---
title: "നീറ്റ് സമരം കത്തിപ്പടരുന്നു....! സംസ്ഥാനത്ത് നാളെ ഫ്രറ്റേണിറ്റി വിദ്യാഭ്യാസ ബന്ദ്"
english_title: "Kerala: Fraternity, SFI Call for Education Bandh Tomorrow Over NEET Irregularities"
publisher: "truevisionnews.com"
canonical_url: "https://truevisionnews.com/news/374094/kerala-education-bandh-fratenity-sfi-neet-protest-"
published_at: "2026-07-23T12:34:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a61bdfc4fd4f_kerala-education-bandh-fratenity-sfi-neet-protest.jpg"
keywords: ["NEET Protest", "Education Bandh", "Fraternity Movement", "SFI", "KSU", "Dharmendra Pradhan"]
---

# നീറ്റ് സമരം കത്തിപ്പടരുന്നു....! സംസ്ഥാനത്ത് നാളെ ഫ്രറ്റേണിറ്റി വിദ്യാഭ്യാസ ബന്ദ്

> **Lead Summary:** **തിരുവനന്തപുരം: ** നീറ്റ് പരീക്ഷാ ക്രമക്കേടുകൾക്കെതിരെയുള്ള പ്രതിഷേധം സംസ്ഥാനത്ത് കത്തുന്നു. വിദ്യാർഥി പ്രക്ഷോഭങ്ങളെ അടിച്ചമർത്തുന്ന ഭരണകൂട ഭീകരതയ്ക്കും ഹിന്ദുത്വവത്കരണത്തിനുമെതിരെ വിവിധ വിദ്യാർഥി സംഘടനകളുടെ നേതൃത്വത്തിൽ സംസ്ഥാനത്ത് കനത്ത പ്രതിഷേധങ്ങളും വിദ്യാഭ്യാസ ബന്ദും പ്രഖ്യാപിച്ചു.

## Article Content

**തിരുവനന്തപുരം: ** നീറ്റ് പരീക്ഷാ ക്രമക്കേടുകൾക്കെതിരെയുള്ള പ്രതിഷേധം സംസ്ഥാനത്ത് കത്തുന്നു. വിദ്യാർഥി പ്രക്ഷോഭങ്ങളെ അടിച്ചമർത്തുന്ന ഭരണകൂട ഭീകരതയ്ക്കും ഹിന്ദുത്വവത്കരണത്തിനുമെതിരെ വിവിധ വിദ്യാർഥി സംഘടനകളുടെ നേതൃത്വത്തിൽ സംസ്ഥാനത്ത് കനത്ത പ്രതിഷേധങ്ങളും വിദ്യാഭ്യാസ ബന്ദും പ്രഖ്യാപിച്ചു.

നീറ്റ് സമരക്കാരെ തല്ലിച്ചതച്ചതിനെതിരെ നാളെ (ജൂലൈ 24 വെള്ളി) ഫ്രറ്റേണിറ്റി മൂവ്മെൻറ് സംസ്ഥാന വ്യാപക വിദ്യാഭ്യാസ ബന്ദിന് ആഹ്വാനം ചെയ്തു. ഡൽഹി സമരത്തിന് പിന്തുണയായി തിരുവനന്തപുരം ലോക് ഭവൻ മാർച്ച്, മലപ്പുറം-എറണാകുളം നൈറ്റ് വിജിൽ, പാലക്കാട് റെയിൽവേ സ്റ്റേഷൻ മാർച്ച് എന്നിവയും സംഘടിപ്പിച്ചു.

കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജി വെക്കും വരെ പ്രതിഷേധം തുടരുമെന്ന് പ്രഖ്യാപിച്ച എസ്.എഫ്.ഐ നാളെ അഖിലേന്ത്യ പഠിപ്പുമുടക്കിന് ആഹ്വാനം ചെയ്തു. ഇന്ന് എസ്.എഫ്.ഐ ലോക്ഭവൻ മാർച്ച് നടത്തും.

 നീറ്റ് ക്രമക്കേടുകൾക്കെതിരെ സമരം ചെയ്ത വിദ്യാർഥികളെയും രാഹുൽ ഗാന്ധി അടക്കമുള്ള എം.പിമാരെയും കൈയേറ്റം ചെയ്തതിൽ പ്രതിഷേധിച്ച് ഇന്ന് സംസ്ഥാന വ്യാപകമായി കെ.എസ്.യു വിദ്യാഭ്യാസ ബന്ദും കാമ്പസുകളിൽ മോദിയുടെ കോലം കത്തിച്ചുള്ള പ്രതിഷേധവും നടത്തുന്നു.

അതേസമയം യുവാക്കളുടെ ഭാവി തകർക്കുന്നവരെ ഒരു കാരണവശാലും വെറുതെവിടില്ല. നീറ്റ് ചോദ്യപേപ്പർ ചോർച്ചയിൽ ഒടുവിൽ മൗനം വെടിഞ്ഞ് പ്രധാനമന്ത്രി നരേന്ദ്ര മോദി. യുവാക്കളുടെ ഭാവി തകർക്കുന്നവരെ ഒരു കാരണവശാലും വെറുതെവിടില്ലെന്നും കുറ്റക്കാർക്ക് കടുത്ത ശിക്ഷ ഉറപ്പാക്കുമെന്നും പ്രധാനമന്ത്രി ഫേസ്ബുക്കിലൂടെ വ്യക്തമാക്കി.

ചോദ്യപേപ്പർ ചോർച്ചയുമായി ബന്ധപ്പെട്ട കേസ് വേഗത്തിൽ തീർപ്പാക്കുന്നതിനും കുറ്റക്കാർക്ക് മാതൃകാപരമായ ശിക്ഷ ഉറപ്പാക്കുന്നതിനുമായി ഫാസ്റ്റ് ട്രാക്ക് കോടതികൾ സ്ഥാപിക്കുമെന്ന് പ്രധാനമന്ത്രി അറിയിച്ചു. ഇതിനായുള്ള കർശന നടപടികൾ സ്വീകരിക്കാൻ ബന്ധപ്പെട്ട അധികാരികൾക്ക് നിർദേശം നൽകിയിട്ടുണ്ടെന്നും അദ്ദേഹം വ്യക്തമാക്കി.

### Related Links & Sources
- [Original Story Source](https://truevisionnews.com/news/374094/kerala-education-bandh-fratenity-sfi-neet-protest-)