---
title: "'ഇവിടെ എന്നും ഇപ്പോൾ പവർ കട്ടാണ്, താൻ ഈ ഡയറി എഴുതുമ്പോൾ പോലും വീട്ടിൽ കറന്റില്ല'; കുഞ്ഞിന്റെ ഡയറി  വൈറലാകുന്നു "
english_title: "Power Cut Returns in Kerala After 10 Years: Hours of Outage at Night"
publisher: "truevisionnews.com"
canonical_url: "https://truevisionnews.com/news/373012/kerala-power-cut-returns-after-10-years-night-outage-"
published_at: "2026-07-17T17:25:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a5a1899ed254_kerala-power-cut-returns-after-10-years-night-outage.jpg"
keywords: ["Kerala Power Cut", "Load Shedding", "VD Satheesan", "Kerala News", "Electricity Outage"]
---

# 'ഇവിടെ എന്നും ഇപ്പോൾ പവർ കട്ടാണ്, താൻ ഈ ഡയറി എഴുതുമ്പോൾ പോലും വീട്ടിൽ കറന്റില്ല'; കുഞ്ഞിന്റെ ഡയറി  വൈറലാകുന്നു 

> **Lead Summary:** ** **കേരളത്തിൽ ഏകദേശം 10 വർഷത്തെ നീണ്ട ഇടവേളയ്ക്ക് ശേഷം പവർ കട്ട് വീണ്ടും തലപൊക്കുന്നു. അധികാരമേറ്റ ദിവസങ്ങൾക്കുള്ളിൽ തന്നെ മുഖ്യമന്ത്രി വി.ഡി സതീശന്റെയും സർക്കാരിന്റെയും നേതൃത്വത്തിൽ സംസ്ഥാനത്ത് ദിവസേനയുള്ള വൈദ്യുതി മുടക്കം പതിവായിരിക്കുകയാണ്.

## Article Content

** **കേരളത്തിൽ ഏകദേശം 10 വർഷത്തെ നീണ്ട ഇടവേളയ്ക്ക് ശേഷം പവർ കട്ട് വീണ്ടും തലപൊക്കുന്നു. അധികാരമേറ്റ ദിവസങ്ങൾക്കുള്ളിൽ തന്നെ മുഖ്യമന്ത്രി വി.ഡി സതീശന്റെയും സർക്കാരിന്റെയും നേതൃത്വത്തിൽ സംസ്ഥാനത്ത് ദിവസേനയുള്ള വൈദ്യുതി മുടക്കം പതിവായിരിക്കുകയാണ്.

ലോഡ്ഷെഡിംഗ് എന്ന വാക്ക് പോലും കേട്ടിട്ടില്ലാത്ത കൊച്ചുകുട്ടികൾക്ക് പോലും ഇന്ന് പവർ കട്ട് എന്താണെന്ന് അനുഭവത്തിലൂടെ മനസിലായി. ഒന്നും രണ്ടും മണിക്കൂർ വീതമാണ് ദിവസവും വിവിധ ഭാഗങ്ങളിൽ വൈദ്യുതി മുടങ്ങുന്നത്. ഏറ്റവും വലിയ പ്രശ്നം ഇത് രാത്രി സമയത്താണ് എന്നതാണ്.

ഇപ്പോഴിതാ ഒരു കുഞ്ഞിന്റെ ഡയറിയാണ് ശ്രദ്ധനേടുന്നത്. സ്കൂൾ വിട്ട് വന്നശേഷമുള്ള അനുഭവമാണ് ഡയറിയിൽ. ഇവിടെ എന്നും ഇപ്പോൾ പവർ കട്ടാണെന്നും ഇന്നും കറന്റ് പോയെന്നും കുട്ടി എഴുതിയത്. താൻ ഈ ഡയറി എഴുതുമ്പോൾ പോലും വീട്ടിൽ കറന്റില്ലെന്ന് ആ കുരുന്ന് ഡയറിയിൽ എഴുതിവെച്ചു. ഈ ഡയറി കുറിപ്പ് സമൂഹ മാധ്യമങ്ങളിൽ വലിയ ചർച്ചയാവുകയാണ്.

അതേസമയം ലോകകപ്പ് ഫുട്‌ബോള്‍ ഫൈനല്‍ ദിനമായ ഞായറാഴ്ച സംസ്ഥാനത്ത് തടസ്സമില്ലാതെ വൈദ്യുതി ഉറപ്പാക്കാൻ അധിക വിലയ്ക്ക് വൈദ്യുതി വാങ്ങുമെന്ന് മന്ത്രി സണ്ണി ജോസഫ് അറിയിച്ചു. മറ്റ് സംസ്ഥാനങ്ങളില്‍ നിന്നാണ് ഞായറാഴ്ചത്തേക്ക് മാത്രമായി വൈദ്യുതി എത്തിക്കുന്നത്.

നിലവിൽ സംസ്ഥാനത്തെ വൈദ്യുതി ഉപഭോഗം വലിയ പ്രതിസന്ധിയിലാണെന്നും ദീര്‍ഘകാലാടിസ്ഥാനത്തില്‍ മാത്രമേ ഈ പ്രശ്‌നത്തിന് ശാശ്വത പരിഹാരം കാണാൻ കഴിയൂ എന്നും മന്ത്രി വ്യക്തമാക്കി. കെഎസ്ഇബിയുടെയും വൈദ്യുത വകുപ്പിന്റെയും കണക്കുകൾ പ്രകാരം കഴിഞ്ഞ വർഷത്തെ അപേക്ഷിച്ച് പീക്ക് സമയങ്ങളിൽ 1200 മെഗാവാട്ടിൽ കൂടുതൽ വൈദ്യുതി അധികമായി ആവശ്യമായി വരുന്നുണ്ട്.

കഴിഞ്ഞ ജൂലൈയിൽ പ്രതിദിന ഉപയോഗം 70 ദശലക്ഷം യൂണിറ്റായിരുന്നത് ഇത്തവണ 78 ദശലക്ഷമായി ഉയർന്നിട്ടുണ്ട്. എന്നാൽ അണക്കെട്ടുകളിലെ ജലത്തിന്റെ അളവിൽ കാര്യമായ കുറവുണ്ടായതും വേനൽക്കാലത്ത് മറ്റ് സംസ്ഥാനങ്ങളിൽ നിന്ന് കടം വാങ്ങിയ 530 മെഗാവാട്ട് വൈദ്യുതി തിരിച്ചുനൽകേണ്ടി വന്നതും പ്രതിസന്ധി രൂക്ഷമാക്കി.

വരും ദിവസങ്ങളിലും സംസ്ഥാനത്ത് വൈദ്യുതി നിയന്ത്രണം തുടരേണ്ടി വരുമെന്നാണ് കെഎസ്ഇബിയുടെ വിലയിരുത്തൽ. അതിനിടെ, അപ്രഖ്യാപിത പവർകട്ടിനെതിരെ എബിവിപിയുടെ നേതൃത്വത്തിൽ വൈദ്യുതി ഭവനിലേക്ക് വൻ പ്രതിഷേധ മാർച്ച് നടന്നു.

### Related Links & Sources
- [Original Story Source](https://truevisionnews.com/news/373012/kerala-power-cut-returns-after-10-years-night-outage-)