---
title: "അർജന്റീന തോറ്റാൽ എന്താ, ബിരിയാണി പാഴാക്കണോ? മെസ്സി ഫാൻസിന്റെ ബിരിയാണിച്ചെമ്പ് പൊക്കി നാട്ടുകാർക്ക് നൽകി ബ്രസീൽ ആരാധകർ "
english_title: "Brazil Fans Distribute Biryani After Argentina Loss In Tirurangadi"
publisher: "truevisionnews.com"
canonical_url: "https://truevisionnews.com/news/373706/brazil-fans-distribute-biryani-argentina-loss-tirurangadi"
published_at: "2026-07-21T13:35:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a5f283d50159_brazil-fans-distribute-biryani-argentina-loss-tirurangadi.jpg"
keywords: ["Argentina", "Brazil", "World Cup", "Malappuram", "Football", "Biriyani"]
---

# അർജന്റീന തോറ്റാൽ എന്താ, ബിരിയാണി പാഴാക്കണോ? മെസ്സി ഫാൻസിന്റെ ബിരിയാണിച്ചെമ്പ് പൊക്കി നാട്ടുകാർക്ക് നൽകി ബ്രസീൽ ആരാധകർ 

> **Lead Summary:** **മലപ്പുറം: ** ലോകകപ്പ് ഫൈനലിൽ അർജന്റീന കപ്പടിക്കുമെന്ന ഉറച്ച ആത്മവിശ്വാസത്തിൽ ബിരിയാണി വെച്ച തിരൂരങ്ങാടി കൊടിഞ്ഞിയിലെ ആരാധകർക്ക് നിരാശ. ഫൈനൽ പോരാട്ടത്തിൽ സ്പെയിനോട് ഏകപക്ഷീയമായ ഒരു ഗോളിന് അർജന്റീന തോറ്റതോടെ ആരാധകരുടെ ആവേശവും ബിരിയാണി വിതരണവും പാതിയിൽ നിന്നു.

## Article Content

**മലപ്പുറം: ** ലോകകപ്പ് ഫൈനലിൽ അർജന്റീന കപ്പടിക്കുമെന്ന ഉറച്ച ആത്മവിശ്വാസത്തിൽ ബിരിയാണി വെച്ച തിരൂരങ്ങാടി കൊടിഞ്ഞിയിലെ ആരാധകർക്ക് നിരാശ. ഫൈനൽ പോരാട്ടത്തിൽ സ്പെയിനോട് ഏകപക്ഷീയമായ ഒരു ഗോളിന് അർജന്റീന തോറ്റതോടെ ആരാധകരുടെ ആവേശവും ബിരിയാണി വിതരണവും പാതിയിൽ നിന്നു.

അർജന്റീന കിരീടം സ്വന്തമാക്കുമെന്ന പ്രതീക്ഷയിൽ മെസ്സിയുടെ ആരാധകർ നാട്ടുകാർക്ക് മുഴുവൻ വിതരണം ചെയ്യാനായി വൻതോതിൽ ബിരിയാണി തയ്യാറാക്കിയിരുന്നു. ഫൈനൽ വിസിൽ മുഴങ്ങി അർജന്റീനയുടെ പരാജയം ഉറപ്പായതോടെ ഫാൻസ് ക്യാമ്പുകൾ നിശ്ശബ്ദമായി. തയ്യാറാക്കിവെച്ച ബിരിയാണിയുടെ വിതരണവും അനിശ്ചിതത്വത്തിലായി.

എന്നാൽ ഇവിടെയാണ് കളിയിൽ യഥാർത്ഥ ട്വിസ്റ്റ് സംഭവിച്ചത്. അർജന്റീന ആരാധകർ നിരാശയോടെ മാറ്റിവെച്ച ബിരിയാണിച്ചെമ്പ് ബ്രസീൽ ആരാധകർ സന്തോഷത്തോടെ ഏറ്റെടുത്തു. പുലർച്ചെയോടെ കൊടിഞ്ഞിയിലെ നാട്ടുകാർക്ക് മുഴുവൻ ബിരിയാണി വിളമ്പി ആവേശം പങ്കിട്ട ബ്രസീൽ ഫാൻസിന്റെ വീഡിയോ ഇപ്പോൾ സോഷ്യൽ മീഡിയയിൽ തരംഗമാണ്.

> "അർജന്റീന തോറ്റാലും ബിരിയാണി പാഴാക്കണ്ട" എന്ന മട്ടിലായിരുന്നു ബ്രസീൽ ആരാധകരുടെ പ്രതികരണം.പരമ്പരാഗത വൈര്യം കളിക്കളത്തിൽ മാത്രമാണെന്നും ഫുട്ബോൾ സൗഹൃദം അതിനപ്പുറമാണെന്നും തെളിയിക്കുന്നതായിരുന്നു കൊടിഞ്ഞിയിലെ സംഭവം. അർജന്റീന-ബ്രസീൽ ഫാൻസ് തമ്മിലുള്ള കൂട്ടായ്മയും കളിതമാശകളുമാണ് മലബാറിലെ ഫുട്ബോൾ സംസ്കാരത്തിന്റെ ഭംഗിയെന്ന് നാട്ടുകാർ പറയുന്നു.തോൽവിയുടെ സങ്കടം മറന്ന് ബ്രസീൽ ആരാധകർ വിളമ്പിയ ബിരിയാണി നാട്ടുകാർക്ക് ഒരു ഫുട്ബോൾ ഓർമ്മ കൂടിയായി.

### Related Links & Sources
- [Original Story Source](https://truevisionnews.com/news/373706/brazil-fans-distribute-biryani-argentina-loss-tirurangadi)