---
title: "മെഴുകുതിരി ഒക്കെ നോക്കി വച്ചോ ...! സംസ്ഥാനത്ത് ഇന്നും വൈദ്യുതി നിയന്ത്രണ സാധ്യത; മുന്നറിയിപ്പുമായി കെഎസ്ഇബി"
english_title: "KSEB Warns Of Partial Power Cuts In Kerala Today Due To High Demand"
publisher: "truevisionnews.com"
canonical_url: "https://truevisionnews.com/news/374185/kseb-warns-partial-power-cuts-kerala-high-demand"
published_at: "2026-07-23T19:16:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a5f6d1ee2914_kerala-power-cut-today-kseb-load-restriction-peak-hours.jpg"
keywords: ["KSEB Power Cut", "Kerala", "Electricity Demand", "El Nino"]
---

# മെഴുകുതിരി ഒക്കെ നോക്കി വച്ചോ ...! സംസ്ഥാനത്ത് ഇന്നും വൈദ്യുതി നിയന്ത്രണ സാധ്യത; മുന്നറിയിപ്പുമായി കെഎസ്ഇബി

> **Lead Summary:** **തിരുവനന്തപുരം: **സംസ്ഥാനത്ത് വൈദ്യുതി ഉപഭോഗം കുത്തനെ വർധിക്കുന്ന സാഹചര്യത്തിൽ ഇന്നും ഭാഗികമായി വൈദ്യുതി നിയന്ത്രണം ഏർപ്പെടുത്തേണ്ടി വന്നേക്കാമെന്ന് കെഎസ്ഇബി മുന്നറിയിപ്പ് നൽകി.പവർ എക്സ്ചേഞ്ച് വഴി ആവശ്യമായ അളവിൽ വൈദ്യുതി ലഭ്യമാകാത്ത സാഹചര്യം ഉണ്ടായാലാണ് നിയന്ത്രണം ഉണ്ടാകുക.

## Article Content

**തിരുവനന്തപുരം: **സംസ്ഥാനത്ത് വൈദ്യുതി ഉപഭോഗം കുത്തനെ വർധിക്കുന്ന സാഹചര്യത്തിൽ ഇന്നും ഭാഗികമായി വൈദ്യുതി നിയന്ത്രണം ഏർപ്പെടുത്തേണ്ടി വന്നേക്കാമെന്ന് കെഎസ്ഇബി മുന്നറിയിപ്പ് നൽകി.പവർ എക്സ്ചേഞ്ച് വഴി ആവശ്യമായ അളവിൽ വൈദ്യുതി ലഭ്യമാകാത്ത സാഹചര്യം ഉണ്ടായാലാണ് നിയന്ത്രണം ഉണ്ടാകുക.

സംസ്ഥാനത്ത് മഴ മാറിനിൽക്കുന്നതിനാൽ ഇന്നത്തെ വൈദ്യുതി ഉപഭോഗം മുൻ ദിവസങ്ങളെ അപേക്ഷിച്ച് ഏകദേശം 200 മുതൽ 300 മെഗാവാട്ട് വരെ വർധിക്കാൻ സാധ്യതയുണ്ടെന്നും കെഎസ്ഇബി അധികൃതർ അറിയിച്ചു.എൽനിനോ പ്രതിഭാസത്തെ തുടർന്നുണ്ടായ മഴക്കുറവും അന്തരീക്ഷ താപനില താരതമ്യേന ഉയർന്ന നിലയിൽ തുടരുന്നതുമാണ് വൈദ്യുതി ഉപഭോഗം വർധിക്കാൻ പ്രധാന കാരണം.

ഫാനുകൾ, എയർകണ്ടീഷണറുകൾ എന്നിവയുടെ ഉപയോഗം വർധിച്ചതോടെ ഗാർഹിക ഉപഭോഗം ഗണ്യമായി കൂടി. ഇതോടൊപ്പം രാജ്യത്താകമാനം വൈദ്യുതി ആവശ്യകത വർധിച്ചിട്ടുണ്ട്. ഇതുമൂലം പവർ എക്സ്ചേഞ്ചിലൂടെ കേരളത്തിന് ലഭിക്കുന്ന വൈദ്യുതിയിലും കാര്യമായ കുറവ് അനുഭവപ്പെടുന്നുണ്ടെന്ന് കെഎസ്ഇബി പുറത്തിറക്കിയ വാർത്താ കുറിപ്പിൽ പറയുന്നു.

സാധാരണ മഴക്കാലത്ത് ജലവൈദ്യുത പദ്ധതികളിൽ നിന്ന് ലഭിക്കുന്ന വൈദ്യുതി സംസ്ഥാനത്തിന്റെ ആവശ്യം നികത്താൻ സഹായിക്കാറുണ്ട്. എന്നാൽ ഇത്തവണ മഴ ലഭിക്കാത്തതിനാൽ ആഭ്യന്തര ഉത്പാദനവും കുറഞ്ഞിട്ടുണ്ട്. ഇത് പുറത്ത് നിന്ന് വൈദ്യുതി വാങ്ങുന്നതിലെ ആശ്രയത്വം വർധിപ്പിച്ചു.

വൈദ്യുതി ലഭ്യതയ്ക്ക് അനുസരിച്ച് ആവശ്യമെങ്കിൽ മാത്രമേ നിയന്ത്രണം ഏർപ്പെടുത്തൂവെന്നും അനാവശ്യമായി വൈദ്യുതി ഉപയോഗം ഒഴിവാക്കണമെന്നും കെഎസ്ഇബി ഉപഭോക്താക്കളോട് അഭ്യർഥിച്ചു. പ്രത്യേകിച്ച് പീക്ക് സമയങ്ങളിൽ എസി, ഗീസർ, വാഷിംഗ് മെഷീൻ തുടങ്ങിയവയുടെ ഉപയോഗം പരമാവധി കുറക്കണമെന്നും നിർദ്ദേശമുണ്ട്. വരും ദിവസങ്ങളിൽ മഴ ലഭിച്ചില്ലെങ്കിൽ വൈദ്യുതി പ്രതിസന്ധി കൂടുതൽ രൂക്ഷമാകാനും സാധ്യതയുണ്ട്. സ്ഥിതിഗതികൾ കെഎസ്ഇബി നിരന്തരം വിലയിരുത്തുന്നുണ്ടെന്ന് അധികൃതർ അറിയിച്ചു.

### Related Links & Sources
- [Original Story Source](https://truevisionnews.com/news/374185/kseb-warns-partial-power-cuts-kerala-high-demand)