ഭൂമി നൽകിയിട്ടും ജീവനാംശം നൽകിയില്ല; കേസ് കൊടുത്ത വൈരാഗ്യത്തിൽ വയോധികനായ അച്ഛനെ മകൻ ചുറ്റികയ്ക്ക് അടിച്ചു കൊന്നു

തൃശൂർ: ( www.truevisionnews.com ) ഭൂമി തർക്കത്തെ തുടർന്നുള്ള വൈരാഗ്യത്തിൽ മകൻ അച്ഛനെ ചുറ്റികകൊണ്ട് തലക്കടിച്ച് കൊലപ്പെടുത്തി. തൃശൂർ മടവാക്കരയിലാണ് ഞെട്ടിക്കുന്ന സംഭവമുണ്ടായത്.മടവാക്കര സ്വദേശിയായ 89 കാരൻ കൃഷ്ണനാണ് കൊല്ലപ്പെട്ടത്.

സംഭവത്തിൽ മകൻ രാധാകൃഷ്ണനെ (54) തൃശൂർ പൊലീസ് അറസ്റ്റ് ചെയ്തു.മൂന്ന് ദിവസത്തോളം പഴക്കമുള്ളതാണ് മൃതദേഹമെന്ന് പൊലീസ് പറയുന്നു. ചൊവ്വാഴ്ചയാണ് കൊലപാതകവിവരം പുറത്തറിയുന്നത്.

മറ്റൊരു മകന്റെ വീട്ടിൽ താമസിച്ചിരുന്ന കൃഷ്ണനെ ഇടതു ചെവിയോട് ചേർന്ന് ആഴത്തിൽ മുറിവേറ്റ നിലയിൽ കട്ടിലിൽ ഇരിക്കുന്ന രീതിയിലാണ് കണ്ടെത്തിയത്. ചുറ്റികകൊണ്ടുള്ള ആക്രമണത്തിലാണ് മരണം സംഭവിച്ചതെന്നാണ് പ്രാഥമിക നിഗമനം.

ഭൂമി മകന്റെ പേരിൽ എഴുതി നൽകിയിട്ടും രാധാകൃഷ്ണൻ തന്നെ സംരക്ഷിക്കുകയോ ജീവനാംശം നൽകുകയോ ചെയ്തില്ലെന്ന് ആരോപിച്ച് കൃഷ്ണൻ മുൻപ് മകനെതിരെ നിയമനടപടി സ്വീകരിച്ചിരുന്നു. ഇതിലുള്ള കടുത്ത പകയാണ് കൊലപാതകത്തിൽ കലാശിച്ചതെന്ന് പൊലീസ് പറയുന്നു.

Also read: കരുതിയിരുന്നോ...! അടുത്ത മൂന്ന് മണിക്കൂറിൽ അതിശക്തമായ മഴയും കാറ്റും; ഏഴ് ജില്ലകളിൽ ജാഗ്രതാ നിർദ്ദേശം

കോടതിയിൽ കേസ് നിലനിൽക്കുന്നതിനിടെയാണ് കൊലപാതകം നടന്നത്. സംഭവം നടന്നതിന് ശേഷം രാധാകൃഷ്ണൻ ഒളിവിൽ പോയിരുന്നു. വിവരം ലഭിച്ച പൊലീസ് നടത്തിയ അന്വേഷണത്തിലാണ് പ്രതിയെ കസ്റ്റഡിയിലെടുത്തത്.കസ്റ്റഡിയിലെടുത്ത് വിശദമായി ചോദ്യം ചെയ്തതിന് ശേഷമാണ് രാധാകൃഷ്ണനെ അറസ്റ്റ് രേഖപ്പെടുത്തിയത്.

ഭൂമി തർക്കവും ജീവനാംശവുമായി ബന്ധപ്പെട്ട തർക്കങ്ങളും കൊലപാതകത്തിലേക്ക് നയിച്ചതായി പ്രതി പൊലീസിന് മൊഴി നൽകി.സംഭവത്തിൽ കേസ് രജിസ്റ്റർ ചെയ്ത പൊലീസ് കൂടുതൽ തെളിവുകൾ ശേഖരിക്കുകയാണ്. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുനൽകും.

വാർധക്യത്തിൽ പോലും മക്കളിൽ നിന്ന് സുരക്ഷയും സംരക്ഷണവും ലഭിക്കാത്ത അവസ്ഥയാണ് ഈ കൊലപാതകം സമൂഹത്തിന് മുന്നിൽ തുറന്നുകാട്ടുന്നതെന്ന് നാട്ടുകാർ പറഞ്ഞു.

Content Highlight: Thrissur Madavakkara Murder: Son Kills 89-Year-Old Father With Hammer Over Property Dispute

#Latest News #Father Killed #Thrissur Crime #Thrissur Police #Kerala Crime