---
title: "വയലിൽ വെള്ളം കയറിയത് കാണാൻ പോയി; കോഴിക്കോട്  കാൽവഴുതി വെള്ളക്കെട്ടിൽ വീണ് ചികിത്സയിലായിരുന്ന യുവാവ് മരിച്ചു"
english_title: "Kozhikode Youth Suhail Dies After Falling Into Waterlogged Field in Peruvayal"
publisher: "truevisionnews.com"
canonical_url: "https://truevisionnews.com/news/376568/kozikhode-peruvayal-youth-suhail-dies-waterlogged-field"
published_at: "2026-08-04T14:15:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a71a6d643a9d_kozikhode-peruvayal-youth-suhail-dies-waterlogged-field.jpg"
keywords: ["Kerala Rain", "Accident", "Youth Death", "Kozhikode  News"]
---

# വയലിൽ വെള്ളം കയറിയത് കാണാൻ പോയി; കോഴിക്കോട്  കാൽവഴുതി വെള്ളക്കെട്ടിൽ വീണ് ചികിത്സയിലായിരുന്ന യുവാവ് മരിച്ചു

> **Lead Summary:** കോഴിക്കോട്: വെള്ളക്കെട്ടിൽ വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരിച്ചു. പെരുവയൽ കൊണാറമ്പ് സ്വദേശി സുഹൈലാണ് മരിച്ചത്. 38 വയസായിരുന്നു.

## Article Content

കോഴിക്കോട്: വെള്ളക്കെട്ടിൽ വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരിച്ചു. പെരുവയൽ കൊണാറമ്പ് സ്വദേശി സുഹൈലാണ് മരിച്ചത്. 38 വയസായിരുന്നു.

ശനിയാഴ്ച രാത്രി 10 മണിയോടെയായിരുന്നു അപകടം. വീടിനോട് ചേർന്നുള്ള വയലിൽ വെള്ളം കയറിയ വിവരം അറിയാനാണ് സുഹൈൽ സുഹൃത്തുക്കൾക്കൊപ്പം സ്ഥലത്തെത്തിയത്. കഴിഞ്ഞ ദിവസങ്ങളിലെ ശക്തമായ മഴയെ തുടർന്ന് സമീപത്തുള്ള ചെറുപുഴ കരകവിയുകയും വലിയ തോതിൽ വെള്ളം വയലിലേക്ക് ഒഴുകിയെത്തുകയും ചെയ്തിരുന്നു.

വെള്ളം കയറിയ നില കാണുന്നതിനിടെ കാൽവഴുതി സുഹൈൽ വയലിലെ ആഴമുള്ള വെള്ളക്കെട്ടിലേക്ക് വീഴുകയായിരുന്നു. ഉടൻതന്നെ ഒപ്പമുണ്ടായിരുന്ന സുഹൃത്തുക്കളും സമീപത്തെ നാട്ടുകാരും ചേർന്ന് രക്ഷാപ്രവർത്തനം ആരംഭിച്ചെങ്കിലും ഇരുട്ടും ചെളിയും കാരണം ഏറെനേരം കഴിഞ്ഞാണ് സുഹൈലിനെ കണ്ടെത്താൻ സാധിച്ചത്.

ഉടൻ തന്നെ ആദ്യം കോഴിക്കോട് മെഡിക്കൽ കോളേജ് ആശുപത്രിയിലേക്ക് കൊണ്ടുപോയി. പ്രാഥമിക ചികിത്സയ്ക്ക് ശേഷം നില ഗുരുതരമായതിനെ തുടർന്ന് കൂടുതൽ ചികിത്സയ്ക്കായി സ്വകാര്യ ആശുപത്രിയിലേക്ക് മാറ്റി. വെള്ളത്തിൽ മുങ്ങിയതുമൂലം ശ്വാസകോശത്തിനും മറ്റ് ആന്തരിക അവയവങ്ങൾക്കും ഗുരുതരമായ പരിക്കുകൾ സംഭവിച്ചിരുന്നു.

മൂന്ന് ദിവസമായി തീവ്രപരിചരണ വിഭാഗത്തിൽ ചികിത്സയിലായിരുന്ന സുഹൈൽ ചൊവ്വാഴ്ച രാവിലെയോടെ മരണത്തിന് കീഴടങ്ങി.സംഭവത്തിൽ നാട് ഞെട്ടലിലാണ്. യുവാവിന്റെ മരണത്തിൽ പെരുവയൽ, കൊണാറമ്പ് പ്രദേശങ്ങളിൽ ദുഃഖാചരണം.

കനത്ത മഴയെ തുടർന്ന് ജില്ലയിൽ താഴ്ന്ന പ്രദേശങ്ങളിൽ വ്യാപകമായി വെള്ളക്കെട്ട് രൂപപ്പെട്ടിട്ടുണ്ട്. ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.

### Related Links & Sources
- [Original Story Source](https://truevisionnews.com/news/376568/kozikhode-peruvayal-youth-suhail-dies-waterlogged-field)