---
title: "മേഘവിസ്ഫോടനം; ഉത്തരാഖണ്ഡിൽ ഒരു മാസം മുൻപ് നിർമ്മിച്ച പാലം കുത്തിയൊലിച്ച വെള്ളത്തിൽ ഒലിച്ചുപോയി, 10 ഗ്രാമങ്ങൾ ഒറ്റപ്പെട്ടു"
english_title: "Uttarakhand Chamoli Cloudburst: Bridge Washed Away, 10 Villages Cut Off"
publisher: "truevisionnews.com"
canonical_url: "https://truevisionnews.com/news/377857/uttarakhand-chamoli-cloudburst-bridge-washed-away"
published_at: "2026-08-11T06:06:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a7a6ecf43d86_uttarakhand-chamoli-cloudburst-bridge-washed-away.jpg"
keywords: ["Uttarakhand Cloudburst", "Tamak Nala", "Bridge Collapse"]
---

# മേഘവിസ്ഫോടനം; ഉത്തരാഖണ്ഡിൽ ഒരു മാസം മുൻപ് നിർമ്മിച്ച പാലം കുത്തിയൊലിച്ച വെള്ളത്തിൽ ഒലിച്ചുപോയി, 10 ഗ്രാമങ്ങൾ ഒറ്റപ്പെട്ടു

> **Lead Summary:** **ഡെറാഡൂൺ: **ഉത്തരാഖണ്ഡിലെ ചമോലി ജില്ലയിൽ മേഘവിസ്ഫോടനത്തെ തുടർന്ന് വൻ നാശനഷ്ടം. കനത്ത മഴയെ തുടർന്ന് തമാക് നല അരുവിയിൽ ജലനിരപ്പ് ഉയർന്നതോടെ നിതി താഴ്‌വരയിലേക്കുള്ള പ്രധാന പാലം ഒലിച്ചുപോയി. 

## Article Content

**ഡെറാഡൂൺ: **ഉത്തരാഖണ്ഡിലെ ചമോലി ജില്ലയിൽ മേഘവിസ്ഫോടനത്തെ തുടർന്ന് വൻ നാശനഷ്ടം. കനത്ത മഴയെ തുടർന്ന് തമാക് നല അരുവിയിൽ ജലനിരപ്പ് ഉയർന്നതോടെ നിതി താഴ്‌വരയിലേക്കുള്ള പ്രധാന പാലം ഒലിച്ചുപോയി. 

ജ്യോതിർമഠിൽ നിന്ന് 37 കിലോമീറ്റർ അകലെ മലാരി ദേശീയപാതയെ ബന്ധിപ്പിക്കുന്ന പാലമാണ് കുത്തിയൊലിച്ച വെള്ളത്തിൽ തകർന്നത്. ഒരു മാസം മുൻപ് മാത്രം നിർമ്മിച്ച പാലമാണിത്. പാലം തകർന്നതോടെ അതിർത്തി മേഖലയിലെ പത്തിലധികം ഗ്രാമങ്ങളിലേക്കുള്ള ഗതാഗതം പൂർണ്ണമായും തടസ്സപ്പെട്ടു.

മഴക്കാലത്ത് ഈ മേഖല നേരിടുന്ന ദുർബലാവസ്ഥയാണ് സംഭവം വീണ്ടും എടുത്തുകാണിക്കുന്നത്. കഴിഞ്ഞ വർഷവും തമാക് നല കരകവിഞ്ഞൊഴുകിയപ്പോൾ ഇതേ സ്ഥലത്തെ സ്ഥിരം പാലം ഒലിച്ചുപോയിരുന്നു. അരുവി കരകവിയുമ്പോഴെല്ലാം ഇവിടുത്തെ പാലത്തിന് കേടുപാടുകൾ സംഭവിക്കാറുണ്ടെന്ന് നാട്ടുകാർ പറയുന്നു.

അപകടത്തെ തുടർന്ന് ബോർഡർ റോഡ്സ് ഓർഗനൈസേഷനിലെ ഒരു ജീവനക്കാരനെ കാണാതായിട്ടുണ്ട്. എസ്.ഡി.ആർ.എഫ്, എൻ.ഡി.ആർ.എഫ്, ജില്ലാ ഭരണകൂടം എന്നിവയുടെ രക്ഷാസംഘങ്ങൾ സ്ഥലത്തേക്ക് തിരിച്ചിട്ടുണ്ട്. നാശനഷ്ടങ്ങളുടെ കണക്കെടുപ്പ് നടക്കുകയാണെന്ന് അധികൃതർ അറിയിച്ചു.

### Related Links & Sources
- [Original Story Source](https://truevisionnews.com/news/377857/uttarakhand-chamoli-cloudburst-bridge-washed-away)