---
title: "പഠനത്തോടൊപ്പം ക്രൂരമായ പീഡനവും! മെഡിക്കൽ കോളജിൽ റാഗിങ്ങിനെ തുടർന്ന് റസിഡന്റ് ഡോക്ടർ തൂങ്ങിമരിച്ചു"
english_title: "Gujarat Medical College Ragging: Resident Doctor Dies by Suicide, 4 Students Suspended"
publisher: "truevisionnews.com"
canonical_url: "https://truevisionnews.com/news/377881/surat-medical-college-ragging-doctor-suicide-suspended-new"
published_at: "2026-08-11T08:55:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a7a971bd12e8_surat-medical-college-ragging-doctor-suicide-suspended-.jpg"
keywords: ["Surat Medical College", "Ragging", "Doctor Suicide", "Medical Students"]
---

# പഠനത്തോടൊപ്പം ക്രൂരമായ പീഡനവും! മെഡിക്കൽ കോളജിൽ റാഗിങ്ങിനെ തുടർന്ന് റസിഡന്റ് ഡോക്ടർ തൂങ്ങിമരിച്ചു

> **Lead Summary:** **സൂറത്ത്: **ഗുജറാത്തിലെ സൂറത്ത് സർക്കാർ മെഡിക്കൽ കോളജിൽ റാഗിങ്ങിനെ തുടർന്ന് റസിഡന്റ് ഡോക്ടർ ഹർഷ് പാണ്ഡ്യ തൂങ്ങിമരിച്ചു. മൈക്രോബയോളജി ഒന്നാം വർഷ പിജി വിദ്യാർഥിയായിരുന്ന ഹർഷ് പാണ്ഡ്യ, മുതിർന്ന വിദ്യാർഥികളിൽ നിന്ന് കടുത്ത അധിക്ഷേപങ്ങളും കഠിനമായ റാഗിങ്ങുമാണ് നേരിട്ടിരുന്നതെന്ന് റാഗിങ് വിരുദ്ധ സമിതിയുടെ അന്വേഷണത്തിൽ വ്യക്തമായിട്ടുള്ളതായി കോളജ് ഡീൻ ജയേഷ് ബ്രഹ്മഭട്ട് ഔദ്യോഗികമായി അറിയിച്ചു.

## Article Content

**സൂറത്ത്: **ഗുജറാത്തിലെ സൂറത്ത് സർക്കാർ മെഡിക്കൽ കോളജിൽ റാഗിങ്ങിനെ തുടർന്ന് റസിഡന്റ് ഡോക്ടർ ഹർഷ് പാണ്ഡ്യ തൂങ്ങിമരിച്ചു. മൈക്രോബയോളജി ഒന്നാം വർഷ പിജി വിദ്യാർഥിയായിരുന്ന ഹർഷ് പാണ്ഡ്യ, മുതിർന്ന വിദ്യാർഥികളിൽ നിന്ന് കടുത്ത അധിക്ഷേപങ്ങളും കഠിനമായ റാഗിങ്ങുമാണ് നേരിട്ടിരുന്നതെന്ന് റാഗിങ് വിരുദ്ധ സമിതിയുടെ അന്വേഷണത്തിൽ വ്യക്തമായിട്ടുള്ളതായി കോളജ് ഡീൻ ജയേഷ് ബ്രഹ്മഭട്ട് ഔദ്യോഗികമായി അറിയിച്ചു.

ഈ ദാരുണമായ സംഭവത്തെ തുടർന്ന് കോളജ് അധികൃതർ കർശന നടപടികളിലേക്ക് കടന്നിട്ടുണ്ട്. റാഗിങ്ങിൽ പങ്കാളികളായതായി കണ്ടെത്തിയ നാല് സീനിയർ വിദ്യാർഥികളെ ആറു മാസത്തേക്കാണ് സസ്പെൻഡ് ചെയ്തിരിക്കുന്നത്. കൂടാതെ ഇവരെ ഹോസ്റ്റലിൽ നിന്നും പുറത്താക്കുകയും ചെയ്തിട്ടുണ്ട്.

ഇതിനുപുറമേ, ഉത്തരവാദിത്തത്തിൽ വീഴ്ച സംഭവിച്ച മൈക്രോബയോളജി വകുപ്പ് അധ്യക്ഷൻ ഉൾപ്പെടെ നാല് അധ്യാപകർക്ക് കോളജ് അധികൃതർ കാരണം കാണിക്കൽ നോട്ടിസും നൽകിയിട്ടുണ്ട്. യുവ ഡോക്ടറുടെ ജീവനെടുത്ത ഈ സംഭവത്തിൽ സർക്കാർ അതീവ ഗൗരവത്തോടെയാണ് ഇടപെട്ടിരിക്കുന്നത്.

സംഭവത്തെക്കുറിച്ച് സമഗ്രവും വിശദവുമായ അന്വേഷണത്തിന് ഉത്തരവിട്ടിട്ടുണ്ടെന്ന് ഗുജറാത്ത് ആരോഗ്യ വകുപ്പുമന്ത്രി പ്രഫുൽ പൻഷെരിയ മാധ്യമങ്ങളോട് വ്യക്തമാക്കി. കാമ്പസുകളിലെ റാഗിങ് തടയുന്നതിൽ കർശന നടപടികൾ സ്വീകരിക്കുമെന്നും കുറ്റക്കാർക്കെതിരെ ശക്തമായ നിയമനടപടികൾ ഉണ്ടാകുമെന്നും അധികൃതർ അറിയിച്ചു.

***(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പർ - 1056, 0471-2552056)***

**
**

### Related Links & Sources
- [Original Story Source](https://truevisionnews.com/news/377881/surat-medical-college-ragging-doctor-suicide-suspended-new)