---
title: "കോഴിക്കോട് - വടകര ദേശീയപാത മൂടാടിയിൽ സ്കൂൾ ബസും സ്വകര്യ ബസും കൂട്ടിയിടിച്ച് അപകടം; നാലുപേർക്ക് പരിക്ക്"
english_title: "Kozhikode Vatakara NH Accident School Bus Limited Bus Collide Four Injured"
publisher: "truevisionnews.com"
canonical_url: "https://truevisionnews.com/news/377234/kozhikode-vatakara-nh-accident-school-bus-limited-bus-collision"
published_at: "2026-08-07T13:20:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7591f4b7084_kozhikode-vatakara-nh-accident-school-bus-limited-bus-collision.jpg"
keywords: ["Kozhikode Private Bus Accident", "Bus Accident", "School Bus Accident", "Vatakara NH Road"]
---

# കോഴിക്കോട് - വടകര ദേശീയപാത മൂടാടിയിൽ സ്കൂൾ ബസും സ്വകര്യ ബസും കൂട്ടിയിടിച്ച് അപകടം; നാലുപേർക്ക് പരിക്ക്

> **Lead Summary:** കോഴിക്കോട്: കോഴിക്കോട് - വടകര ദേശീയപാതയിൽ മൂടാടിയിൽ സ്കൂൾ ബസും ദീർഘദൂര ലിമിറ്റഡ് സ്റ്റോപ്പ് ബസും കൂട്ടിയിടിച്ച് നാല് പേർക്ക് പരിക്ക്. ഇന്ന് രാവിലെ 9.30-ഓടെയാണ് അപകടം. മൂടാടി വീമംഗലം യു.പി സ്കൂളിന്റെ ബസിലാണ് കണ്ണൂരിൽ നിന്ന് കോഴിക്കോട്ടേക്ക് പോവുകയായിരുന്ന 'കാവാലം' ലിമിറ്റഡ് സ്റ്റോപ്പ് ബസ് ഇടിച്ചത്.

## Article Content

കോഴിക്കോട്: കോഴിക്കോട് - വടകര ദേശീയപാതയിൽ മൂടാടിയിൽ സ്കൂൾ ബസും ദീർഘദൂര ലിമിറ്റഡ് സ്റ്റോപ്പ് ബസും കൂട്ടിയിടിച്ച് നാല് പേർക്ക് പരിക്ക്. ഇന്ന് രാവിലെ 9.30-ഓടെയാണ് അപകടം. മൂടാടി വീമംഗലം യു.പി സ്കൂളിന്റെ ബസിലാണ് കണ്ണൂരിൽ നിന്ന് കോഴിക്കോട്ടേക്ക് പോവുകയായിരുന്ന 'കാവാലം' ലിമിറ്റഡ് സ്റ്റോപ്പ് ബസ് ഇടിച്ചത്.

സ്കൂളിലെ കുട്ടികളെ ഇറക്കിയ ശേഷം ബസ് റോഡരികിലേക്ക് മാറ്റുന്നതിനിടെയാണ് അപകടം സംഭവിച്ചതെന്ന് ദൃക്സാക്ഷികൾ പറഞ്ഞു.  അപകടത്തിൽ സ്കൂൾ ബസ് ഡ്രൈവർക്കും ലിമിറ്റഡ് ബസിലെ മൂന്ന് യാത്രക്കാർക്കുമാണ് പരിക്കേറ്റത്. സ്കൂൾ ബസ് ഡ്രൈവറായ പാലക്കുളം സ്വദേശി ബാബുരാജിന് തലയ്ക്ക് സാരമായ പരിക്കേറ്റു. ഇദ്ദേഹത്തെ ഉടൻ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു.

ലിമിറ്റഡ് ബസിലുണ്ടായിരുന്ന ഒരു വയോധികന്റെ കൈവിരലിന് ഗുരുതരമായി പരിക്കേറ്റു. പ്രാഥമിക ചികിത്സയ്ക്ക് ശേഷം ഇദ്ദേഹത്തെ വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. ബസിലെ മറ്റ് രണ്ട് യാത്രക്കാർക്കും നിസാര പരിക്കുകളുണ്ട്. ഇവരിൽ ഒരു പെൺകുട്ടിക്ക് കൈയ്ക്ക് പരിക്കേറ്റിട്ടുണ്ട്.

ലിമിറ്റഡ് ബസ് അമിതവേഗതയിലായിരുന്നുവെന്നാണ് നാട്ടുകാരുടെ ആരോപണം. സ്കൂൾ ബസ് റോഡരികിലേക്ക് ഒതുക്കുന്ന സമയം നോക്കാതെയാണ് ബസ് വന്നിടിച്ചതെന്നും ദൃക്സാക്ഷികൾ പറഞ്ഞു. അപകടവിവരം അറിഞ്ഞ് ഉടൻ തന്നെ നാട്ടുകാരും പോലീസും സ്ഥലത്തെത്തി രക്ഷാപ്രവർത്തനം നടത്തി. പരിക്കേറ്റവരെ ആംബുലൻസിൽ ആശുപത്രികളിലെത്തിച്ചു.

അപകടത്തെ തുടർന്ന് ദേശീയപാതയിൽ ഏകദേശം അരമണിക്കൂറോളം ഗതാഗതം തടസ്സപ്പെട്ടു. തകർന്ന വാഹനങ്ങൾ മാറ്റിയ ശേഷമാണ് ഗതാഗതം പുനഃസ്ഥാപിച്ചത്. സംഭവത്തിൽ വടകര പോലീസ് കേസെടുത്ത് അന്വേഷണം ആരംഭിച്ചു. ലിമിറ്റഡ് ബസിന്റെ രേഖകളും ഡ്രൈവറുടെ ലൈസൻസും പോലീസ് പരിശോധിച്ചു.

സ്കൂൾ സമയത്തെ ദേശീയപാതയിലെ അപകടങ്ങൾ ആവർത്തിക്കുന്നത് രക്ഷിതാക്കൾക്കിടയിൽ വലിയ ആശങ്കയാണ് ഉണ്ടാക്കുന്നത്. ഈ ഭാഗത്ത് വേഗപരിധി കർശനമായി നിയന്ത്രിക്കണമെന്നും സുരക്ഷാ ക്രമീകരണങ്ങൾ ശക്തമാക്കണമെന്നും നാട്ടുകാർ ആവശ്യപ്പെട്ടു.

### Related Links & Sources
- [Original Story Source](https://truevisionnews.com/news/377234/kozhikode-vatakara-nh-accident-school-bus-limited-bus-collision)