---
title: "വീട്ടിൽ എളുപ്പത്തിൽ ഉണ്ടാക്കാം സ്വാദിഷ്ടമായ മലബാർ ചെമ്മീൻ ബിരിയാണി!"
english_title: "വെറും 45 മിനിറ്റിൽ തയ്യാറാക്കാം: മലബാർ സ്റ്റൈൽ ചെമ്മീൻ ബിരിയാണി"
publisher: "truevisionnews.com"
canonical_url: "https://truevisionnews.com/news/373734/easy-malabar-style-chemmeen-biryani-recipe-malayalam"
published_at: "2026-07-21T14:54:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/6a5f3be927e45_easy-malabar-style-chemmeen-biryani-recipe-malayalam.jpg"
keywords: ["Latest News", "Chemmeen Biryani", "Prawn Biryani Recipe", "Malabar Biryani", "Easy Biryani Recipe"]
---

# വീട്ടിൽ എളുപ്പത്തിൽ ഉണ്ടാക്കാം സ്വാദിഷ്ടമായ മലബാർ ചെമ്മീൻ ബിരിയാണി!

> **Lead Summary:** **[**അധികം സങ്കീർണ്ണമല്ലാത്ത ചേരുവകൾ കൊണ്ട്, വളരെ കുറഞ്ഞ സമയം കൊണ്ട് വീട്ടിൽ തയ്യാറാക്കാവുന്ന ഒരു വിഭവമാണ് ചെമ്മീൻ ബിരിയാണി. അധികം സങ്കീർണ്ണമല്ലാത്ത ചേരുവകൾ കൊണ്ട്, വളരെ കുറഞ്ഞ സമയം കൊണ്ട് വീട്ടിൽ തയ്യാറാക്കാവുന്ന ഈ വിഭവം ബിരിയാണി പ്രേമികളുടെ എപ്പോഴത്തെയും ഫേവററ്റാണ്.

## Article Content

**[**അധികം സങ്കീർണ്ണമല്ലാത്ത ചേരുവകൾ കൊണ്ട്, വളരെ കുറഞ്ഞ സമയം കൊണ്ട് വീട്ടിൽ തയ്യാറാക്കാവുന്ന ഒരു വിഭവമാണ് ചെമ്മീൻ ബിരിയാണി. അധികം സങ്കീർണ്ണമല്ലാത്ത ചേരുവകൾ കൊണ്ട്, വളരെ കുറഞ്ഞ സമയം കൊണ്ട് വീട്ടിൽ തയ്യാറാക്കാവുന്ന ഈ വിഭവം ബിരിയാണി പ്രേമികളുടെ എപ്പോഴത്തെയും ഫേവററ്റാണ്.

ബിരിയാണി അരിയുടെ സുഗന്ധവും ചെമ്മീൻ മസാലയുടെ അപാരമായ രുചിയും ഒത്തുചേരുമ്പോൾ ലഭിക്കുന്ന ആ സ്വാദ് ഒന്ന് വേറെ തന്നെയാണ്! കൊതിപ്പിക്കുന്ന രുചിയിൽ മലബാർ സ്റ്റൈൽ ചെമ്മീൻ ബിരിയാണി വളരെ എളുപ്പത്തിൽ തയ്യാറാക്കുന്നത് എങ്ങനെയെന്ന് നോക്കാം.

**ആവശ്യമായ ചേരുവകൾ**

***1. ചെമ്മീൻ മസാലയ്ക്ക്:***

*ചെമ്മീൻ: 500 ഗ്രാം (നന്നായി കഴുകി വൃത്തിയാക്കിയത്)*

*സവാള: 3 എണ്ണം (നീളത്തിൽ അരിഞ്ഞത്)*

*തക്കാളി: 2 എണ്ണം (അരിഞ്ഞത്)*

*ഇഞ്ചി-വെളുത്തുള്ളി പേസ്റ്റ്: 2 ടേബിൾ സ്പൂൺ*

*പച്ചമുളക്: 4-5 എണ്ണം (ചതച്ചത്)*

*മഞ്ഞൾപ്പൊടി: 1/2 ടീസ്പൂൺ*

*മുളകുപൊടി: 1 ടേബിൾ സ്പൂൺ*

*മല്ലിപ്പൊടി: 1 ടേബിൾ സ്പൂൺ*

*ഗരം മസാല: 1 ടീസ്പൂൺ*

*തൈര്: 3 ടേബിൾ സ്പൂൺ*

*മല്ലിയില, പുതിനയില: ആവശ്യത്തിന് (അരിഞ്ഞത്)*

*നാരങ്ങാനീര്: 1 ടേബിൾ സ്പൂൺ*

*വെളിച്ചെണ്ണ/നെയ്യ്: ആവശ്യത്തിന്*

*ഉപ്പ്: ആവശ്യത്തിന്*

***2. റൈസ് തയ്യാറാക്കാൻ:***

*ബിരിയാണി അരി (കൈമ/ജീരകശാല അല്ലെങ്കിൽ ബസ്മതി): 3 കപ്പ്*

*വെള്ളം: 6 കപ്പ് (ബസ്മതിയാണെങ്കിൽ അരിയുടെ അളവിനനുസരിച്ച് മാറ്റം വരുത്താം)*

*നെയ്യ്: 2-3 ടേബിൾ സ്പൂൺ*

*ഏലക്ക, ഗ്രാമ്പൂ, കറുവാപ്പട്ട, തക്കോളം: 2-3 എണ്ണം വീതം*

*ഉപ്പ്: ആവശ്യത്തിന്*

***3. ഗാർണിഷ് ചെയ്യാൻ:***

*അണ്ടിപ്പരിപ്പ്, മുന്തിരി: ആവശ്യത്തിന് (നെയ്യിൽ വറുത്തത്)*

*സവാള: 1 എണ്ണം (പൊൻനിറത്തിൽ വറുത്തെടുത്തത് - ഫ്രൈഡ് ഒണിയൻ)*

തയ്യാറാക്കുന്ന വിധം

**ഘട്ടം 1: ചെമ്മീൻ മാരിനേറ്റ് ചെയ്യുക**

കഴുകി വൃത്തിയാക്കിവെച്ച ചെമ്മീനിലേക്ക് അല്പം മഞ്ഞൾപ്പൊടി, മുളകുപൊടി, നാരങ്ങാനീര്, ആവശ്യത്തിന് ഉപ്പ് എന്നിവ ചേർത്ത് നന്നായി തിരുമ്മി 15-20 മിനിറ്റ് മാറ്റിവെക്കുക.

**ഘട്ടം 2: ബിരിയാണി റൈസ് തയ്യാറാക്കാം**

അരി നന്നായി കഴുകി 20 മിനിറ്റ് കുതിർത്തു വെച്ച ശേഷം വെള്ളം വറ്റിച്ചെടുക്കുക. ഒരു വലിയ പാത്രത്തിൽ നെയ്യ് ചൂടാക്കി ഏലക്ക, ഗ്രാമ്പൂ, കറുവാപ്പട്ട, തക്കോളം എന്നിവ വഴറ്റുക. ഇതിലേക്ക് അളന്നുവെച്ച വെള്ളവും ആവശ്യത്തിന് ഉപ്പും ചേർത്ത് തിളപ്പിക്കുക. വെള്ളം തിളച്ചു വരുമ്പോൾ വറ്റിച്ചുവെച്ച അരി ചേർത്ത് മൂടിവെച്ച് വേവിക്കുക. അരി മുക്കാൽ വേവാകുമ്പോൾ തീ അണച്ച് മാറ്റി വെക്കുക.

**ഘട്ടം 3: ചെമ്മീൻ മസാല തയ്യാറാക്കാം**

ഒരു പാനിൽ വെളിച്ചെണ്ണയോ നെയ്യോ ചൂടാക്കി മാരിനേറ്റ് ചെയ്ത ചെമ്മീൻ 2-3 മിനിറ്റ് ചെറുതായി ഒന്ന് വറുത്തെടുക്കുക (കൂടുതൽ വേവിക്കരുത്, ചെമ്മീൻ കട്ടിയാകും). ഇത് ഒരു പാത്രത്തിലേക്ക് മാറ്റി വെക്കുക. അതേ പാനിലേക്ക് കുറച്ചുകൂടി എണ്ണ/നെയ്യ് ഒഴിച്ച് അരിഞ്ഞു വെച്ച സവാള ചേർത്ത് വഴറ്റുക. സവാള വഴന്നു വരുമ്പോൾ ഇഞ്ചി-വെളുത്തുള്ളി പേസ്റ്റ്, ചതച്ച പച്ചമുളക് എന്നിവ ചേർത്ത് പച്ചമണം മാറുന്നതുവരെ വഴറ്റുക.

ഇനി തക്കാളി ചേർത്ത് നന്നായി വഴറ്റി ഉടച്ചെടുക്കുക. ഇതിലേക്ക് മഞ്ഞൾപ്പൊടി, മുളകുപൊടി, മല്ലിപ്പൊടി, ഗരം മസാല എന്നിവ ചേർത്ത് ചെറിയ തീയിൽ മസാല മൂപ്പിച്ചെടുക്കുക. മസാല മൂത്തു വരുമ്പോൾ തൈരും ആവശ്യത്തിന് ഉപ്പും ചേർത്ത് ഇളക്കുക. ഇനി വറുത്തു വെച്ചിരിക്കുന്ന ചെമ്മീനും, പകുതി മല്ലിയില-പുതിനയിലയും ചേർത്ത് നന്നായി ഇളക്കി 3-4 മിനിറ്റ് ചെറിയ തീയിൽ മൂടിവെച്ച് വേവിക്കുക. മസാല പാകത്തിന് കുറുകി വരുമ്പോൾ തീ അണയ്ക്കാം.

**ഘട്ടം 4: ദം ചെയ്യാം**

അല്പം കട്ടിയുള്ള ഒരു പാത്രത്തിന്റെ അടിയിൽ കുറച്ച് നെയ്യ് പുരട്ടുക. അതിനു മുകളിലായി തയ്യാറാക്കിവെച്ച ചെമ്മീൻ മസാലയുടെ പകുതി ഇടുക. ഇതിനു മുകളിൽ പകുതി റൈസ് വിതറുക. റൈസിന് മുകളിലായി കുറച്ച് മല്ലിയില, പുതിനയില, വറുത്ത സവാള, അണ്ടിപ്പരിപ്പ്, മുന്തിരി, അല്പം ഗരം മസാല എന്നിവ വിതറുക. ഇതിന് മുകളിലായി ബാക്കിയുള്ള മസാലയും അതിനു മുകളിൽ ബാക്കി റൈസും ഇട്ട് മുൻപത്തെപ്പോലെ ഗാർണിഷ് ചെയ്യുക. അല്പം നെയ്യ് കൂടി മുകളിലായി ഒഴിച്ചു കൊടുക്കാം.

പാത്രം നല്ലതുപോലെ അടച്ച് (ആവി പുറത്തുപോകാത്ത രീതിയിൽ ഫോയിൽ പേപ്പറോ മാവോ ഉപയോഗിച്ച് അടയ്ക്കാം) വളരെ ചെറിയ തീയിൽ 10-15 മിനിറ്റ് 'ദം' ചെയ്യുക. തീ അണച്ച ശേഷം 10 മിനിറ്റ് കഴിഞ്ഞ് തുറന്ന് നന്നായി ഇളക്കി ചൂടോടെ റൈത്ത, പപ്പടം, അച്ചാർ എന്നിവയ്‌ക്കൊപ്പം വിളമ്പാം.

### Related Links & Sources
- [Original Story Source](https://truevisionnews.com/news/373734/easy-malabar-style-chemmeen-biryani-recipe-malayalam)