---
title: "ചാലിയാറിൽ വിഷം കലക്കി മീൻപിടിത്തം: ആയിരക്കണക്കിന് മീൻ ചത്തൊഴുകി,  നാല് പേർ ഫറോക്ക്  പൊലീസിന്റെ പിടിയിൽ "
english_title: "Kozhikode: 4 Arrested For Poisoning Chaliyar River To Catch Fish, Locals Foil Gang"
publisher: "truevisionnews.com"
canonical_url: "https://truevisionnews.com/news/372807/kozhikode-chaliyar-river-poison-fish-arrest-4-persons-faroke-police"
published_at: "2026-07-16T18:54:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a58dbe5cce15_kozhikode-chaliyar-river-poison-fish-arrest-4-persons-faroke-police.jpg"
keywords: ["Chaliyar River", "Kozhikode News", "River Pollution", "Illegal Fishing", "Kerala Environment", "Faroke Police"]
---

# ചാലിയാറിൽ വിഷം കലക്കി മീൻപിടിത്തം: ആയിരക്കണക്കിന് മീൻ ചത്തൊഴുകി,  നാല് പേർ ഫറോക്ക്  പൊലീസിന്റെ പിടിയിൽ 

> **Lead Summary:** കോഴിക്കോട്: ചാലിയാർ നദിയിൽ മാരക വിഷം കലക്കി മീൻ പിടിച്ച നാലംഗ സംഘത്തെ ഫറോക്ക് പൊലീസ് അറസ്റ്റ് ചെയ്തു. നദിയിലെ ജൈവവൈവിധ്യത്തെയും ആവാസവ്യവസ്ഥയെയും സാരമായി ബാധിക്കുന്ന രീതിയിലാണ് പ്രതികൾ മാസങ്ങളായി മീൻപിടിത്തം നടത്തിയിരുന്നത്.

## Article Content

കോഴിക്കോട്: ചാലിയാർ നദിയിൽ മാരക വിഷം കലക്കി മീൻ പിടിച്ച നാലംഗ സംഘത്തെ ഫറോക്ക് പൊലീസ് അറസ്റ്റ് ചെയ്തു. നദിയിലെ ജൈവവൈവിധ്യത്തെയും ആവാസവ്യവസ്ഥയെയും സാരമായി ബാധിക്കുന്ന രീതിയിലാണ് പ്രതികൾ മാസങ്ങളായി മീൻപിടിത്തം നടത്തിയിരുന്നത്.

നാട്ടുകാരുടെ സംഘടിത നീക്കത്തിലും പൊലീസിന്റെ അന്വേഷണത്തിലുമാണ് പ്രതികൾ വലയിലായത്. ചാലിയാറിന്റെ കൈവഴിയായ ചെത്തുപാലം തോടാണ് പ്രതികളുടെ പ്രധാന ലക്ഷ്യസ്ഥാനം. മഴക്കാലത്ത് നദിയിലെ ഒഴുക്ക് കൂടുന്ന സമയങ്ങളിൽ രാത്രിയോടെ സംഘം തോട്ടിലെത്തും. തുടർന്ന് മാരക രാസവസ്തുക്കൾ വെള്ളത്തിൽ കലക്കും.

വിഷം ഏറ്റ് ചത്തൊഴുകുന്ന ആയിരക്കണക്കിന് മത്സ്യങ്ങളെ വലവെച്ച് ശേഖരിച്ച് സമീപ ജില്ലകളിലേക്കും അന്യ സംസ്ഥാനങ്ങളിലേക്കും വിൽപന നടത്തുന്നതായിരുന്നു സംഘത്തിന്റെ രീതി. പലതവണ നാട്ടുകാർ ഇവരെ പിടികൂടാൻ ശ്രമിച്ചെങ്കിലും പരാജയപ്പെട്ടിരുന്നു.

എന്നാൽ ഇക്കഴിഞ്ഞ ചൊവ്വാഴ്ച നാട്ടുകാർ സംഘടിച്ച് കാവൽ നിന്നു. പൊലീസിനും വിവരം നൽകി. സംഘം എത്തിയത് കണ്ടതോടെ മൂന്ന് പേർ നീന്തി രക്ഷപ്പെട്ടു. ഒരാളെ നാട്ടുകാർ കൂട്ടുപിടിച്ച് പിടികൂടി പൊലീസിൽ ഏൽപ്പിച്ചു. ഇയാളെ വിശദമായി ചോദ്യം ചെയ്തപ്പോഴാണ് മറ്റ് മൂന്ന് പ്രതികളെക്കുറിച്ചുള്ള വിവരം ലഭിച്ചത്.അറസ്റ്റിലായവർ മലപ്പുറം മുതുവല്ലൂർ സ്വദേശി മുർഷിദ്, അരീക്കോട് സ്വദേശി മുഹമ്മദ് അനീസ്, എടവണ്ണപ്പാറ സ്വദേശികളായ ഹംസ, അബ്ദുൽ ജലീൽ എന്നിവരാണ്.

ഇവർക്കെതിരെ പരിസ്ഥിതി നിയമങ്ങളും ജലമലിനീകരണ നിയമങ്ങളും പ്രകാരം കേസെടുത്തിട്ടുണ്ട്. പ്രതികളെ വിശദമായി ചോദ്യം ചെയ്ത ശേഷം കോടതിയിൽ ഹാജരാക്കും.വിഷം കലക്കിയുള്ള മീൻപിടിത്തം ചാലിയാറിലെ മത്സ്യസമ്പത്തിനും ജലജീവികൾക്കും വലിയ നാശമാണ് ഉണ്ടാക്കുന്നതെന്ന് ജലവിഭവ വകുപ്പ് ഉദ്യോഗസ്ഥർ പറഞ്ഞു.

ഇത്തരം പ്രവർത്തനങ്ങൾക്കെതിരെ കർശന നടപടി സ്വീകരിക്കുമെന്ന് ഫറോക്ക് പൊലീസും അറിയിച്ചു. നദി സംരക്ഷണത്തിന്റെ ഭാഗമായി നാട്ടുകാരുടെ ജാഗ്രതാ സമിതികൾക്ക് കൂടുതൽ അധികാരം നൽകണമെന്ന ആവശ്യവും ഉയർന്നിട്ടുണ്ട്.

### Related Links & Sources
- [Original Story Source](https://truevisionnews.com/news/372807/kozhikode-chaliyar-river-poison-fish-arrest-4-persons-faroke-police)