---
title: "മെസിയെ വീഴ്ത്തി എംബാപ്പെക്ക് ഗോൾഡൻ ബൂട്ട്; പുരസ്കാരങ്ങൾ തൂത്തുവാരി ചാമ്പ്യൻമാരായ സ്പെയിൻ"
english_title: "Spain Wins World Cup Golden Ball and Golden Glove Mbappe Claims Golden Boot Again"
publisher: "truevisionnews.com"
canonical_url: "https://truevisionnews.com/news/373457/world-cup-2026-spain-winners-mbappe-golden-boot"
published_at: "2026-07-20T10:58:00+05:30"
category: "Fifa World Cup 2026"
language: "ml"
image: "https://cf.zdn.im/img/truevisionnews.com/0/image-uploads/6a5db442a18e4_world-cup-2026-spain-winners-mbappe-golden-boot.jpg"
keywords: ["Latest News", "FIFA World Cup", "Spain", "Mbappe", "Messi"]
---

# മെസിയെ വീഴ്ത്തി എംബാപ്പെക്ക് ഗോൾഡൻ ബൂട്ട്; പുരസ്കാരങ്ങൾ തൂത്തുവാരി ചാമ്പ്യൻമാരായ സ്പെയിൻ

> **Lead Summary:** **ന്യൂയോർക്ക്: [** വാശിയേറിയ എക്സ്ട്രാ ടൈം ത്രില്ലറിൽ അർജന്റീനയെ വീഴ്ത്തി സ്പെയിൻ തങ്ങളുടെ രണ്ടാം ലോകകപ്പ് കിരീടത്തിൽ മുത്തമിട്ടപ്പോൾ, ടൂർണമെന്റിലെ വ്യക്തിഗത പുരസ്കാരങ്ങളിലും സ്പാനിഷ് പടയുടെ ആധിപത്യം. എന്നാൽ സ്പെയിനിന്റെ ഈ വിജയത്തിനിടയിലും ലയണൽ മെസിയെ പിന്തള്ളി ടോപ് സ്കോറർക്കുള്ള ഗോൾഡൻ ബൂട്ട് പുരസ്കാരം തുടർച്ചയായ രണ്ടാം തവണയും ഫ്രഞ്ച് നായകൻ കിലിയൻ എംബാപ്പെ സ്വന്തമാക്കി.

## Article Content

**ന്യൂയോർക്ക്: [** വാശിയേറിയ എക്സ്ട്രാ ടൈം ത്രില്ലറിൽ അർജന്റീനയെ വീഴ്ത്തി സ്പെയിൻ തങ്ങളുടെ രണ്ടാം ലോകകപ്പ് കിരീടത്തിൽ മുത്തമിട്ടപ്പോൾ, ടൂർണമെന്റിലെ വ്യക്തിഗത പുരസ്കാരങ്ങളിലും സ്പാനിഷ് പടയുടെ ആധിപത്യം. എന്നാൽ സ്പെയിനിന്റെ ഈ വിജയത്തിനിടയിലും ലയണൽ മെസിയെ പിന്തള്ളി ടോപ് സ്കോറർക്കുള്ള ഗോൾഡൻ ബൂട്ട് പുരസ്കാരം തുടർച്ചയായ രണ്ടാം തവണയും ഫ്രഞ്ച് നായകൻ കിലിയൻ എംബാപ്പെ സ്വന്തമാക്കി.

ഫൈനലിൽ ഗോൾ കണ്ടെത്താനാകാതെ പോയ മെസി എട്ട് ഗോളുകളോടെ രണ്ടാമതായി. ഖത്തർ ലോകകപ്പിലും മെസിയെ മറികടന്നായിരുന്നു എംബാപ്പെ ഗോൾഡൻ ബൂട്ട് നേടിയിരുന്നത്.

അതേസമയം, ചാമ്പ്യൻമാരായ സ്പെയിൻ മറ്റു പ്രധാന പുരസ്കാരങ്ങളെല്ലാം തങ്ങളുടെ പേരിലാക്കി. ടൂർണമെന്റിലുടനീളം ഒരൊറ്റ ഗോൾ മാത്രം വഴങ്ങി സ്പാനിഷ് പ്രതിരോധത്തിന്റെ കരുത്തായ ഉനായ് സിമോൺ മികച്ച ഗോൾകീപ്പർക്കുള്ള ഗോൾഡൻ ഗ്ലൗ സ്വന്തമാക്കിയപ്പോൾ, മധ്യനിരയിലെ മിന്നും പ്രകടനത്തിലൂടെ റോഡ്രി ടൂർണമെന്റിലെ മികച്ച താരത്തിനുള്ള ഗോൾഡൻ ബോൾ പുരസ്കാരം നേടി. സ്പാനിഷ് പ്രതിരോധ താരം പൗ ക്യൂബാർസിയാണ് മികച്ച യുവതാരമായി തിരഞ്ഞെടുക്കപ്പെട്ടത്.

ഫൈനൽ പോരാട്ടത്തിന്റെ നിശ്ചിത സമയത്ത് ഇരുസംഘത്തിനും ഗോൾ നേടാനാകാതെ വന്നതോടെയാണ് മത്സരം എക്സ്ട്രാ ടൈമിലേക്ക് നീണ്ടത്. ഇഞ്ചുറി ടൈമിൽ എൻസോ ഫെർണാണ്ടസ് ചുവപ്പ് കാർഡ് കണ്ട് പുറത്തായതിനെ തുടർന്ന് 10 പേരുമായാണ് അർജന്റീന എക്സ്ട്രാ ടൈമിൽ കളിച്ചത്. ഒടുവിൽ 106-ാം മിനിറ്റിൽ പകരക്കാരനായി ഇറങ്ങിയ ഫെറാൻ ടോറസ് നേടിയ നിർണായക ഗോളിലാണ് സ്പെയിൻ വിജയമുറപ്പിച്ചത്.

മത്സരത്തിലുടനീളം സ്പാനിഷ് ആധിപത്യത്തിന് മുന്നിൽ അടിയറവ് പറഞ്ഞ അർജന്റീനയ്ക്ക് ആദ്യ 115 മിനിറ്റിൽ സ്പാനിഷ് പോസ്റ്റിലേക്ക് ഒരു ഷോട്ട് പോലും ഉതിർക്കാനായിരുന്നില്ല. 2010-ന് ശേഷമുള്ള സ്പെയിനിന്റെ രണ്ടാമത്തെ ലോകകപ്പ് കിരീടനേട്ടമാണിത്.

ഈ ഫൈനലോടെ പുതിയ ചരിത്രനേട്ടങ്ങളും പിറന്നു. 65-ാം വയസ്സിൽ ടീമിനെ ലോകകിരീടത്തിലേക്ക് നയിച്ച സ്പെയിൻ പരിശീലകൻ ലൂയിസ് ഡി ലാ ഫ്യൂന്റെ, ലോകകപ്പ് നേടുന്ന ഏറ്റവും പ്രായം കൂടിയ കോച്ചെന്ന റെക്കോർഡ് സ്വന്തമാക്കി.

39-ാം വയസ്സിൽ ഫൈനലിനിറങ്ങിയ അർജന്റീന നായകൻ ലയണൽ മെസി, മൂന്ന് ലോകകപ്പ് ഫൈനലുകളിൽ കളിക്കുന്ന രണ്ടാമത്തെ താരമെന്ന നേട്ടത്തോടൊപ്പം ഫൈനലിൽ കളിക്കുന്ന ഏറ്റവും പ്രായം കൂടിയ ഔട്ട്ഫീൽഡ് താരമെന്ന റെക്കോർഡും കുറിച്ചു. എന്നാൽ കരിയറിലെ അവസാന ലോകകപ്പ് മത്സരം കിരീടത്തോടെ അവസാനിപ്പിക്കാമെന്ന മെസിയുടെ സ്വപ്നങ്ങൾ സ്പാനിഷ് കരുത്തിന് മുന്നിൽ പൊലിയുകയായിരുന്നു.

### Related Links & Sources
- [Original Story Source](https://truevisionnews.com/news/373457/world-cup-2026-spain-winners-mbappe-golden-boot)