ഭീഷണി നേരിടുകയാണെന്ന് പ്രതിപക്ഷ നേതാവ് പിണറായി വിജയൻ.

## Article Content

തിരുവനന്തപുരം : രാജ്യത്തിന്റെ ഭരണഘടനാ സ്ഥാപനങ്ങൾ മുമ്പൊരിക്കലുമില്ലാത്തവിധം വലിയ ഭീഷണി നേരിടുകയാണെന്ന് പ്രതിപക്ഷ നേതാവ് പിണറായി വിജയൻ.

സ്വതന്ത്രവും നീതിയുക്തവുമായ തെരഞ്ഞെടുപ്പ് ഉറപ്പാക്കേണ്ട ഇന്ത്യൻ തെരഞ്ഞെടുപ്പ് കമ്മീഷന്റെ വിശ്വാസ്യത പൂർണമായും തകർക്കപ്പെടുന്ന ഞെട്ടിക്കുന്ന വാർത്തകളാണ് ഇപ്പോൾ പുറത്തുവരുന്നതെന്നും അദ്ദേഹം ഫേസ്ബുക്ക് കുറിപ്പിൽ വ്യക്തമാക്കി.‌‌ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ നടത്തുന്ന ഏകാധിപത്യപരമായ ഇടപെടലുകൾ അങ്ങേയറ്റം ഗൗരവമുള്ളതാണെന്ന് പിണറായി വിജയൻ ചൂണ്ടിക്കാട്ടി.

തെരഞ്ഞെടുപ്പ് കമ്മീഷന്റെ കൂട്ടുത്തരവാദിത്തം ഗ്യാനേഷ് കുമാർ പൂർണമായും ഇല്ലാതാക്കിയെന്ന് പറഞ്ഞ അദ്ദേഹം ഭരണകക്ഷിക്ക് അനുകൂലമായി കമ്മീഷനെ ചലിപ്പിക്കാനും അധികാരം അട്ടിമറിക്കാനും ശ്രമിക്കുകയാണെന്നും പറഞ്ഞു.

എസ്.ഐ.ആർ (SIR), എസ്.എസ്.ആർ (SSR) തുടങ്ങിയ വോട്ടർപട്ടിക പുനഃപരിശോധനാ പ്രക്രിയകളിൽ സുതാര്യതയില്ലാത്ത തീരുമാനങ്ങളാണ് അടിച്ചേൽപ്പിക്കുന്നത്. ജനാധിപത്യത്തെ അട്ടിമറിക്കാനുള്ള ഈ ഗൂഢാലോചന, ഭരണഘടന ഉറപ്പുനൽകുന്ന സാർവത്രിക പ്രായപൂർത്തി വോട്ടവകാശം എന്ന അടിസ്ഥാന അവകാശത്തെയാണ് ഇല്ലാതാക്കുന്നതെന്നും പിണറായി വിജയൻ പറഞ്ഞു.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ ഉടനടി സ്ഥാനത്തുനിന്ന് നീക്കം ചെയ്യണമെന്ന് അദ്ദേഹം ആവശ്യപ്പെട്ടു. സുതാര്യമല്ലാത്ത വോട്ടർപട്ടിക പുനഃപരിശോധനാ പ്രക്രിയകൾ അടിയന്തരമായി നിർത്തിവെച്ച്, പട്ടികയിൽ നിന്ന് അന്യായമായി ഒഴിവാക്കപ്പെട്ടവരുടെ വോട്ടവകാശം പുനഃസ്ഥാപിക്കാൻ തയ്യാറാകണം.

ഈ ജനാധിപത്യ ധ്വംസനത്തിനെതിരെ രാജ്യത്തെ ഇടതുപക്ഷ പാർട്ടികൾ ഒറ്റക്കെട്ടായി രംഗത്തുവന്നിരിക്കുകയാണെന്നും ഭരണഘടനയെയും ജനാധിപത്യത്തെയും സംരക്ഷിക്കാനുള്ള പോരാട്ടത്തിൽ നാം ഒറ്റക്കെട്ടായി അണിനിരക്കണമെന്നും അദ്ദേഹം ആഹ്വാനം ചെയ്തു.

**English Summary:**

Opposition Leader Pinarayi Vijayan said in a Facebook post that constitutional institutions are facing unprecedented threat, alleging Election Commission of India's credibility is being destroyed. He alleged Chief Election Commissioner Gyanesh Kumar's autocratic interventions eliminated collective responsibility and that commission is being moved to favour ruling party. He alleged non-transparent decisions in voter list revisions like SIR and SSR undermine universal adult franchise. He demanded immediate removal of CEC and halting of revision processes and restoration of voting rights, saying left parties are united against this and calling for united struggle to protect Constitution and democracy.

### Related Links & Sources
- [Original Story Source](https://truevisionnews.com/news/384179/pinarayi-vijayan-constitutional-institutions-threat-election-commission-gyanesh-kumar-criticism)