---
title: "'ക്യാമ്പിൽ താമസിക്കണമെന്ന നിബന്ധനയില്ല, വെള്ളം കയറിയ വീടുകൾക്ക് 10,000 രൂപ ധനസഹായം' -റവന്യൂമന്ത്രി എ.പി. അനിൽകുമാർ"
english_title: "Kerala Flood Relief 10000 Aid For Flooded Houses Revenue Minister AP Anil Kumar"
publisher: "truevisionnews.com"
canonical_url: "https://truevisionnews.com/news/377139/kerala-flood-relief-10000-aid-flooded-houses-ap-anil-kumar"
published_at: "2026-08-07T06:27:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a752e6d69285_kerala-flood-relief-10000-aid-flooded-houses-ap-anil-kumar.jpg"
keywords: ["Kerala Rain", "Kerala Floods", "Relief Fund", "AP Anil Kumar", "Changanassery Disaster Relief"]
---

# 'ക്യാമ്പിൽ താമസിക്കണമെന്ന നിബന്ധനയില്ല, വെള്ളം കയറിയ വീടുകൾക്ക് 10,000 രൂപ ധനസഹായം' -റവന്യൂമന്ത്രി എ.പി. അനിൽകുമാർ

> **Lead Summary:** **കോട്ടയം: **പ്രകൃതിക്ഷോഭത്തെത്തുടർന്ന് വീടുകളിൽ വെള്ളം കയറിയ എല്ലാ കുടുംബങ്ങൾക്കും 10,000 രൂപ ധനസഹായം നൽകുമെന്ന് റവന്യൂമന്ത്രി എ.പി. അനിൽകുമാർ അറിയിച്ചു. ദുരിതാശ്വാസ ക്യാമ്പിൽ താമസിക്കുന്നവർക്ക് മാത്രമല്ല ഈ സഹായം ലഭിക്കുകയെന്നും മന്ത്രി വ്യക്തമാക്കി. ചങ്ങനാശേരി താലൂക്കിലെ ദുരിതാശ്വാസ ക്യാമ്പുകൾ സന്ദർശിച്ച ശേഷം സംസാരിക്കുകയായിരുന്നു അദ്ദേഹം.

## Article Content

**കോട്ടയം: **പ്രകൃതിക്ഷോഭത്തെത്തുടർന്ന് വീടുകളിൽ വെള്ളം കയറിയ എല്ലാ കുടുംബങ്ങൾക്കും 10,000 രൂപ ധനസഹായം നൽകുമെന്ന് റവന്യൂമന്ത്രി എ.പി. അനിൽകുമാർ അറിയിച്ചു. ദുരിതാശ്വാസ ക്യാമ്പിൽ താമസിക്കുന്നവർക്ക് മാത്രമല്ല ഈ സഹായം ലഭിക്കുകയെന്നും മന്ത്രി വ്യക്തമാക്കി. ചങ്ങനാശേരി താലൂക്കിലെ ദുരിതാശ്വാസ ക്യാമ്പുകൾ സന്ദർശിച്ച ശേഷം സംസാരിക്കുകയായിരുന്നു അദ്ദേഹം.

വെള്ളം കയറിയ വീടുകളിലെ താമസക്കാർ എവിടെ താമസിക്കുന്നുവെന്നത് പ്രശ്നമല്ല. അർഹതയുണ്ടെങ്കിൽ എല്ലാവർക്കും സഹായം ലഭിക്കും. ക്യാമ്പിൽ താമസിക്കണമെന്ന നിബന്ധന ഇല്ല. വ്യാപാരസ്ഥാപനങ്ങളിൽ വെള്ളം കയറിയ വ്യാപാരികൾക്കും 10,000 രൂപ ധനസഹായം നൽകാൻ സർക്കാർ തീരുമാനിച്ചിട്ടുണ്ട്.

അർഹരായ ഒരാൾക്കും സഹായം നിഷേധിക്കപ്പെടില്ല. നാശനഷ്ടങ്ങളുടെ കണക്കെടുപ്പ് അതിവേഗം പൂർത്തിയാക്കാൻ നിർദേശം നൽകിയിട്ടുണ്ട്. പൂർണമായും തകർന്ന വീടുകൾ, ഭാഗികമായി തകർന്ന വീടുകൾ എന്നിവയുൾപ്പെടെ എല്ലാ നഷ്ടങ്ങളും കൃത്യമായി രേഖപ്പെടുത്തും.

നദികളിൽ അടിഞ്ഞുകൂടിയ മണ്ണും മണലും നീക്കം ചെയ്ത് ജലത്തിന്റെ ഒഴുക്ക് വർധിപ്പിക്കുന്ന നടപടികൾ മഴ കുറഞ്ഞ ഉടൻ ആരംഭിക്കും. 2018ലെ പ്രളയത്തിന് ശേഷം സ്വീകരിച്ച പ്രതിരോധ നടപടികളുടെ ഫലപ്രാപ്തി വിശദമായി വിലയിരുത്തുമെന്നും മന്ത്രി പറഞ്ഞു.

ചങ്ങനാശേരി, ചെങ്ങന്നൂർ, തിരുവല്ല എന്നിവിടങ്ങളിലെ ദുരിതാശ്വാസ ക്യാമ്പുകൾ മന്ത്രി സന്ദർശിച്ചു. ക്യാമ്പുകളിലെ ഭക്ഷണം, കുടിവെള്ളം, ചികിത്സ, സുരക്ഷ എന്നിവ തൃപ്തികരമാണെന്ന് വിലയിരുത്തി. ജില്ലാ ഭരണകൂടം, ജനപ്രതിനിധികൾ, സന്നദ്ധ സംഘടനകൾ എന്നിവരുടെ ഏകോപനത്തോടെയുള്ള പ്രവർത്തനത്തെ മന്ത്രി അഭിനന്ദിച്ചു.

ചങ്ങനാശേരി ളായിക്കാട് സെൻറ് ജോസഫ്സ് എൽ.പി. സ്കൂൾ, മുനിസിപ്പൽ ടൗൺഹാൾ ക്യാമ്പുകൾ സന്ദർശിച്ച മന്ത്രി അന്തേവാസികളുമായി സംവദിച്ചു. വിനു ജോബ് കുഴിമണ്ണിൽ എം.എൽ.എ, എ.ഡി.എം സോളി ആൻറണി എന്നിവർ ഒപ്പമുണ്ടായിരുന്നു.

### Related Links & Sources
- [Original Story Source](https://truevisionnews.com/news/377139/kerala-flood-relief-10000-aid-flooded-houses-ap-anil-kumar)