---
title: "കൊയിലാണ്ടിയിലെ ഗർഭിണിയായ യുവതിയുടെ മരണം: വിഷം നൽകി കൊലപ്പെടുത്തിയെന്ന് ബന്ധുക്കൾ, ഭർത്താവിനെതിരെ ആരോപണം"
english_title: "Koyilandy Pregnant Woman Death: Family Alleges Murder By Husband, Police Probe On"
publisher: "truevisionnews.com"
canonical_url: "https://truevisionnews.com/news/377596/koyilandy-pregnant-woman-death-family-alleges-murder-husband"
published_at: "2026-08-09T12:40:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7828a0ef937_koyilandy-pregnant-woman-death-family-alleges-murder-husband.jpg"
keywords: ["Kozhikode Pregnant Women Death", "Pregnant Women Death", "Kozhikode News", "Shameema Death"]
---

# കൊയിലാണ്ടിയിലെ ഗർഭിണിയായ യുവതിയുടെ മരണം: വിഷം നൽകി കൊലപ്പെടുത്തിയെന്ന് ബന്ധുക്കൾ, ഭർത്താവിനെതിരെ ആരോപണം

> **Lead Summary:** കോഴിക്കോട്: കൊയിലാണ്ടിയിൽ 7 മാസം ഗർഭിണിയായ യുവതിയുടെ മരണം കൊലപാതകമാണെന്ന് ബന്ധുക്കൾ ആരോപിച്ചു. ഭർത്താവ് വിഷം നൽകി കൊലപ്പെടുത്തിയതാണെന്നാണ് സംശയം. പയ്യോളി സ്വദേശി ഷമീമ കഴിഞ്ഞ ദിവസം കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് മരണപ്പെട്ടത്.

## Article Content

കോഴിക്കോട്: കൊയിലാണ്ടിയിൽ 7 മാസം ഗർഭിണിയായ യുവതിയുടെ മരണം കൊലപാതകമാണെന്ന് ബന്ധുക്കൾ ആരോപിച്ചു. ഭർത്താവ് വിഷം നൽകി കൊലപ്പെടുത്തിയതാണെന്നാണ് സംശയം. പയ്യോളി സ്വദേശി ഷമീമ കഴിഞ്ഞ ദിവസം കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് മരണപ്പെട്ടത്.

> "ഭർത്താവ് വിഷം നൽകി കൊലപ്പെടുത്തിയതാണ്" എന്ന് സംശയിക്കുന്നതായി സഹോദരൻ ഷമീം പറഞ്ഞു. ആശുപത്രിയിൽ പ്രവേശിപ്പിച്ച സമയം തന്നെ യുവതി എന്തോ കഴിച്ചിട്ടുണ്ടെന്ന് ഡോക്ടർമാർ സംശയം പ്രകടിപ്പിച്ചിരുന്നു.

വയറ്റിൽ നിന്ന് കറുത്ത നിറത്തിലുള്ള പദാർത്ഥം പുറത്തെടുത്തതായും തലച്ചോറിന് ക്ഷതമേറ്റതായും റിപ്പോർട്ടുകളുണ്ടെന്നും സഹോദരൻ വ്യക്തമാക്കി. 

ഭർത്താവ് മുൻപും ഷമീമയെ വകവരുത്താൻ ശ്രമിച്ചിരുന്നു എന്ന് ബന്ധുക്കൾ പറയുന്നു. ഒന്നര വർഷം മുൻപ് ഇയാൾ ഓട്ടോറിക്ഷ ഇടിപ്പിച്ച് കൊലപ്പെടുത്താൻ നോക്കിയിരുന്നു. അതിൽ ഷമീമയുടെ കൈകാലുകൾക്ക് ഗുരുതരമായി പരിക്കേറ്റിരുന്നതായും സഹോദരൻ വെളിപ്പെടുത്തി.

ഭർത്താവിൽ നിന്ന് നിരന്തരം ശാരീരിക പീഡനവും ഭീഷണിയും നേരിട്ടിരുന്നതായി ഷമീമ സുഹൃത്തിന് അയച്ച ശബ്ദസന്ദേശങ്ങളിൽ പറയുന്നുണ്ട്. സംഭവം പുറത്തുപറഞ്ഞാൽ കൊല്ലുമെന്ന് സഹോദരൻ ഉൾപ്പെടെയുള്ള ബന്ധുക്കൾക്കും ഭർത്താവിൽ നിന്ന് ഭീഷണിയുണ്ടായിരുന്നു എന്ന് കുടുംബം ആരോപിക്കുന്നു.

കഴിഞ്ഞ ദിവസം ഷമീമയുടെ വീട്ടിലെത്തിയ ഭർത്താവ്, ഷമീമയുടെ കൈവശമുണ്ടായിരുന്ന ഫോൺ ആവശ്യപ്പെട്ട് സഹോദരനെ ആക്രമിച്ചിരുന്നു എന്നും ബന്ധുക്കൾ പറഞ്ഞു. നിലവിൽ കൊയിലാണ്ടി പൊലീസ് അസ്വാഭാവിക മരണത്തിന് കേസ് രജിസ്റ്റർ ചെയ്തിട്ടുണ്ട്.

കോഴിക്കോട് മെഡിക്കൽ കോളജിൽ പോസ്റ്റ്മോർട്ടം നടപടികൾ പൂർത്തിയാക്കി വരികയാണ്. പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷം മാത്രമേ മരണകാരണം സംബന്ധിച്ച് വ്യക്തത വരികയുള്ളൂ. സംഭവത്തിൽ സമഗ്രമായ അന്വേഷണം വേണമെന്നും പ്രതിയായ ഭർത്താവിനെതിരെ കർശന നടപടി സ്വീകരിക്കണമെന്നും ബന്ധുക്കൾ ആവശ്യപ്പെട്ടു.

ഗാർഹിക പീഡനത്തിന്റെ പശ്ചാത്തലത്തിൽ സ്ത്രീകളുടെ സുരക്ഷ ഉറപ്പാക്കാൻ കർശന നടപടി വേണമെന്നും നാട്ടുകാർ ആവശ്യപ്പെട്ടു.

### Related Links & Sources
- [Original Story Source](https://truevisionnews.com/news/377596/koyilandy-pregnant-woman-death-family-alleges-murder-husband)