---
title: "അവധി നൽകിയത് കണ്ടില്ലേ....? കളക്ടറുടെ ഉത്തരവ് മറികടന്ന് കണ്ണൂരിലെ ചിന്മയ വിദ്യാലയം; കുട്ടികളെത്തിയതിനാൽ ഉച്ചവരെ പ്രവർത്തിക്കുമെന്ന് അധികൃതർ"
english_title: "Kannur Chinmaya School Violates Collector Order Opens During Red Alert"
publisher: "truevisionnews.com"
canonical_url: "https://truevisionnews.com/news/375919/kannur-chinmaya-school-violates-red-alert-holiday-order"
published_at: "2026-08-01T11:27:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a6d4570e9be9_kerala-heavy-rain-school-college-holiday-4-districts-red-alert.jpg"
keywords: ["Red Alert", "Chinmaya School", "Holiday", "Kannur Collector", "Holiday Oder"]
---

# അവധി നൽകിയത് കണ്ടില്ലേ....? കളക്ടറുടെ ഉത്തരവ് മറികടന്ന് കണ്ണൂരിലെ ചിന്മയ വിദ്യാലയം; കുട്ടികളെത്തിയതിനാൽ ഉച്ചവരെ പ്രവർത്തിക്കുമെന്ന് അധികൃതർ

> **Lead Summary:** **കണ്ണൂർ: **ജില്ലാ കളക്ടറുടെ അവധി ഉത്തരവ് മറികടന്ന് കണ്ണൂർ ചാലയിലെ ചിന്മയ വിദ്യാലയം തുറന്ന് പ്രവർത്തിച്ചു. ജില്ലയിൽ റെഡ് അലേർട്ട് പ്രഖ്യാപിച്ച സാഹചര്യത്തിലാണ് കളക്ടർ ഇന്ന് രാവിലെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചത്. എന്നാൽ കുട്ടികൾ സ്കൂളിലെത്തിയിരുന്നു എന്ന കാരണം ചൂണ്ടിക്കാട്ടിയാണ് ചിന്മയ വിദ്യാലയം ഉച്ചവരെ പ്രവർത്തിപ്പിച്ചത്. സ്കൂൾ അധികൃതരാണ് ഇക്കാര്യം അറിയിച്ചത്.

## Article Content

**കണ്ണൂർ: **ജില്ലാ കളക്ടറുടെ അവധി ഉത്തരവ് മറികടന്ന് കണ്ണൂർ ചാലയിലെ ചിന്മയ വിദ്യാലയം തുറന്ന് പ്രവർത്തിച്ചു. ജില്ലയിൽ റെഡ് അലേർട്ട് പ്രഖ്യാപിച്ച സാഹചര്യത്തിലാണ് കളക്ടർ ഇന്ന് രാവിലെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചത്. എന്നാൽ കുട്ടികൾ സ്കൂളിലെത്തിയിരുന്നു എന്ന കാരണം ചൂണ്ടിക്കാട്ടിയാണ് ചിന്മയ വിദ്യാലയം ഉച്ചവരെ പ്രവർത്തിപ്പിച്ചത്. സ്കൂൾ അധികൃതരാണ് ഇക്കാര്യം അറിയിച്ചത്.

കനത്ത മഴയ്ക്ക് സാധ്യതയുള്ളതിനെ തുടർന്ന് കണ്ണൂർ ജില്ലയിൽ ഇന്ന് അടിയന്തരമായി റെഡ് അലേർട്ട് പ്രഖ്യാപിച്ചിരുന്നു. ഇതിന്റെ അടിസ്ഥാനത്തിലാണ് ജില്ലാ കളക്ടർ അവധി ഉത്തരവിറക്കിയത്. പ്രൊഫഷണൽ കോളേജുകൾ, സ്കൂളുകൾ, അങ്കണവാടികൾ, ട്യൂഷൻ സെന്ററുകൾ, ഐസിഎസ്ഇ, സിബിഎസ്ഇ സ്കൂളുകൾ, കേന്ദ്രീയ വിദ്യാലയങ്ങൾ, മദ്രസകൾ ഉൾപ്പെടെയുള്ള മതവിദ്യാഭ്യാസ സ്ഥാപനങ്ങൾ എന്നിവയ്ക്കെല്ലാം അവധി ബാധകമായിരുന്നു.

റസിഡൻഷ്യൽ സ്കൂളുകൾക്ക് അവധി ബാധകമല്ല. മുൻകൂട്ടി നിശ്ചയിച്ച സർവകലാശാല, പൊതു പരീക്ഷകൾക്കും അഭിമുഖങ്ങൾക്കും മാറ്റമുണ്ടാകില്ലെന്നും കളക്ടറുടെ ഉത്തരവിൽ വ്യക്തമാക്കിയിരുന്നു. റെഡ് അലേർട്ട് നിലനിൽക്കുന്ന സാഹചര്യത്തിൽ വിദ്യാർത്ഥികളുടെ സുരക്ഷ കണക്കിലെടുത്താണ് അവധി പ്രഖ്യാപിച്ചത്.

എന്നാൽ ചിന്മയ വിദ്യാലയം ഉത്തരവ് ലംഘിച്ച് പ്രവർത്തിച്ചത് ജില്ലാ ഭരണകൂടത്തിന്റെ ശ്രദ്ധയിൽപ്പെട്ടിട്ടുണ്ട്. കുട്ടികൾ എത്തിയതിന് ശേഷമാണ് അവധി പ്രഖ്യാപനം അറിഞ്ഞതെന്നും അതിനാൽ ഉച്ചവരെ ക്ലാസുകൾ നടത്തി പിന്നീട് വിട്ടയക്കുമെന്നുമാണ് സ്കൂൾ അധികൃതരുടെ ന്യായീകരണം.

കനത്ത മഴയും ശക്തമായ കാറ്റും തുടരുന്ന സാഹചര്യത്തിൽ ജില്ലയിലെ താഴ്ന്ന പ്രദേശങ്ങളിലും മലയോര മേഖലകളിലും ജാഗ്രതാ നിർദേശം നൽകിയിട്ടുണ്ട്. വിദ്യാഭ്യാസ സ്ഥാപനങ്ങൾക്ക് അവധി നൽകിയത് അപകടങ്ങൾ ഒഴിവാക്കുന്നതിനു വേണ്ടിയാണെന്ന് അധികൃതർ അറിയിച്ചു.

അവധി ദിവസങ്ങളിൽ സ്ഥാപനങ്ങൾ തുറന്ന് പ്രവർത്തിക്കുന്നുണ്ടോ എന്ന് പരിശോധിക്കാൻ വിദ്യാഭ്യാസ വകുപ്പ് ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. ഉത്തരവ് ലംഘിക്കുന്ന സ്ഥാപനങ്ങൾക്കെതിരെ നടപടിയുണ്ടാകുമെന്നും ജില്ലാ ഭരണകൂടം മുന്നറിയിപ്പ് നൽകി.

### Related Links & Sources
- [Original Story Source](https://truevisionnews.com/news/375919/kannur-chinmaya-school-violates-red-alert-holiday-order)