---
title: "കൽക്കരി കുംഭകോണക്കേസ്; അന്തരിച്ച മുൻ പ്രധാനമന്ത്രി മൻമോഹൻ സിംഗിന് സുപ്രീംകോടതിയുടെ ക്ലീൻ ചിറ്റ്"
english_title: "Supreme Court Gives Clean Chit to Former PM Manmohan Singh in Coal Scam Case"
publisher: "truevisionnews.com"
canonical_url: "https://truevisionnews.com/news/375385/supreme-court-clean-chit-manmohan-singh-coal-scam-case"
published_at: "2026-07-29T18:30:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a69f96c287ce_supreme-court-clean-chit-manmohan-singh-coal-scam-case.jpg"
keywords: ["Manmohan Singh", "Supreme Court", "Coal Scam", "Talabira Coal Block", "Clean Chit", "Delhi"]
---

# കൽക്കരി കുംഭകോണക്കേസ്; അന്തരിച്ച മുൻ പ്രധാനമന്ത്രി മൻമോഹൻ സിംഗിന് സുപ്രീംകോടതിയുടെ ക്ലീൻ ചിറ്റ്

> **Lead Summary:** ന്യൂഡൽഹി: കൽക്കരി കുംഭകോണവുമായി ബന്ധപ്പെട്ട കേസിൽ മുൻ പ്രധാനമന്ത്രി ഡോ. മൻമോഹൻ സിങ്ങിന് സുപ്രീംകോടതിയുടെ ക്ലീൻ ചിറ്റ്. അദ്ദേഹത്തിന് എതിരായ കേസ് അവസാനിപ്പിച്ച സിബിഐയുടെ ക്ലോഷർ റിപ്പോർട്ട് സുപ്രീംകോടതി അംഗീകരിച്ചു. ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ചാണ് വിധി പ്രസ്താവിച്ചത്.

## Article Content

ന്യൂഡൽഹി: കൽക്കരി കുംഭകോണവുമായി ബന്ധപ്പെട്ട കേസിൽ മുൻ പ്രധാനമന്ത്രി ഡോ. മൻമോഹൻ സിങ്ങിന് സുപ്രീംകോടതിയുടെ ക്ലീൻ ചിറ്റ്. അദ്ദേഹത്തിന് എതിരായ കേസ് അവസാനിപ്പിച്ച സിബിഐയുടെ ക്ലോഷർ റിപ്പോർട്ട് സുപ്രീംകോടതി അംഗീകരിച്ചു. ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ചാണ് വിധി പ്രസ്താവിച്ചത്.

കേസ് അവസാനിപ്പിക്കാനുള്ള സിബിഐ തീരുമാനം നേരത്തെ വിചാരണ കോടതിയും അംഗീകരിച്ചിരുന്നു. ഒഡീഷയിലെ താലാബീര-II കൽക്കരിപ്പാടം സ്വകാര്യ കമ്പനിക്ക് അനധികൃതമായി അനുവദിച്ചു എന്നതായിരുന്നു കേസിന്റെ അടിസ്ഥാനം. ഈ കേസിലെ ആറാം പ്രതിയായിരുന്നു മൻമോഹൻ സിംഗ്.

അദ്ദേഹം മരിച്ച് രണ്ട് വർഷം പിന്നിടുമ്പോഴാണ് സുപ്രീംകോടതി അദ്ദേഹത്തിന് ക്ലീൻ ചിറ്റ് നൽകുന്നത്. മൻമോഹൻ സിങ്ങിന്റെ വിയോഗത്തിന് പിന്നാലെ അപ്പീൽ നടപടികൾ അവസാനിപ്പിക്കാമായിരുന്നുവെന്ന് കോടതി ചൂണ്ടിക്കാട്ടി. എന്നാൽ സ്പെഷ്യൽ ജഡ്ജി കേസ് രജിസ്റ്റർ ചെയ്തതും അപ്പീൽ നൽകിയ വ്യക്തിക്ക് സമൻസ് അയച്ചതും പരിശോധിക്കുന്നതിന്റെ ഭാഗമായി സിബിഐ സമർപ്പിച്ച രണ്ട് ക്ലോഷർ റിപ്പോർട്ടുകളും സുപ്രീംകോടതി വിശദമായി പരിശോധിച്ചു.

അന്വേഷണ ഏജൻസികളുടെ റിപ്പോർട്ടുകൾ അംഗീകരിക്കുന്നതുമായി ബന്ധപ്പെട്ട് കോടതിയുടെ മാനദണ്ഡങ്ങൾ മുൻനിർത്തി പരിശോധിക്കുമ്പോൾ, സിബിഐയുടെ ക്ലോഷർ റിപ്പോർട്ട് തള്ളിക്കളയാനും കേസ് രജിസ്റ്റർ ചെയ്യാനും സ്പെഷ്യൽ ജഡ്ജിക്ക് യാതൊരു കാരണവുമില്ലായിരുന്നു എന്ന് ബോധ്യപ്പെട്ടതായും സുപ്രീംകോടതി വ്യക്തമാക്കി.

കൽക്കരി ഖനികൾ അനുവദിക്കുന്നതിലെ ക്രമക്കേടുകൾ ആരോപിച്ച് രാഷ്ട്രീയമായി വലിയ ചർച്ചകൾക്കും പ്രതിഷേധങ്ങൾക്കും വഴിവെച്ച കേസുകളിലൊന്നായിരുന്നു താലാബീര-II കേസ്. വർഷങ്ങളോളം നീണ്ട നിയമ പോരാട്ടത്തിനൊടുവിലാണ് മൻമോഹൻ സിങ്ങിന് കോടതിയിൽ നിന്ന് പൂർണ മോചനം ലഭിക്കുന്നത്.

സിബിഐ സമർപ്പിച്ച തെളിവുകളുടെയും അന്വേഷണ റിപ്പോർട്ടുകളുടെയും അടിസ്ഥാനത്തിൽ കേസിൽ തുടരാൻ യാതൊരു അടിസ്ഥാനവുമില്ലെന്ന് കോടതി നിരീക്ഷിച്ചു. ഇതോടെ മൻമോഹൻ സിങ്ങിനെതിരായ കേസിന് ഔദ്യോഗികമായി അന്ത്യമായി.

### Related Links & Sources
- [Original Story Source](https://truevisionnews.com/news/375385/supreme-court-clean-chit-manmohan-singh-coal-scam-case)