---
title: "എംഎൽഎ അബിൻ വർക്കി സഞ്ചരിച്ച വാഹനം അപകടത്തിൽപ്പെട്ടു, എംഎൽഎയ്ക്ക് പരിക്ക്; അപകടം പ്രളയ ദുരിതാശ്വാസ പ്രവർത്തനങ്ങൾ കഴിഞ്ഞ് മടങ്ങവെ "
english_title: "Pathanamthitta Aranmula MLA Abin Varkey Car Accident Injured"
publisher: "truevisionnews.com"
canonical_url: "https://truevisionnews.com/news/376683/pathanamthitta-aranmula-mla-abin-varkey-car-accident"
published_at: "2026-08-05T06:12:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a7286f992b6c_pathanamthitta-aranmula-mla-abin-varghese-car-accident.jpg"
keywords: ["Aranmula MLA Accident", "Abin Varkey", "Pathanamthitta Accident", "Kerala Rain"]
---

# എംഎൽഎ അബിൻ വർക്കി സഞ്ചരിച്ച വാഹനം അപകടത്തിൽപ്പെട്ടു, എംഎൽഎയ്ക്ക് പരിക്ക്; അപകടം പ്രളയ ദുരിതാശ്വാസ പ്രവർത്തനങ്ങൾ കഴിഞ്ഞ് മടങ്ങവെ 

> **Lead Summary:** **പത്തനംതിട്ട: **ആറന്മുള എംഎൽഎ അബിൻ വർക്കി സഞ്ചരിച്ചിരുന്ന കാർ അപകടത്തിൽപ്പെട്ടു. പത്തനംതിട്ട ഓമല്ലൂർ ഷട്ടർ മുക്കിൽ വച്ചായിരുന്നു സംഭവം. അപകടത്തിൽ എംഎൽഎയ്ക്കും വാഹനത്തിലുണ്ടായിരുന്നവർക്കും നിസാര പരിക്കുകൾ മാത്രമേയുള്ളൂ.

## Article Content

**പത്തനംതിട്ട: **ആറന്മുള എംഎൽഎ അബിൻ വർക്കി സഞ്ചരിച്ചിരുന്ന കാർ അപകടത്തിൽപ്പെട്ടു. പത്തനംതിട്ട ഓമല്ലൂർ ഷട്ടർ മുക്കിൽ വച്ചായിരുന്നു സംഭവം. അപകടത്തിൽ എംഎൽഎയ്ക്കും വാഹനത്തിലുണ്ടായിരുന്നവർക്കും നിസാര പരിക്കുകൾ മാത്രമേയുള്ളൂ.

പ്രളയ ദുരിതാശ്വാസ പ്രവർത്തനങ്ങളിൽ പങ്കെടുത്ത ശേഷം താമസസ്ഥലത്തേക്ക് മടങ്ങും വഴിയായിരുന്നു അപകടം. ദൃക്‌സാക്ഷികളുടെ മൊഴി പ്രകാരം ഓമല്ലൂർ ഷട്ടർ മുക്കിൽ വച്ച് എതിർദിശയിൽ നിന്ന് വന്ന മറ്റൊരു കാർ അബിൻ വർക്കി സഞ്ചരിച്ചിരുന്ന കാറിലേക്ക് വന്നിടിക്കുകയായിരുന്നു.

ഇടിയുടെ ആഘാതത്തിൽ രണ്ട് കാറുകൾക്കും മുൻഭാഗത്ത് കേടുപാടുകൾ സംഭവിച്ചു. സംഭവസമയം എംഎൽഎയുടെ കൂടെ പാർട്ടി പ്രവർത്തകരും ഉണ്ടായിരുന്നു. പരിക്കേറ്റവരെ ഉടൻ നാട്ടുകാരും പോലീസും ചേർന്ന് സമീപത്തെ ആശുപത്രിയിൽ എത്തിച്ചു. പ്രാഥമിക ചികിത്സയ്ക്ക് ശേഷം എല്ലാവരും ആശുപത്രി വിട്ടു. ആരുടെയും പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു.

അപകടത്തിൽ പത്തനംതിട്ട പോലീസ് കേസെടുത്ത് അന്വേഷണം ആരംഭിച്ചു. മറ്റേ കാറിന്റെ ഡ്രൈവർക്ക് വീഴ്ചയുണ്ടായോ എന്നതടക്കം പോലീസ് പരിശോധിക്കുന്നുണ്ട്. കഴിഞ്ഞ ദിവസങ്ങളിൽ സംസ്ഥാനത്ത് ശക്തമായ മഴയെ തുടർന്ന് പത്തനംതിട്ടയിൽ പ്രളയ ദുരിതാശ്വാസ പ്രവർത്തനങ്ങൾ പുരോഗമിക്കുകയാണ്.

ഇതിന്റെ ഭാഗമായി വിവിധ പ്രദേശങ്ങൾ സന്ദർശിച്ച ശേഷം മടങ്ങുമ്പോഴാണ് അപകടമുണ്ടായത്. സംഭവമറിഞ്ഞ് കോൺഗ്രസ് പ്രവർത്തകരും നേതാക്കളും ആശുപത്രിയിലെത്തി. എംഎൽഎ സുഖമായിരിക്കുന്നുവെന്നും ആശങ്കപ്പെടേണ്ടതില്ലെന്നും പാർട്ടി നേതൃത്വം അറിയിച്ചു. റോഡിൽ വെള്ളക്കെട്ടും വഴുക്കലും ഉള്ളതിനാൽ വാഹനങ്ങൾ സൂക്ഷിച്ച് ഓടിക്കണമെന്ന് പോലീസ് മുന്നറിയിപ്പ് നൽകി. അപകടത്തെ തുടർന്ന് കുറച്ചുനേരം ഓമല്ലൂർ ഭാഗത്തെ ഗതാഗതം തടസപ്പെട്ടിരുന്നു.

### Related Links & Sources
- [Original Story Source](https://truevisionnews.com/news/376683/pathanamthitta-aranmula-mla-abin-varkey-car-accident)