---
title: "മകളുടെ വിവാഹബന്ധങ്ങൾ കുടുംബത്തിന് അപമാനം; പിതാവിന്റെ ആജ്ഞപ്രകാരം കാമുകൻ യുവതിയെ കഴുത്തുഞെരിച്ചു കൊന്നു"
english_title: "Telangana Father Asks Lover To Kill Daughter For Family Honour Man Strangles Woman"
publisher: "truevisionnews.com"
canonical_url: "https://truevisionnews.com/news/379960/telangana-father-asks-lover-kill-daughter-honour-killing-warangal"
published_at: "2026-08-25T14:31:00+05:30"
category: "Crime"
language: "ml"
image: "https://cf.zdn.im/img/truevisionnews.com/0/image-uploads/6a8d5a720a2f0_telangana-father-asks-lover-kill-daughter-honour-killing-warangal.jpg"
keywords: ["Telangana Honour Killing", "Warangal Murder", "Karimnagar", "Godavarikhani"]
---

# മകളുടെ വിവാഹബന്ധങ്ങൾ കുടുംബത്തിന് അപമാനം; പിതാവിന്റെ ആജ്ഞപ്രകാരം കാമുകൻ യുവതിയെ കഴുത്തുഞെരിച്ചു കൊന്നു

> **Lead Summary:** **വരംഗൽ: **മകളുടെ ബന്ധം കുടുംബത്തിന് അപമാനമാകുന്നുവെന്ന് ആരോപിച്ച് അവളെ കൊല്ലാൻ കാമുകനോട് ആവശ്യപ്പെട്ട പിതാവിന്റെ നിർദേശപ്രകാരം യുവതിയെ കാമുകൻ കഴുത്തുഞെരിച്ച് കൊലപ്പെടുത്തിയതായി പൊലീസ് വ്യക്തമാക്കി. തെലങ്കാനയിലെ ഗോഡാവരിഖനിയിൽ നിന്നുള്ള 33 കാരിയായ അങ്കത്തി മാനസയാണ് കൊല്ലപ്പെട്ടത്.

## Article Content

**വരംഗൽ: **മകളുടെ ബന്ധം കുടുംബത്തിന് അപമാനമാകുന്നുവെന്ന് ആരോപിച്ച് അവളെ കൊല്ലാൻ കാമുകനോട് ആവശ്യപ്പെട്ട പിതാവിന്റെ നിർദേശപ്രകാരം യുവതിയെ കാമുകൻ കഴുത്തുഞെരിച്ച് കൊലപ്പെടുത്തിയതായി പൊലീസ് വ്യക്തമാക്കി. തെലങ്കാനയിലെ ഗോഡാവരിഖനിയിൽ നിന്നുള്ള 33 കാരിയായ അങ്കത്തി മാനസയാണ് കൊല്ലപ്പെട്ടത്.

ആഗസ്റ്റ് 20-ന് ആളൊഴിഞ്ഞ പ്രദേശത്ത് നിർത്തിയിട്ടിരുന്ന കാറിൽ നിന്ന് ദുർഗന്ധം വമിച്ചതിനെ തുടർന്ന് നാട്ടുകാർ പൊലീസിനെ വിവരമറിയിച്ചതോടെയാണ് കൊലപാതക വിവരം പുറത്തറിഞ്ഞത്. തുടർന്ന് കാറിന്റെ ഡിക്കിയിൽ നിന്ന് അഴുകിയ നിലയിൽ യുവതിയുടെ മൃതദേഹം കണ്ടെത്തുകയായിരുന്നു. പോസ്റ്റ്മോർട്ടത്തിനായി മൃതദേഹം വരംഗലിലെ മഹാത്മാഗാന്ധി മെമ്മോറിയൽ ആശുപത്രിയിലേക്ക് മാറ്റി.

മാനസയും പ്രതിയായ വിനോദും ബാല്യകാല സുഹൃത്തുക്കളും പ്രണയബന്ധത്തിലുമായിരുന്നു. മാനസ നേരത്തെ രണ്ട് വിവാഹം കഴിച്ചിരുന്നെങ്കിലും രണ്ടും വിവാഹമോചനത്തിൽ അവസാനിക്കുകയാണുണ്ടായത്. ആഗസ്റ്റ് 17-ന് കരീംനഗറിലെ വിനോദിന്റെ വാടകമുറിയിൽ വെച്ച് ഇരുവരും കൂടിക്കാഴ്ച നടത്തി.

തന്നെ വിവാഹം കഴിക്കണമെന്ന് മാനസ ആവശ്യപ്പെട്ടതിനെ തുടർന്ന് ഇരുവരും തമ്മിൽ തർക്കമുണ്ടായെന്നാണ് പൊലീസ് പറയുന്നത്. തുടർന്ന് വിനോദ് മാനസയുടെ പിതാവ് രാജേഷത്തെ വിളിച്ച് വിവരം അറിയിക്കുകയായിരുന്നു. മകളുടെ പെരുമാറ്റം കുടുംബത്തിനും ബന്ധുക്കൾക്കും അപമാനമുണ്ടാക്കുന്നതായി കരുതിയ രാജേഷം, മാനസയുമായി വഴക്കുണ്ടാക്കി അവളെ കൊലപ്പെടുത്താൻ വിനോദിനോട് ആവശ്യപ്പെട്ടെന്നാണ് പൊലീസിന്റെ ആരോപണം.

ഇതിന്റെ അടിസ്ഥാനത്തിൽ വിനോദ് മാനസയെ കഴുത്തുഞെരിച്ച് കൊലപ്പെടുത്തുകയായിരുന്നുവെന്ന് അന്വേഷണത്തിൽ കണ്ടെത്തി. തുടർന്ന് മൃതദേഹം പൊതിഞ്ഞ് കാറിന്റെ ഡിക്കിയിൽ ഒളിപ്പിച്ച ശേഷം ആളൊഴിഞ്ഞ സ്ഥലമായ എൽക്കത്തുരുത്തിയിൽ കാർ ഉപേക്ഷിക്കുകയാണുണ്ടായത്. മൃതദേഹം പിന്നീട് മാറ്റാൻ പദ്ധതിയിട്ടിരുന്നതായും പൊലീസ് വ്യക്തമാക്കുന്നു.

ആദ്യ ചോദ്യം ചെയ്യലിൽ മാനസയ്ക്ക് മുറിയിൽവെച്ച് അപസ്മാരം വന്ന് മരിച്ചതാണെന്നും ഭയന്നതിനെ തുടർന്ന് മൃതദേഹം മാറ്റിയെന്നുമായിരുന്നു വിനോദ് മൊഴി നൽകിയിരുന്നത്. എന്നാൽ വിശദമായ ചോദ്യം ചെയ്യലിൽ ഇയാൾ കുറ്റം സമ്മതിക്കുകയും, പിതാവ് രാജേഷം കൊലപ്പെടുത്താൻ ആവശ്യപ്പെട്ട കാര്യം വെളിപ്പെടുത്തുകയും ചെയ്തതായി പൊലീസ് അറിയിച്ചു.

സംഭവത്തിൽ വിനോദിനെ അറസ്റ്റ് ചെയ്ത് തിങ്കളാഴ്ച കോടതിയിൽ ഹാജരാക്കി. കൊലപാതകത്തിൽ പിതാവിന്റെ പങ്കിനെക്കുറിച്ചും പൊലീസ് ഇപ്പോൾ വിശദമായ അന്വേഷണം നടത്തിവരികയാണ്.

English Summary:

In Telangana's Godavarikhani, a 33-year-old woman Angathi Manasa was strangled to death by her lover Vinod allegedly on her father's instruction. Police said father Rajesh asked Vinod to kill his daughter terming her relationship shameful for family. Body was found decomposing in car dickey at Elkathurthi on Aug 20 after argument over marriage demand on Aug 17. Accused arrested, probe on father's role.

### Related Links & Sources
- [Original Story Source](https://truevisionnews.com/news/379960/telangana-father-asks-lover-kill-daughter-honour-killing-warangal)