---
title: "‘പൊരുതിനേടിയ സ്വാതന്ത്ര്യം മതവർഗീയ ശക്തികൾക്കും കോർപ്പറേറ്റുകൾക്കും അടിയറവെക്കാതിരിക്കാൻ പോരാടാം’ -എംവി ഗോവിന്ദൻ "
english_title: " MV Govindan Calls To Protect Independence From Communal Forces And Corporates On 80th Independence Day"
publisher: "truevisionnews.com"
canonical_url: "https://truevisionnews.com/news/378570/mv-govindan-independence-day-message-communal-corporate"
published_at: "2026-08-14T22:07:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7f44b50f4b1_mv-govindan-independence-day-message-communal-corporate.jpg"
keywords: ["MV Govindan", "CPI(M)", "Independence Day", "80th Independence Day"]
---

# ‘പൊരുതിനേടിയ സ്വാതന്ത്ര്യം മതവർഗീയ ശക്തികൾക്കും കോർപ്പറേറ്റുകൾക്കും അടിയറവെക്കാതിരിക്കാൻ പോരാടാം’ -എംവി ഗോവിന്ദൻ 

> **Lead Summary:** തിരുവനന്തപുരം : എൺപതാം സ്വാതന്ത്ര്യദിനത്തില്‍ ആശംസകൾ നേർന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ. പൊരുതിനേടിയ സ്വാതന്ത്ര്യം മതവർഗീയ ശക്തികൾക്കും കോർപ്പറേറ്റുകൾക്കും അടിയറവെക്കാതിരിക്കാൻ പോരാടാമെന്ന് അദ്ദേഹം ആഹ്വാനം ചെയ്തു. ഫേസ്ബുക്ക് പോസ്റ്റിലൂടെയായിരുന്ന ആശംസയറിയിച്ചത്.

## Article Content

തിരുവനന്തപുരം : എൺപതാം സ്വാതന്ത്ര്യദിനത്തില്‍ ആശംസകൾ നേർന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ. പൊരുതിനേടിയ സ്വാതന്ത്ര്യം മതവർഗീയ ശക്തികൾക്കും കോർപ്പറേറ്റുകൾക്കും അടിയറവെക്കാതിരിക്കാൻ പോരാടാമെന്ന് അദ്ദേഹം ആഹ്വാനം ചെയ്തു. ഫേസ്ബുക്ക് പോസ്റ്റിലൂടെയായിരുന്ന ആശംസയറിയിച്ചത്.

'രാജ്യം സ്വാതന്ത്ര്യലബ്‌ധിയുടെ 80-ാം വാർഷിക വേളയിലാണ്. പൊരുതിനേടിയ സ്വാതന്ത്ര്യം മതവർഗീയ ശക്തികൾക്കും കോർപ്പറേറ്റ് ചൂഷണങ്ങൾക്കും അടിയറവെക്കേണ്ടിവരുന്ന ഭീതിതമായ വർത്തമാനകാല വിപത്തിനെ ചെറുക്കേണ്ടത് അനിവാര്യമാണ്.

സമ്പന്നർക്കുവേണ്ടി മാത്രം ചലിക്കുന്ന ഭരണസംവിധാനത്തിൽ വിശ്വാസം നഷ്‌ടപ്പെട്ട ഒരു തലമുറ തെരുവിലിറങ്ങിയപ്പോൾ മുട്ടുമടക്കേണ്ടിവന്ന അധികാരക്കോട്ടകളുടെ പതർച്ച പ്രതീക്ഷാനിർഭരമാണെന്ന് അദ്ദേഹം കുറിച്ചു.

മതനിരപേക്ഷ ഭരണഘടനയെ അട്ടിമറിക്കാനുള്ള ശ്രമങ്ങളാണ് നടക്കുന്നതെന്നും പുരോഗമന ജനാധിപത്യ ഇന്ത്യ എന്ന സ്വപ്‌നത്തിലേക്ക് നമുക്ക് ഇനിയും മുന്നേറാനുണ്ടെന്നും എം വി ​ഗോവിന്ദൻ പറഞ്ഞു. 'ബ്രിട്ടീഷ്‌ സാമ്രാജ്യത്വത്തിന്‌ എതിരായി നടന്ന ദീർഘമായ സ്വാതന്ത്ര്യസമരത്തിന്റെ സംഭാവനയായ മതനിരപേക്ഷ ഭരണഘടനയെ അട്ടിമറിക്കാനുള്ള ശ്രമങ്ങൾ നടക്കുകയാണ്.

ജനങ്ങളിൽ ഭൂരിപക്ഷവും നേരിടുന്ന വിദ്യാഭ്യാസ പിന്നാക്കാവസ്ഥ, ദാരിദ്ര്യം, പെരുകുന്ന തൊഴിലില്ലായ്‌മ, വർധിച്ചുവരുന്ന സമ്പത്തിക അന്തരം എന്നിവയെല്ലാം സ്വാതന്ത്ര്യാനന്തര ഇന്ത്യ നേരിടുന്ന വലിയ വെല്ലുവിളികളാണ്. ലോകം കണ്ട ഇതിഹാസ സമാനമായ കോളനിവിരുദ്ധ പോരാട്ടമായിരുന്നു ഇന്ത്യൻ സ്വാതന്ത്ര്യസമരം.

നിരവധി ധീര ദേശാഭിമാനികളുടെ രക്തവും ജീവനും നൽകി നേടിയതാണ്‌ സ്വാതന്ത്ര്യം. ദാരിദ്ര്യമില്ലാത്ത, നിരക്ഷരതയില്ലാത്ത, എല്ലാവർക്കും വിദ്യാഭ്യാസവും, തൊഴിലും,ആരോഗ്യസേവനവും ഉറപ്പുവരുത്തുന്ന പുരോഗമന ജനാധിപത്യ ഇന്ത്യ എന്ന സ്വപ്‌നത്തിലേക്ക് നമുക്ക് ഇനിയും മുന്നേറാനുണ്ട്.

ഈ സ്വാതന്ത്ര്യ ദിനം അതിന് നമുക്ക് കരുത്തുപകരും. ഏവർക്കും സ്വാതന്ത്ര്യദിനാശംസകൾ',- എം വി ​ഗോവിന്ദൻ കുറിച്ചു.

### Related Links & Sources
- [Original Story Source](https://truevisionnews.com/news/378570/mv-govindan-independence-day-message-communal-corporate)