---
title: "പിഎം ശ്രീ പദ്ധതി; ബിജെപി തെളിച്ച വഴിയേ പോകാൻ തുനിഞ്ഞിറങ്ങിയ കേരളത്തിലെ കോൺഗ്രസിൽ നിന്ന് മറ്റൊന്നും പ്രതീക്ഷിക്കാനില്ലെന്ന് ബിനോയ് വിശ്വം"
english_title: "CPI Slams UDF Over PM Shri, Says Centre Confirmed No Fund Taken by Kerala"
publisher: "truevisionnews.com"
canonical_url: "https://truevisionnews.com/news/375586/cpi-binoy-viswam-udf-pm-shri-centre-reply-rajya-sabha"
published_at: "2026-07-30T17:56:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a6b43bbf325a_cpi-binoy-viswam-udf-pm-shri-centre-reply-rajya-sabha.jpg"
keywords: ["PM Shri Scheme", "CPI", "Binoy Viswam", "UDF Government"]
---

# പിഎം ശ്രീ പദ്ധതി; ബിജെപി തെളിച്ച വഴിയേ പോകാൻ തുനിഞ്ഞിറങ്ങിയ കേരളത്തിലെ കോൺഗ്രസിൽ നിന്ന് മറ്റൊന്നും പ്രതീക്ഷിക്കാനില്ലെന്ന് ബിനോയ് വിശ്വം

> **Lead Summary:** തിരുവനന്തപുരം: പിഎം ശ്രീ പദ്ധതിയുടെ കാര്യത്തിൽ ബിജെപിയുടെ ബി ടീമാണ് കേരളത്തിലെ യുഡിഎഫ് എന്ന് ഒരിക്കൽ കൂടി തെളിഞ്ഞതായി സിപിഐ സംസ്ഥാന സെക്രട്ടറി ബിനോയ് വിശ്വം. പദ്ധതിയിൽ കേരളം ഒപ്പിട്ട് ഫണ്ട് വാങ്ങിയെന്ന മുഖ്യമന്ത്രിയുടെയും വിദ്യാഭ്യാസ മന്ത്രിയുടെയും വാദം കളവാണെന്ന് കേന്ദ്ര സർക്കാർ രാജ്യസഭയിൽ നൽകിയ മറുപടിയോടെ വ്യക്തമായതായും അദ്ദേഹം പറഞ്ഞു.

## Article Content

തിരുവനന്തപുരം: പിഎം ശ്രീ പദ്ധതിയുടെ കാര്യത്തിൽ ബിജെപിയുടെ ബി ടീമാണ് കേരളത്തിലെ യുഡിഎഫ് എന്ന് ഒരിക്കൽ കൂടി തെളിഞ്ഞതായി സിപിഐ സംസ്ഥാന സെക്രട്ടറി ബിനോയ് വിശ്വം. പദ്ധതിയിൽ കേരളം ഒപ്പിട്ട് ഫണ്ട് വാങ്ങിയെന്ന മുഖ്യമന്ത്രിയുടെയും വിദ്യാഭ്യാസ മന്ത്രിയുടെയും വാദം കളവാണെന്ന് കേന്ദ്ര സർക്കാർ രാജ്യസഭയിൽ നൽകിയ മറുപടിയോടെ വ്യക്തമായതായും അദ്ദേഹം പറഞ്ഞു.

കോൺഗ്രസ് എംപിയുടെ ചോദ്യത്തിനുള്ള മറുപടിയായാണ് കേന്ദ്ര സർക്കാർ നിലപാട് വ്യക്തമാക്കിയത്. കേരളത്തിൽ പിഎം ശ്രീയുമായി ബന്ധപ്പെട്ട് ഒരു തുടർ നടപടിയും ഉണ്ടായിട്ടില്ലെന്ന് കേന്ദ്രം രേഖാമൂലം അറിയിച്ചിട്ടുണ്ട്. 

കേരളത്തിന് അനുവദിച്ചത് പിഎം ശ്രീ ഫണ്ടല്ല, എസ്‌എസ്‌കെ ഫണ്ടാണെന്നും കേന്ദ്ര സർക്കാർ വെളിപ്പെടുത്തി. പിഎം ശ്രീ നടപ്പാക്കണമെന്ന് വാദിച്ച യുഡിഎഫിന്റെ ഒരു വാദം കൂടി ഇതോടെ പൊളിഞ്ഞിരിക്കുകയാണ്.

പദ്ധതി നടപ്പാക്കാൻ സംസ്ഥാന സർക്കാരിന് ഒരു തരത്തിലുമുള്ള നിയമപരമായ ബാധ്യതയുമില്ല എന്ന വസ്തുതയും ഇതോടെ വ്യക്തമായതായി ബിനോയ് വിശ്വം ചൂണ്ടിക്കാട്ടി. ധാരണാപത്രത്തിൽ ഒപ്പിട്ടതിന്റെ പേരിൽ മാത്രം സംസ്ഥാനത്തെ ബന്ധിപ്പിക്കാൻ കഴിയില്ലെന്നും അദ്ദേഹം പറഞ്ഞു.

ഈ വസ്തുതകൾ മറച്ചുവച്ച് പിഎം ശ്രീയുമായി മുന്നോട്ട് പോകാനുള്ള യുഡിഎഫ് നീക്കം ബിജെപിയെ പ്രീതിപ്പെടുത്താൻ വേണ്ടി മാത്രമാണെന്ന് ബിനോയ് വിശ്വം ആരോപിച്ചു.

> "ബിജെപി തെളിക്കുന്ന വഴിയേ സഞ്ചരിക്കുന്ന കോൺഗ്രസിൽ നിന്ന് മറ്റൊന്നും പ്രതീക്ഷിക്കാനാകില്ല. എന്നാൽ ലീഗും സംഘപരിവാർ അജണ്ടകളുടെ പ്രചാരകരായി മാറുന്നത് അപമാനകരമാണ്" - അദ്ദേഹം വിമർശിച്ചു. പിഎം ശ്രീ നടപ്പാക്കുന്നത് കേന്ദ്രഫണ്ട് നഷ്ടപ്പെടാതിരിക്കാനാണെന്നാണ് യുഡിഎഫ് കൺവീനറുടെ വാദം.

> എന്നാൽ കേന്ദ്രഫണ്ട് ആരുടെയും ഔദാര്യമല്ലെന്നും അത് നിഷേധിച്ചാൽ നിയമ നടപടികൾ സ്വീകരിക്കണമെന്നും ബിനോയ് വിശ്വം പറഞ്ഞു. "കേന്ദ്രഫണ്ടിനായി കേരളത്തിന്റെ വിദ്യാഭ്യാസ രംഗത്തെ സംഘ പരിവാറിന് അടിയറവയ്ക്കണമെന്ന വാദം അംഗീകരിക്കാനാകില്ല. കേരളത്തിന്റെ വിദ്യാഭ്യാസ മേഖലയുടെ മതനിരപേക്ഷ ഉള്ളടക്കത്തെ തകർക്കാനുള്ള ഏത് നീക്കവും ചെറുക്കും" - അദ്ദേഹം കൂട്ടിച്ചേർത്തു. 

പിഎം ശ്രീ നടപ്പാക്കാനുള്ള ഏത് ശ്രമത്തെയും കേരളം ഒറ്റക്കെട്ടായി ചെറുത്ത് തോൽപ്പിക്കുമെന്നും ബിനോയ് വിശ്വം പ്രസ്താവനയിൽ വ്യക്തമാക്കി. വിദ്യാഭ്യാസം സംസ്ഥാന വിഷയമാണെന്നും കേന്ദ്രത്തിന്റെ അടിച്ചേൽപ്പിക്കലുകൾക്ക് കേരളം വഴങ്ങില്ലെന്നും സിപിഐ നിലപാട് വ്യക്തമാക്കി.  

### Related Links & Sources
- [Original Story Source](https://truevisionnews.com/news/375586/cpi-binoy-viswam-udf-pm-shri-centre-reply-rajya-sabha)