---
title: "എന്നാലും എന്റെ കള്ളാ....! പൂട്ടുപൊളിക്കാതെ വൻ മോഷണം; മട്ടാഞ്ചേരിയിൽ വൃദ്ധദമ്പതികളുടെ വീട്ടിൽ നിന്ന് 21 പവൻ കവർന്നു, അന്വേഷണം ഊർജ്ജിതം"
english_title: "21 Sovereigns Gold Stolen From Elderly Couple's House In Kochi Mattancherry"
publisher: "truevisionnews.com"
canonical_url: "https://truevisionnews.com/news/378290/kochi-mattancherry-21-sovereign-gold-theft-elderly-couple"
published_at: "2026-08-13T12:33:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7d6d60340a8_kochi-mattancherry-21-sovereign-gold-theft-elderly-couple.jpg"
keywords: ["Gold Stolen", "Theft", "Mattancherry Theft Case", "Dog Squad"]
---

# എന്നാലും എന്റെ കള്ളാ....! പൂട്ടുപൊളിക്കാതെ വൻ മോഷണം; മട്ടാഞ്ചേരിയിൽ വൃദ്ധദമ്പതികളുടെ വീട്ടിൽ നിന്ന് 21 പവൻ കവർന്നു, അന്വേഷണം ഊർജ്ജിതം

> **Lead Summary:** **കൊച്ചി: **വൃദ്ധദമ്പതികൾ മാത്രം താമസിക്കുന്ന വീട്ടിൽ നിന്ന് 21 പവൻ സ്വർണം മോഷണം പോയി. മട്ടാഞ്ചേരി നസ്രത്ത് മദർ തെരേസ റോഡ് മുട്ടത്തിപ്പറമ്പിലെ എ.വി. ജോയിയുടെ വീട്ടിൽ നിന്നാണ് സ്വർണം കാണാതായത്. വീടിന്റെ മുകളിലെ നിലയിൽ ഹാളിലെ അലമാരയുടെ ഡ്രോയറിൽ സൂക്ഷിച്ചിരുന്ന സ്വർണമാണ് നഷ്ടമായത്.

## Article Content

**കൊച്ചി: **വൃദ്ധദമ്പതികൾ മാത്രം താമസിക്കുന്ന വീട്ടിൽ നിന്ന് 21 പവൻ സ്വർണം മോഷണം പോയി. മട്ടാഞ്ചേരി നസ്രത്ത് മദർ തെരേസ റോഡ് മുട്ടത്തിപ്പറമ്പിലെ എ.വി. ജോയിയുടെ വീട്ടിൽ നിന്നാണ് സ്വർണം കാണാതായത്. വീടിന്റെ മുകളിലെ നിലയിൽ ഹാളിലെ അലമാരയുടെ ഡ്രോയറിൽ സൂക്ഷിച്ചിരുന്ന സ്വർണമാണ് നഷ്ടമായത്.

വീട്ടുടമയുടെ മൊഴി പ്രകാരം മേയ് 10ന് ദമ്പതികൾ ഞാറയ്ക്കലിൽ വിവാഹ ആവശ്യത്തിനായി പോയിരുന്നു. അപ്പോൾ അലമാരയിൽ സ്വർണം ഉണ്ടായിരുന്നതായി അവർ പറയുന്നു. പിന്നീട് ഓഗസ്റ്റ് ഒന്നിന് അലമാരയുടെ ഡ്രോയർ വീണ്ടും തുറന്ന് പരിശോധിച്ചപ്പോഴാണ് സ്വർണം കാണാതായ വിവരം ശ്രദ്ധയിൽപ്പെട്ടത്. തുടർന്ന് വീട്ടുടമ തോപ്പുംപടി പോലീസിൽ പരാതി നൽകി.

വീടിന്റെ പിറകിലെ ടെറസിലൂടെ എത്തിയാകാം മോഷണം നടത്തിയതെന്നാണ് പോലീസിന്റെ പ്രാഥമിക നിഗമനം. സംഭവസ്ഥലത്ത് ഡോഗ് സ്ക്വാഡ് എത്തി പരിശോധന നടത്തി. പരാതിയുടെ അടിസ്ഥാനത്തിൽ തോപ്പുംപടി പോലീസ് കേസെടുത്ത് അന്വേഷണം ആരംഭിച്ചു. സമീപത്തെ സിസിടിവി ദൃശ്യങ്ങളും പോലീസ് പരിശോധിക്കുന്നുണ്ട്.

നീണ്ട ഇടവേളയ്ക്ക് ശേഷമാണ് മോഷണം ശ്രദ്ധയിൽപ്പെട്ടതെന്നതിനാൽ കൃത്യം നടന്ന സമയം കണ്ടെത്തുന്നതിൽ പോലീസിന് ബുദ്ധിമുട്ടുണ്ട്. പ്രായമായവർ മാത്രം താമസിക്കുന്ന വീടുകൾ ലക്ഷ്യമിട്ടുള്ള മോഷണങ്ങൾ വർധിക്കുന്ന പശ്ചാത്തലത്തിൽ ജാഗ്രത പാലിക്കണമെന്ന് പോലീസ് നിർദേശിച്ചു. വിലപിടിപ്പുള്ള സാധനങ്ങൾ ബാങ്ക് ലോക്കറിൽ സൂക്ഷിക്കാനും അയൽവാസികളുമായി ബന്ധം പുലർത്താനും പോലീസ് ആവശ്യപ്പെട്ടു.

**English Summary:**

21 sovereigns of gold were stolen from the house of an elderly couple in Mattancherry, Kochi. The gold was kept in a drawer of an almirah in the hall on the upper floor of A.V. Joy's house on Nazareth Mother Teresa Road. The couple had last seen the gold on May 10 before going to Njarackal, and noticed it missing on August 1. Police suspect the theft occurred via the rear terrace and have registered a case. A dog squad inspected the spot.

### Related Links & Sources
- [Original Story Source](https://truevisionnews.com/news/378290/kochi-mattancherry-21-sovereign-gold-theft-elderly-couple)