---
title: "കോഴിക്കോട് കൊടുവള്ളിയിൽ ചരക്ക് ലോറിക്ക് തീപിടിച്ചു, പിന്നാലെ വന്ന വാഹന യാത്രക്കാരുടെ  സമയോചിത ഇടപെടലിൽ ഡ്രൈവർക്ക് രക്ഷ, തീയണച്ച് അഗ്നിരക്ഷാസേന "
english_title: "Goods Lorry Catches Fire At Koduvally Kozhikode Driver Safe"
publisher: "truevisionnews.com"
canonical_url: "https://truevisionnews.com/news/382413/goods-lorry-catches-fire-koduvally-kozhikode-midnight"
published_at: "2026-09-13T10:59:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6aa634d06b6e6_goods-lorry-catches-fire-koduvally-kozhikode-midnight.jpg"
keywords: ["Kozhikode News", "Koduvally Lorry Fire", "Kerala Fire Force", "Lorry Accident"]
---

# കോഴിക്കോട് കൊടുവള്ളിയിൽ ചരക്ക് ലോറിക്ക് തീപിടിച്ചു, പിന്നാലെ വന്ന വാഹന യാത്രക്കാരുടെ  സമയോചിത ഇടപെടലിൽ ഡ്രൈവർക്ക് രക്ഷ, തീയണച്ച് അഗ്നിരക്ഷാസേന 

> **Lead Summary:** കോഴിക്കോട്: കൊടുവള്ളിയിൽ ചരക്ക് ലോറിക്ക് തീപിടിച്ചു. ശനിയാഴ്ച രാത്രി 12.30ഓടെയാണ് സൗത്ത് കൊടുവള്ളിയിൽ സംഭവം. കർണാടകയിൽ നിന്ന് ഇഞ്ചി കയറ്റി എറണാകുളത്തേക്ക് പോകുകയായിരുന്ന ലോറിക്കാണ് തീപിടിച്ചത്.

## Article Content

കോഴിക്കോട്: കൊടുവള്ളിയിൽ ചരക്ക് ലോറിക്ക് തീപിടിച്ചു. ശനിയാഴ്ച രാത്രി 12.30ഓടെയാണ് സൗത്ത് കൊടുവള്ളിയിൽ സംഭവം. കർണാടകയിൽ നിന്ന് ഇഞ്ചി കയറ്റി എറണാകുളത്തേക്ക് പോകുകയായിരുന്ന ലോറിക്കാണ് തീപിടിച്ചത്.

ലോറിയുടെ പിൻഭാഗത്തെ ടയറിന് സമീപത്തുനിന്നാണ് തീ പടർന്നതെന്നാണ് വിവരം. ലോറിയുടെ പിന്നിലായി സഞ്ചരിച്ചിരുന്ന വാഹനത്തിലുള്ളവരാണ് ആദ്യം തീപിടിത്തം ശ്രദ്ധിച്ചത്. തുടർന്ന് ഇവർ ലോറി ഡ്രൈവറെ വിവരം അറിയിക്കുകയായിരുന്നു.

തീപിടിത്തത്തെ തുടർന്ന് ഡ്രൈവർ ഉടൻ ലോറി റോഡരികിലേക്ക് മാറ്റിനിർത്തി പുറത്തിറങ്ങി. ലോറിയിൽ ഡ്രൈവർ മാത്രമാണ് ഉണ്ടായിരുന്നത്. ഇയാൾ പരുക്കുകളൊന്നും കൂടാതെ സുരക്ഷിതനായി പുറത്തിറങ്ങി.

വിവരമറിഞ്ഞ് അഗ്നിരക്ഷാസേന സ്ഥലത്തെത്തി. തുടർന്ന് നടത്തിയ ശ്രമത്തിനൊടുവിൽ ലോറിയിൽ പടർന്ന തീ നിയന്ത്രണവിധേയമാക്കുകയായിരുന്നു. തീപിടിത്തത്തിന്റെ കാരണം വ്യക്തമല്ല. സംഭവത്തിൽ ലോറിയുടെ പിൻഭാഗത്തിനും ടയറുകൾക്കും ഉൾപ്പെടെ നാശനഷ്ടമുണ്ടായിട്ടുണ്ടെന്നാണ് വിവരം.

അർധരാത്രിയിൽ പ്രധാന റോഡിൽ ലോറിയിൽ തീപിടിച്ചതിനെ തുടർന്ന് പ്രദേശത്ത് നേരിയ ആശങ്കയും ഉണ്ടായി. അഗ്നിരക്ഷാസേനയുടെ സമയോചിതമായ ഇടപെടലിലൂടെയാണ് തീ കൂടുതൽ ഭാഗങ്ങളിലേക്ക് പടരുന്നത് തടയാനായത്. സംഭവവുമായി ബന്ധപ്പെട്ട് കൂടുതൽ വിവരങ്ങൾ ലഭ്യമായിട്ടില്ല.

**English Summary:**

Goods lorry carrying ginger from Karnataka to Ernakulam caught fire near South Koduvally, Kozhikode around 12.30 am Saturday. Fire reportedly started near rear tyre, noticed by motorists behind who alerted driver. Driver alone in lorry, moved vehicle to roadside and escaped unhurt. Fire force reached spot and controlled blaze. Cause unknown, rear portion and tyres damaged, timely intervention prevented spread, no further details yet.

### Related Links & Sources
- [Original Story Source](https://truevisionnews.com/news/382413/goods-lorry-catches-fire-koduvally-kozhikode-midnight)