---
title: "'എന്റെ നിഴലായിരുന്നു ബ്രിജേഷ്'; അകാലത്തിൽ വിടപറഞ്ഞ അനുജന്റെ ഓർമയിൽ മുൻ മന്ത്രി എം.പി. രാജേഷ്"
english_title: "MP Rajesh Remembers Brother Brijesh: He Was My Shadow"
publisher: "truevisionnews.com"
canonical_url: "https://truevisionnews.com/news/379242/mp-rajesh-remembers-brother-brijesh-obituary"
published_at: "2026-08-19T20:39:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a85c76c070e7_mp-rajesh-remembers-brother-brijesh-obituary.jpg"
keywords: ["MP Rajesh", "MB Brijesh", "CPM"]
---

# 'എന്റെ നിഴലായിരുന്നു ബ്രിജേഷ്'; അകാലത്തിൽ വിടപറഞ്ഞ അനുജന്റെ ഓർമയിൽ മുൻ മന്ത്രി എം.പി. രാജേഷ്

> **Lead Summary:** പാലക്കാട്: ജീവിതത്തിലെ ഏറ്റവും വലിയ നഷ്ടവും വേദനയും നേരിടുന്ന നാളുകളിലൂടെ കടന്നുപോകുകയാണെന്ന് മുൻ മന്ത്രിയും സി.പി.ഐ.എം നേതാവുമായ എം.പി. രാജേഷ്. 49-ാം വയസ്സിൽ അകാലത്തിൽ വിടപറഞ്ഞ ഇളയ സഹോദരൻ എം.ബി. ബ്രിജേഷിന്റെ ഓർമകളാണ് രാജേഷ് ഫേയ്സ്ബുക്കിൽ പങ്കുവെച്ചത്. ഒരാഴ്ച പിന്നിടുമ്പോഴും വിശ്വസിക്കാനാകാത്ത വേർപാടിന്റെ വേദനയിലാണ് കുടുംബം.

## Article Content

പാലക്കാട്: ജീവിതത്തിലെ ഏറ്റവും വലിയ നഷ്ടവും വേദനയും നേരിടുന്ന നാളുകളിലൂടെ കടന്നുപോകുകയാണെന്ന് മുൻ മന്ത്രിയും സി.പി.ഐ.എം നേതാവുമായ എം.പി. രാജേഷ്. 49-ാം വയസ്സിൽ അകാലത്തിൽ വിടപറഞ്ഞ ഇളയ സഹോദരൻ എം.ബി. ബ്രിജേഷിന്റെ ഓർമകളാണ് രാജേഷ് ഫേയ്സ്ബുക്കിൽ പങ്കുവെച്ചത്. ഒരാഴ്ച പിന്നിടുമ്പോഴും വിശ്വസിക്കാനാകാത്ത വേർപാടിന്റെ വേദനയിലാണ് കുടുംബം.

ജൂലൈ 22-ന് രാത്രി വയറുവേദനയെ തുടർന്ന് വാണിയംകുളം പി.കെ. ദാസ് ആശുപത്രിയിൽ പ്രവേശിപ്പിച്ച ബ്രിജേഷിന് പാൻക്രിയാസിലെ അണുബാധയാണെന്ന് കണ്ടെത്തി ചികിത്സ ആരംഭിച്ചിരുന്നു. വേദന കുറഞ്ഞെങ്കിലും പിന്നീട് ശ്വാസതടസ്സം അനുഭവപ്പെട്ടു. ശ്വാസകോശത്തിൽ ഗുരുതരമായ അണുബാധ ഉണ്ടായിരുന്നെങ്കിലും തുടക്കത്തിൽ അത് തിരിച്ചറിയാനായില്ലെന്ന് രാജേഷ് പറയുന്നു.

**

ശ്വാസതടസ്സം രൂക്ഷമായതോടെ എറണാകുളം ലിസി ആശുപത്രിയിലേക്ക് മാറ്റാൻ തീരുമാനിച്ചു. ജൂലൈ 24-ന് വൈകുന്നേരം ആശുപത്രിയിലേക്ക് കൊണ്ടുപോകുന്നതിനിടെ ഓക്സിജൻ നില താഴുകയും ആംബുലൻസിൽ വെച്ച് ഹൃദയാഘാതമുണ്ടാകുകയും ചെയ്തു. തുടർന്ന് തൃശൂർ ജൂബിലി ആശുപത്രിയിൽ പ്രവേശിപ്പിച്ചപ്പോഴാണ് ശ്വാസകോശത്തിലെ അണുബാധ അതീവ ഗുരുതരമാണെന്ന് തിരിച്ചറിഞ്ഞത്.

വെന്റിലേറ്ററിലായിരുന്ന ബ്രിജേഷിനെ ECMO സഹായത്തോടെ ജൂലൈ 25-ന് പുലർച്ചെ എറണാകുളം ആസ്റ്റർ മെഡിസിറ്റിയിൽ പ്രവേശിപ്പിച്ചു. പിന്നീട് ജീവിതത്തിലേക്ക് തിരിച്ചുവരാനുള്ള പ്രതീക്ഷകൾക്ക് വഴിതുറന്നതായിരുന്നു തുടർന്നുള്ള ദിവസങ്ങൾ.

മൂന്നു ദിവസത്തിനുള്ളിൽ ആരോഗ്യനിലയിൽ പുരോഗതിയുണ്ടായി. ശരീരത്തിലെ അണുബാധയുടെ സൂചകമായ CRP 100-ന് മുകളിൽ നിന്ന് 25 ആയി കുറഞ്ഞു. ബാക്ടീരിയൽ അണുബാധയ്ക്കും രക്തത്തിലെ ഫംഗസ് ബാധയ്ക്കുമെതിരായ ചികിത്സയോട് ബ്രിജേഷ് പ്രതികരിച്ചു. ഹൃദയാഘാതത്തെ തുടർന്ന് പ്രവർത്തനം തകരാറിലായിരുന്ന അവയവങ്ങളും സാധാരണ നിലയിലേക്ക് മടങ്ങി. ശ്വാസകോശം മാത്രമാണ് യന്ത്രസഹായത്തിൽ തുടർന്നത്.

ഓഗസ്റ്റ് ഒന്നിന്, ആശുപത്രിയിൽ പ്രവേശിപ്പിച്ച് എട്ടാം ദിവസം, ബ്രിജേഷ് കണ്ണുതുറന്നു. പത്താം ദിവസത്തോടെ ശ്വാസകോശത്തിലെ അണുബാധയിൽ വലിയ പുരോഗതിയുണ്ടായി. അത് ‘മിറക്കിൾ’ ആണെന്ന് ഡോക്ടർ പറഞ്ഞതായി രാജേഷ് ഓർമിക്കുന്നു.

ഓഗസ്റ്റ് നാലിന് ECMO സഹായം ഒഴിവാക്കാൻ കഴിയുന്ന വിധം ആരോഗ്യനില മെച്ചപ്പെട്ടു. പിറ്റേന്ന് വെന്റിലേറ്ററും ഒഴിവാക്കി. ബ്രിജേഷ് സ്വയം ശ്വസിക്കാൻ തുടങ്ങി. രക്തസമ്മർദ്ദം, ഹൃദയമിടിപ്പ്, ക്രിയാറ്റിനിൻ ഉൾപ്പെടെയുള്ള പ്രധാന ആരോഗ്യസൂചകങ്ങളെല്ലാം സ്ഥിരത കൈവരിച്ചു. മുറിയിലേക്ക് മാറ്റാനും ഫിസിയോതെറാപ്പി ഉൾപ്പെടെയുള്ള തുടർചികിത്സകൾ ആരംഭിക്കാനും തീരുമാനിച്ചു.

എന്നാൽ ഓഗസ്റ്റ് 10-ന് പ്രതീക്ഷകളെ തകർത്തുകൊണ്ട് രക്തസമ്മർദ്ദത്തിൽ വ്യതിയാനം പ്രകടമായി. പിന്നീട് സെക്കൻഡറി ഇൻഫെക്ഷൻ സ്ഥിരീകരിച്ചു. ആരോഗ്യത്തിലേക്കുള്ള ബ്രിജേഷിന്റെ പോരാട്ടം വീണ്ടും ദുർബലമായി. ഓഗസ്റ്റ് 12-ന് പുലർച്ചെ ഹൃദയമിടിപ്പ് നിലച്ചു.

> “ഇതുവരെ ആശുപത്രിവാസം വേണ്ടിവന്നിട്ടില്ലാത്ത, കാര്യമായ ആരോഗ്യപ്രശ്നങ്ങളൊന്നും നേരിട്ടിട്ടില്ലാത്ത അവനെ 49-ാം വയസ്സിൽ മരണം അപഹരിച്ചു” — രാജേഷിന്റെ വാക്കുകളിൽ സഹോദരനെ നഷ്ടപ്പെട്ട വേദന നിറയുന്നു.

കുട്ടിക്കാലത്ത് ബ്രിജേഷ് തന്റെ ‘നിഴലായിരുന്നുവെന്ന്’ രാജേഷ് പറയുന്നു. ക്രിക്കറ്റും ഫുട്ബാളും കളിക്കുന്നിടത്തെല്ലാം ഒപ്പം നടന്ന അനുജൻ. കോളേജ് കാലത്ത് എസ്.എഫ്.ഐ പ്രവർത്തനത്തിലും ഒപ്പം നിന്നു. പിന്നീട് സ്വന്തം വ്യക്തിത്വം കൊണ്ട് സംഘടനയിൽ തന്റേതായ ഇടം നേടിയ ബ്രിജേഷ്, ഒറ്റപ്പാലം എൻ.എസ്.എസ് കോളേജിൽ മാഗസിൻ എഡിറ്ററായും യൂണിവേഴ്സിറ്റി യൂണിയൻ കൗൺസിലറായും ശ്രദ്ധേയനായി.

എസ്.എഫ്.ഐ യൂണിറ്റ് സെക്രട്ടറിയായും ജില്ലാ കമ്മിറ്റി അംഗമായും പ്രവർത്തിച്ച ബ്രിജേഷ് പഠനം പൂർത്തിയാക്കിയതോടെ സംഘടനാപ്രവർത്തനം ഉപേക്ഷിച്ച് ജോലിയിലേക്ക് തിരിഞ്ഞു. പിന്നീട് സലാലയിലെത്തി. ജോലി ചെയ്യുന്നതിനൊപ്പം ബിസിനസിലേക്കും കടന്നു. എച്ച്.ഡി.എഫ്.സി.യിലെ സഹപ്രവർത്തകയായ ശതബറായിയെ വിവാഹം കഴിച്ച ബ്രിജേഷ് പിന്നീട് സംരംഭകനായും നിരവധി മേഖലകളിൽ പ്രവർത്തിച്ചു.

എന്നാൽ രാഷ്ട്രീയ സംഘടനാ പ്രവർത്തനം ഉപേക്ഷിച്ചെങ്കിലും മനുഷ്യരോടുള്ള കരുതലും മാനവികതയിലുള്ള വിശ്വാസവും ഒരിക്കലും ഉപേക്ഷിച്ചില്ലെന്ന് രാജേഷ് പറയുന്നു. മരിച്ചാൽ അവയവങ്ങൾ ദാനം ചെയ്യണമെന്നും ശരീരം മെഡിക്കൽ കോളേജിലെ വിദ്യാർഥികൾക്ക് പഠനത്തിനായി നൽകണമെന്നും ബ്രിജേഷ് നേരത്തെ ആഗ്രഹം പ്രകടിപ്പിച്ചിരുന്നു. എന്നാൽ അണുബാധയെ തുടർന്ന് അവയവദാനം നടത്താനായില്ല.

ഉറച്ച നിലപാടുകളും സ്വന്തം തീരുമാനങ്ങളിൽ വിശ്വാസവുമായിരുന്നു ബ്രിജേഷിന്റെ പ്രത്യേകത. ഉപദേശങ്ങൾ ഇഷ്ടപ്പെടാത്ത പ്രകൃതക്കാരനായിരുന്നെങ്കിലും തന്റെ തീരുമാനങ്ങൾ ശരിയാണെന്ന് തെളിയിക്കാനുള്ള ആത്മവിശ്വാസം അദ്ദേഹത്തിനുണ്ടായിരുന്നു. മലയാളമടക്കം അഞ്ച് ഭാഷകൾ അനായാസം കൈകാര്യം ചെയ്തിരുന്ന ബ്രിജേഷ് ധാരാളം യാത്ര ചെയ്യുകയും തന്റെ സംരംഭക ആശയങ്ങൾ ആഫ്രിക്കയിൽ വരെ യാഥാർഥ്യമാക്കുകയും ചെയ്തു.

കുടുംബത്തിലെ കുട്ടികളുടെ ഏറ്റവും പ്രിയപ്പെട്ട കളിക്കൂട്ടുകാരനായിരുന്നു ബ്രിജേഷ്. രാജേഷിനേക്കാൾ കൂടുതൽ സ്വാതന്ത്ര്യത്തോടെ കുട്ടികൾ ബ്രിജേഷിനോട് ഇടപെട്ടിരുന്നു. വളരെ വേഗം സുഹൃത്തുക്കളെ സൃഷ്ടിക്കാനുള്ള കഴിവും അദ്ദേഹത്തിനുണ്ടായിരുന്നു. ആശുപത്രിയിൽ ചികിത്സയിലായിരുന്നപ്പോഴാണ് ബ്രിജേഷിന്റെ സൗഹൃദവലയം എത്ര വിശാലമായിരുന്നുവെന്ന് താൻ തിരിച്ചറിഞ്ഞതെന്നും രാജേഷ് കുറിച്ചു.

ലോകകപ്പുകളോടും കായികലോകത്തോടുമുള്ള ബ്രിജേഷിന്റെ പ്രണയവും രാജേഷിന്റെ കുറിപ്പിൽ നിറയുന്നു. കുട്ടിക്കാലത്ത് ഓരോ ലോകകപ്പ് ഫുട്ബോൾ, ക്രിക്കറ്റ് മത്സരകാലത്തും ടീമുകളുടെയും കളിക്കാരുടെയും സ്റ്റാറ്റിസ്റ്റിക്സുകളുടെയും കുറിപ്പുകൾ ബ്രിജേഷിന്റെ നോട്ടുപുസ്തകങ്ങളിൽ നിറഞ്ഞിരുന്നു. സഹോദരങ്ങൾ ഒരുമിച്ച് നിരവധി ലോകകപ്പുകൾ കണ്ടു. മത്സരങ്ങൾ വിശകലനം ചെയ്തു, തർക്കിച്ചു, ആരവമുയർത്തി. അവസാന ലോകകപ്പും ബ്രിജേഷ് കണ്ടത് വീട്ടിലെ വാട്സ്ആപ്പ് ഗ്രൂപ്പിൽ കുട്ടികളുമായി മത്സരങ്ങളെക്കുറിച്ച് ചർച്ച ചെയ്തുകൊണ്ടായിരുന്നു.

ബ്രിജേഷിന്റെ ചികിത്സയ്ക്കിടെ ഒപ്പം നിന്ന ഡോക്ടർമാർക്കും നഴ്സുമാർക്കും ആശുപത്രി ജീവനക്കാർക്കും, രക്തം നൽകിയ എറണാകുളത്തെ സഖാക്കൾക്കും, ഓരോ നിമിഷവും കുടുംബത്തിനൊപ്പം നിന്നവർക്കും രാജേഷ് നന്ദി അറിയിച്ചു. മരണശേഷം വീട്ടിലെത്തി ആശ്വാസമായവരോടും ഫോൺകോളുകളിലൂടെയും സന്ദേശങ്ങളിലൂടെയും അനുശോചനം അറിയിച്ചവരോടും അദ്ദേഹം ഹൃദയം നിറഞ്ഞ നന്ദി രേഖപ്പെടുത്തി.

> “കക്ഷി-രാഷ്ട്രീയ വ്യത്യാസങ്ങളൊന്നുമില്ലാതെ യഥാർത്ഥ സ്നേഹത്തിന്റെയും സൗഹൃദത്തിന്റെയും മൂല്യം ഉയർത്തിപ്പിടിച്ച എല്ലാവർക്കും ഹൃദയം നിറഞ്ഞ നന്ദി. സ്നേഹം.”

അവസാനം സഹോദരനോടുള്ള തന്റെ സ്നേഹവും ആദരവും ഒരൊറ്റ വരിയിൽ രാജേഷ് അടയാളപ്പെടുത്തി:

> “ബ്രിജേഷിന്റെ ഉജ്ജ്വലമായ ഓർമകൾക്കു മുന്നിൽ സഹോദരൻ, സഖാവ് എന്നീ നിലകളിൽ എന്റെ ലാൽസലാം.”**

**English Summary:**

Former Minister MP Rajesh shared a heartfelt Facebook note remembering his younger brother MB Brijesh, who passed away at 49. Brijesh was admitted on July 22 with pancreatitis and later developed severe lung infection and cardiac arrest. He showed recovery at Aster Medcity, Kochi, but succumbed on August 12 due to secondary infection. Rajesh recalled Brijesh as his childhood shadow, an active SFI leader, entrepreneur, and sports lover.

**
**

### Related Links & Sources
- [Original Story Source](https://truevisionnews.com/news/379242/mp-rajesh-remembers-brother-brijesh-obituary)