---
title: "ചൊക്ലിയിലെ ഹെൽത്ത് ഇൻസ്പെക്ടർ ദീപലേഖയുടെ മരണം;ആരോഗ്യ മന്ത്രിക്ക് പരാതി നൽകാൻ എൻജിഒ യൂണിയൻ "
english_title: "Health Inspector Deepa Lekha Death NGO Union To Submit Complaint To Health Minister K Muraleedharan"
publisher: "truevisionnews.com"
canonical_url: "https://truevisionnews.com/news/378069/kannur-health-inspector-deepa-lekha-death-ngo-union-complaint-health-minister"
published_at: "2026-08-12T07:36:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a79b1ba47878_health-inspector-deepa-lekha-passed-away-vadakara-chokli.jpg"
keywords: ["Deepa Lekha Death", "NGO Union Complaint", "Kerala Health Minister", "Chokli Health Inspector", "K Muraleedharan"]
---

# ചൊക്ലിയിലെ ഹെൽത്ത് ഇൻസ്പെക്ടർ ദീപലേഖയുടെ മരണം;ആരോഗ്യ മന്ത്രിക്ക് പരാതി നൽകാൻ എൻജിഒ യൂണിയൻ 

> **Lead Summary:** **കണ്ണൂർ: **കണ്ണൂർ ചൊക്ലിയിലെ ഹെൽത്ത് ഇൻസ്പെക്ടർ ദീപ ലേഖ കുഴഞ്ഞുവീണ് മരിച്ച സംഭവത്തിൽ എൻജിഒ യൂണിയൻ ഇന്ന് ആരോഗ്യ മന്ത്രിക്ക് പരാതി നൽകും. മാനുഷിക പരിഗണന പോലും നൽകാതെ സ്ഥലം മാറ്റിയതാണ് ദീപ കുഴഞ്ഞുവീഴാൻ കാരണമെന്നും അതിന് ഉത്തരവാദികളായവർക്കെതിരെ ശക്തമായ നടപടി വേണമെന്നുമാണ് സംഘടനയുടെ പ്രധാന ആവശ്യം.

## Article Content

**കണ്ണൂർ: **കണ്ണൂർ ചൊക്ലിയിലെ ഹെൽത്ത് ഇൻസ്പെക്ടർ ദീപ ലേഖ കുഴഞ്ഞുവീണ് മരിച്ച സംഭവത്തിൽ എൻജിഒ യൂണിയൻ ഇന്ന് ആരോഗ്യ മന്ത്രിക്ക് പരാതി നൽകും. മാനുഷിക പരിഗണന പോലും നൽകാതെ സ്ഥലം മാറ്റിയതാണ് ദീപ കുഴഞ്ഞുവീഴാൻ കാരണമെന്നും അതിന് ഉത്തരവാദികളായവർക്കെതിരെ ശക്തമായ നടപടി വേണമെന്നുമാണ് സംഘടനയുടെ പ്രധാന ആവശ്യം.

അതേസമയം, പോസ്റ്റ്മോർട്ടം റിപ്പോർട്ടിൽ പക്ഷാഘാതമാണ് മരണകാരണമെന്ന് വ്യക്തമായിട്ടുണ്ടെങ്കിലും, മാനസിക സമ്മർദ്ദവും പക്ഷാഘാതത്തിന് കാരണമാകാമെന്നാണ് പോലീസിന് ലഭിച്ച മെഡിക്കൽ റിപ്പോർട്ടിൽ ചൂണ്ടിക്കാണിക്കുന്നത്. ചൊക്ലിയിൽ നിന്ന് പിണറായിയിലേക്ക് സ്ഥലം മാറ്റിയതിനെത്തുടർന്നുണ്ടായ മാനസിക ബുദ്ധിമുട്ട് മൂലമാണ് 52-കാരിയായ ദീപ ലേഖ കുഴഞ്ഞുവീണതെന്നാണ് എൻജിഒ യൂണിയൻ ആരോപിക്കുന്നത്.

പിണറായിയിലേക്ക് സ്ഥലം മാറ്റിയുള്ള ഉത്തരവ് കഴിഞ്ഞ വെള്ളിയാഴ്ചയാണ് പുറത്തിറങ്ങിയത്. ഇതേക്കുറിച്ച് സംസാരിച്ചുകൊണ്ടിരിക്കെ ഉച്ചയ്ക്ക് 12:45-ഓടെ ചൊക്ലി പഞ്ചായത്ത് ഓഫീസിൽ വെച്ചാണ് ദീപ ലേഖ കുഴഞ്ഞുവീണത്. എൻജിഒ യൂണിയന്റെ സജീവ പ്രവർത്തകയായിരുന്ന ദീപയെ സ്ഥലം മാറ്റിയത് രാഷ്ട്രീയ വിരോധം മൂലമാണെന്ന് ഇടത് അനുകൂല സംഘടനകൾ ആരോപിക്കുന്നു.

ആറു മാസം മുൻപ് മാത്രം ചൊക്ലിയിലെത്തിയ ദീപയെ രണ്ടാഴ്ച മുൻപ് മട്ടന്നൂരിലേക്ക് മാറ്റി ഉത്തരവിറങ്ങിയിരുന്നു. എന്നാൽ വാഹനാപകടത്തെ തുടർന്നുണ്ടായ പരുക്ക് ചൂണ്ടിക്കാട്ടിയതിനെ തുടർന്ന് ഈ ആദ്യ ഉത്തരവ് റദ്ദാക്കിയെങ്കിലും പിന്നീട് പിണറായിയിലേക്ക് മാറ്റുകയായിരുന്നു. തുടർന്ന് ചൊക്ലി കുടുംബാരോഗ്യ കേന്ദ്രത്തിൽ മൃതദേഹം പൊതുദർശനത്തിന് വെച്ചപ്പോൾ, ദീപ ലേഖയുടെ മരണത്തിന് കാരണക്കാരായവർക്കെതിരെ നടപടി വേണമെന്ന് ആവശ്യപ്പെടുന്ന പ്ലക്കാർഡുകളുമായാണ് എൻജിഒ യൂണിയൻ പ്രവർത്തകർ എത്തിയത്.

**English Summary:**

The NGO Union will submit a complaint to the Health Minister today regarding the death of Deepa Lekha (52), a Health Inspector in Chokli, Kannur, who collapsed and died. While the post-mortem report states stroke as the cause of death, the police medical report indicates mental stress could be a contributing factor. The NGO Union alleges political vendetta behind her transfer to Pinarayi despite her injuries from a prior accident, leading to severe mental distress. Protesters staged demonstrations with placards during the public viewing of her body at Chokli Family Health Centre.

### Related Links & Sources
- [Original Story Source](https://truevisionnews.com/news/378069/kannur-health-inspector-deepa-lekha-death-ngo-union-complaint-health-minister)