---
title: "'ഊരാളുങ്കലിന്റെ നെടുംതൂൺ നഷ്ടമായി' - രമേശൻ പാലേരിയുടെ വിയോഗത്തിൽ അനുശോചിച്ച് എം.വി. ഗോവിന്ദൻ "
english_title: "MV Govindan Condoles Rameshan Paleri Death: Uralungal Society Lost Its Pillar"
publisher: "truevisionnews.com"
canonical_url: "https://truevisionnews.com/news/375108/mv-govindan-condolence-rameshan-paleri-uralungal-chairman"
published_at: "2026-07-28T12:41:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a68576f7115e_mv-govindan-condolence-rameshan-paleri-uralungal-chairman.jpg"
keywords: ["Rameshan Paleri", "MV Govindan", "ULCCS Chairman", "Vatakara"]
---

# 'ഊരാളുങ്കലിന്റെ നെടുംതൂൺ നഷ്ടമായി' - രമേശൻ പാലേരിയുടെ വിയോഗത്തിൽ അനുശോചിച്ച് എം.വി. ഗോവിന്ദൻ 

> **Lead Summary:** > കണ്ണൂർ: ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റിവ് സൊസൈറ്റിയുടെ ചെയർമാൻ രമേശൻ പാലേരിയുടെ വിയോഗത്തിൽ അനുശോചനം അറിയിച്ച് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. "ഊരാളുങ്കൽ സൊസൈറ്റിയുടെ നെടുംതൂണായിരുന്നു രമേശൻ പാലേരി" എന്ന് എം.വി. ഗോവിന്ദൻ അനുശോചന സന്ദേശത്തിൽ പറഞ്ഞു.

## Article Content

> കണ്ണൂർ: ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റിവ് സൊസൈറ്റിയുടെ ചെയർമാൻ രമേശൻ പാലേരിയുടെ വിയോഗത്തിൽ അനുശോചനം അറിയിച്ച് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. "ഊരാളുങ്കൽ സൊസൈറ്റിയുടെ നെടുംതൂണായിരുന്നു രമേശൻ പാലേരി" എന്ന് എം.വി. ഗോവിന്ദൻ അനുശോചന സന്ദേശത്തിൽ പറഞ്ഞു.

കേരളം കണ്ട പകരം വെക്കാനില്ലാത്ത സഹകാരിയെയാണ് നമുക്ക് നഷ്ടമായതെന്നും അദ്ദേഹത്തിന്റെ വിയോഗം സഹകരണ മേഖലയ്ക്ക് കനത്ത തിരിച്ചടിയാണെന്നും അദ്ദേഹം കൂട്ടിച്ചേർത്തു. ഊരാളുങ്കലിനെ ഏഷ്യയിലെ ഏറ്റവും വലിയ സഹകരണ തൊഴിലാളി സൊസൈറ്റിയായി വളർത്തിയെടുക്കുന്നതിൽ നിർണായക പങ്കുവഹിച്ച വ്യക്തിയാണ് രമേശൻ പാലേരിയെന്ന് അദ്ദേഹം പറഞ്ഞു.

> "മൂന്നര പതിറ്റാണ്ടിലേറെയായി അദ്ദേഹം ഈ പ്രസ്ഥാനത്തെ നയിച്ചു. സഹകരണ രംഗത്ത് വികസനത്തിന് പുതിയ തുടക്കം കുറിച്ചത് അദ്ദേഹത്തിന്റെ നേതൃത്വത്തിലാണ്. ഒരു പ്രാദേശിക സഹകരണ സംഘത്തെ അന്തർദേശീയ തലത്തിലേക്ക് ഉയർത്തി അംഗീകാരങ്ങൾ നേടിക്കൊടുക്കുന്നതിൽ രമേശൻ പാലേരിയുടെ സംഭാവന വളരെ വലുതാണ്.

മാറി വരുന്ന രാഷ്ട്രീയ സാഹചര്യങ്ങളിലും സഹകരണ മേഖലയിൽ ഫലപ്രദമായി ഇടപെട്ട് മുന്നോട്ട് പോകാൻ ഊരാളുങ്കൽ സൊസൈറ്റിക്ക് സാധിച്ചത് അദ്ദേഹത്തിന്റെ ദീർഘവീക്ഷണത്തോടെയുള്ള നേതൃപാടവം കൊണ്ടായിരുന്നു. വിമർശിച്ചവർക്ക് പോലും അംഗീകരിക്കേണ്ടി വന്ന പ്രവർത്തന മികവായിരുന്നു ഊരാളുങ്കൽ സൊസൈറ്റിയുടേത്.

> നിർമാണം, ഐടി, ആരോഗ്യം, വിദ്യാഭ്യാസം തുടങ്ങി സർവതലസ്പർശിയായ മേഖലകളിൽ ഇടപെട്ട് മാതൃക സൃഷ്ടിച്ച ഊരാളുങ്കലിന്റെ എല്ലാ നേട്ടങ്ങൾക്കും പിന്നിൽ രമേശൻ പാലേരിയുടെ കരുത്തുണ്ടായിരുന്നു. നാടിന്റെ വികസന കാര്യങ്ങളിൽ ഊരാളുങ്കലുമായി സഹകരിക്കേണ്ടി വന്ന ഘട്ടങ്ങളിൽ ചെയർമാൻ എന്ന നിലയിൽ രമേശൻ പാലേരിയുടെ ഇടപെടലുകൾ വിസ്മരിക്കാനാവാത്തതാണ്."

സൗമ്യമായ സമീപനവും എന്നാൽ വ്യക്തമായ ലക്ഷ്യബോധവുമാണ് അദ്ദേഹത്തെ വ്യത്യസ്തനാക്കിയത്. അദ്ദേഹത്തിന്റെ അകാലത്തിലുള്ള വേർപാട് സഹകരണ പ്രസ്ഥാനത്തിന് മാത്രമല്ല കേരളത്തിനാകെ നികത്താനാവാത്ത നഷ്ടമാണെന്നും എം.വി. ഗോവിന്ദൻ പറഞ്ഞു. രമേശൻ പാലേരിയുടെ കുടുംബത്തിന്റെ ദുഃഖത്തിൽ പങ്കുചേരുന്നതായും അദ്ദേഹം അറിയിച്ചു.

### Related Links & Sources
- [Original Story Source](https://truevisionnews.com/news/375108/mv-govindan-condolence-rameshan-paleri-uralungal-chairman)