---
title: "മുഖ്യമന്ത്രിയെ അപകീർത്തിപ്പെടുത്തുന്ന ഫേയ്സ്ബുക്ക് പോസ്റ്റ്; ബേപ്പൂർ സ്വദേശി സൈബർ പൊലീസിന്റെ പിടിയിൽ"
english_title: "Kozhikode Youth Arrested for Defamatory Facebook Comment Against CM VD Satheesan"
publisher: "truevisionnews.com"
canonical_url: "https://truevisionnews.com/news/377104/kozhikode-bepur-nithin-kakkedath-arrested-facebook-comment-vd-satheesan"
published_at: "2026-08-06T19:47:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7497aa89743_kozhikode-bepur-nithin-kakkedath-arrested-facebook-comment-vd-satheesan.jpg"
keywords: ["Defamation Case", "Cyber Police Kozhikode", "Facebook Post", "Chief Minister", "VD Satheesan"]
---

# മുഖ്യമന്ത്രിയെ അപകീർത്തിപ്പെടുത്തുന്ന ഫേയ്സ്ബുക്ക് പോസ്റ്റ്; ബേപ്പൂർ സ്വദേശി സൈബർ പൊലീസിന്റെ പിടിയിൽ

> **Lead Summary:** കോഴിക്കോട്: സാമൂഹ്യ മാധ്യമത്തിലൂടെ മുഖ്യമന്ത്രിയെ അപകീർത്തിപ്പെടുത്തിയെന്ന കേസിൽ ബേപ്പൂർ സ്വദേശിയായ യുവാവിനെ കോഴിക്കോട് സൈബർ പൊലീസ് അറസ്റ്റ് ചെയ്തു. ബേപ്പൂർ കക്കേടം സ്വദേശി നിതിൻ എന്ന 28 കാരനെയാണ് അറസ്റ്റ് ചെയ്തത്.

## Article Content

കോഴിക്കോട്: സാമൂഹ്യ മാധ്യമത്തിലൂടെ മുഖ്യമന്ത്രിയെ അപകീർത്തിപ്പെടുത്തിയെന്ന കേസിൽ ബേപ്പൂർ സ്വദേശിയായ യുവാവിനെ കോഴിക്കോട് സൈബർ പൊലീസ് അറസ്റ്റ് ചെയ്തു. ബേപ്പൂർ കക്കേടം സ്വദേശി നിതിൻ എന്ന 28 കാരനെയാണ് അറസ്റ്റ് ചെയ്തത്.

മുഖ്യമന്ത്രി വി.ഡി. സതീശന്റെ ഹെലികോപ്റ്റർ യാത്രയുമായി ബന്ധപ്പെട്ട് ഫേസ്ബുക്കിൽ മോശം പരാമർശം നടത്തിയെന്നാണ് കേസ്.

ബേപ്പൂർ ബ്ലോക്ക് കോൺഗ്രസ് കമ്മിറ്റി അംഗം നൽകിയ പരാതിയുടെ അടിസ്ഥാനത്തിലാണ് സൈബർ പൊലീസ് കേസ് രജിസ്റ്റർ ചെയ്തത്. കമന്റ് സമൂഹത്തിൽ ഭിന്നതയുണ്ടാക്കാനും പൊതുസമാധാനം തകർക്കാനും ഉദ്ദേശിച്ചുള്ളതാണെന്ന് പരാതിക്കാരൻ ആരോപിച്ചു.

പരാതി ലഭിച്ചയുടൻ കോഴിക്കോട് സൈബർ ക്രൈം പൊലീസ് സ്റ്റേഷനിലെ സംഘം നിതിന്റെ ഫേസ്ബുക്ക് പ്രൊഫൈൽ പരിശോധിച്ചു. സാങ്കേതിക പരിശോധനയിൽ വിവാദ കമന്റ് പോസ്റ്റ് ചെയ്തത് നിതിൻ തന്നെയാണെന്ന് സ്ഥിരീകരിച്ചു.

> "പൊതു സമൂഹത്തിൽ ലഹളയുണ്ടാക്കണമെന്ന ഉദ്ദേശത്തോടെ" കമന്റ് ഇട്ടുവെന്നാണ് എഫ്ഐആറിൽ രേഖപ്പെടുത്തിയിരിക്കുന്നത്. ഇന്ത്യൻ ശിക്ഷാ നിയമത്തിലെയും ഐടി ആക്ടിലെയും പ്രസക്ത വകുപ്പുകൾ പ്രകാരമാണ് കേസെടുത്തിരിക്കുന്നത്.

കോഴിക്കോട് സൈബർ എസിപിയുടെ നേതൃത്വത്തിലുള്ള പ്രത്യേക സംഘമാണ് നിതിനെ ബേപ്പൂരിലെ വീട്ടിൽ നിന്ന് കസ്റ്റഡിയിലെടുത്തത്. ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തി കോടതിയിൽ ഹാജരാക്കി.

സാമൂഹ്യ മാധ്യമങ്ങളിലൂടെ ജനപ്രതിനിധികൾക്കും ഭരണഘടനാ സ്ഥാനങ്ങളിൽ ഇരിക്കുന്നവർക്കുമെതിരെ അപകീർത്തികരമായ പ്രചരണങ്ങൾ നടത്തുന്നവർക്കെതിരെ കർശന നടപടി സ്വീകരിക്കുമെന്ന് സൈബർ പൊലീസ് അറിയിച്ചു. അഭിപ്രായ സ്വാതന്ത്ര്യം എന്ന പേരിൽ വ്യക്തിപരമായ അധിക്ഷേപങ്ങളും വ്യാജപ്രചരണങ്ങളും അനുവദിക്കാനാവില്ലെന്ന് അധികൃതർ വ്യക്തമാക്കി.

അത്തരം പോസ്റ്റുകൾ നിയമപ്രശ്നങ്ങൾക്ക് വഴിവെക്കുമെന്നും യുവാക്കൾ സാമൂഹ്യ മാധ്യമങ്ങൾ ഉപയോഗിക്കുമ്പോൾ ജാഗ്രത പാലിക്കണമെന്നും പൊലീസ് മുന്നറിയിപ്പ് നൽകി. അറസ്റ്റ് വിവരം അറിഞ്ഞതോടെ പ്രദേശത്ത് രാഷ്ട്രീയ പ്രവർത്തകരും നാട്ടുകാരും വിവിധ പ്രതികരണങ്ങളുമായി രംഗത്തെത്തി.

### Related Links & Sources
- [Original Story Source](https://truevisionnews.com/news/377104/kozhikode-bepur-nithin-kakkedath-arrested-facebook-comment-vd-satheesan)