---
title: "' ബിജെപി എല്ലാക്കാലത്തും അയോധ്യയെ രാഷ്ട്രീയ നേട്ടത്തിന് മാത്രം ഉപയോഗിക്കുന്നു, ഇത്രയും വലിയ കൊള്ള നടന്നിട്ടും പ്രധാനമന്ത്രിക്ക് മൗനം' - കെ സി വേണുഗോപാല്‍"
english_title: "KC Venugopal serious allegations Ayodhya Ram temple donations   "
publisher: "truevisionnews.com"
canonical_url: "https://truevisionnews.com/news/371752/kc-venugopal-serious-allegations-ayodhya-ram-temple-donations"
published_at: "2026-07-11T08:46:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a51b60b9ccf0_KC.jpg"
keywords: ["Ayodhya Ram Temple", "Ayodhya Ram Temple donation loot", "KC Venugopal", "Prime Minister Narendra Modi", "Latest News"]
---

# ' ബിജെപി എല്ലാക്കാലത്തും അയോധ്യയെ രാഷ്ട്രീയ നേട്ടത്തിന് മാത്രം ഉപയോഗിക്കുന്നു, ഇത്രയും വലിയ കൊള്ള നടന്നിട്ടും പ്രധാനമന്ത്രിക്ക് മൗനം' - കെ സി വേണുഗോപാല്‍

> **Lead Summary:** **തൃശൂര്‍: **അയോധ്യ രാമക്ഷേത്ര നിർമ്മാണത്തിനായി ഭക്തർ നൽകിയ സംഭാവനകളിൽ കോടികളുടെ തിരിമറി നടന്നെന്ന ആരോപണം ശക്തമാകുന്നു. ട്രസ്റ്റ് ഭാരവാഹികൾക്കെതിരെ ഗുരുതര ആരോപണങ്ങളുമായി എഐസിസി ജനറൽ സെക്രട്ടറി കെ.സി. വേണുഗോപാൽ രംഗത്തെത്തി

## Article Content

**തൃശൂര്‍: **അയോധ്യ രാമക്ഷേത്ര നിർമ്മാണത്തിനായി ഭക്തർ നൽകിയ സംഭാവനകളിൽ കോടികളുടെ തിരിമറി നടന്നെന്ന ആരോപണം ശക്തമാകുന്നു. ട്രസ്റ്റ് ഭാരവാഹികൾക്കെതിരെ ഗുരുതര ആരോപണങ്ങളുമായി എഐസിസി ജനറൽ സെക്രട്ടറി കെ.സി. വേണുഗോപാൽ രംഗത്തെത്തി

സാധാരണക്കാരായ ജനങ്ങള്‍ നല്‍കിയ സ്വര്‍ണവും പണവുമാണ് കൊള്ളയടിക്കപ്പെട്ടിരിക്കുന്നതെന്ന് അദ്ദേഹം പറഞ്ഞു. ഇതെല്ലാം നടന്നത് ട്രസ്റ്റ് ഭാരവാഹിളുടെ അറിവോടെയാണെന്നും അദ്ദേഹം ആരോപിച്ചു. സിസിടിവി ദൃശ്യങ്ങള്‍ നീക്കം ചെയ്യപ്പെട്ടു. സെക്യൂരിറ്റി ഉദ്യോഗസ്ഥന്‍ തന്നെ സുരക്ഷയെ കുറിച്ച് മുന്നറിയിപ്പ് നല്‍കിയിരുന്നിട്ടും അവഗണിച്ചെന്നും അദ്ദേഹം പറഞ്ഞു.

രാജ്യത്തിന്റെ പ്രധാനമന്ത്രി നേരിട്ട് നിയമിച്ച ട്രസ്റ്റാണ് അവിടെ ഉള്ളത്. എന്നാല്‍ ഇത്രയും വലിയ കൊള്ള നടന്നിട്ടും പ്രധാനമന്ത്രി മൗനം പാലിക്കുകയാണെന്നും അദ്ദേഹം ആരോപിച്ചു. കുറ്റവാളികളെ സംരക്ഷിക്കാനുള്ള ഒത്താശയാണ് കേന്ദ്രസര്‍ക്കാരും സംസ്ഥാന സര്‍ക്കാരും നടത്തുന്നത്.

കേന്ദ്ര ആഭ്യന്തര മന്ത്രിയും മിണ്ടുന്നില്ല. വിശ്വാസത്തിനെതിരായ കടന്നാക്രമണമാണ് ഇവിടെ നടന്നിട്ടുള്ളതെന്നും അദ്ദേഹം പറഞ്ഞു. അയോധ്യ കോണ്‍ഗ്രസിന് രാഷ്ട്രീയ വിഷയമല്ല. എന്നാല്‍ ബിജെപി എല്ലാക്കാലത്തും രാഷ്ട്രീയ നേട്ടത്തിന് വേണ്ടിയാണ് അയോധ്യയെ ഉപയോഗിച്ചിട്ടുള്ളത്.

പാര്‍ലമെന്റ് സമ്മേളനത്തില്‍ ഏറ്റവും കൂടുതല്‍ ചോദ്യം ഉയരാന്‍ പോകുന്നതും അയോധ്യ കൊള്ളയില്‍ ആയിരിക്കുമെന്നും അദ്ദേഹം വ്യക്തമാക്കി. സുപ്രീംകോടതി മേല്‍നോട്ടം വഹിക്കുന്ന ഒരു അന്വേഷണം കൊണ്ട് മാത്രമേ യഥാര്‍ത്ഥ കുറ്റവാളികളെ കണ്ടെത്താന്‍ കഴിയൂ എന്നും അദ്ദേഹം ചൂണ്ടിക്കാട്ടി.

അയോധ്യ രാമക്ഷേത്ര കൊള്ളയില്‍ കേരളത്തിലെ ബിജെപി എന്താണ് മിണ്ടാത്തതെന്നും അദ്ദേഹം ചോദിച്ചു. രാമക്ഷേത്രം കൊള്ളയടിച്ചത് ബിജെപി തന്നെയെന്നും അദ്ദേഹം ആരോപിച്ചു. ബദരിനാഥ് , കേദാര്‍നാഥ് ക്ഷേത്രങ്ങളിലും കൊളള നടന്നെന്ന ആരോപണവുമുണ്ടായി. കോണ്‍ഗ്രസ് രാജ്യവ്യാപകമായി വിഷയത്തില്‍ പ്രതിഷേധിക്കുമെന്നും അദ്ദേഹം പറഞ്ഞു.

ദേശീയ മാധ്യമങ്ങള്‍ സംഭവത്തില്‍ കേന്ദ്രത്തെ വിമര്‍ശിക്കാന്‍ ഭയക്കുന്നുവെന്നും അദ്ദേഹം കുറ്റപ്പെടുത്തി. 12 വര്‍ഷത്തിനിടെ ഒരു വാര്‍ത്താ സമ്മേളനം പോലും നടത്താത്ത ആളാണ് പ്രധാനമന്ത്രിയെന്നും വിമര്‍ശിച്ചു. കെപിസിസി പ്രസിഡന്റ് ചര്‍ച്ചയില്‍ പ്രസിഡന്റ് ഉടന്‍ വരുമെന്നും ശുഭമായി എല്ലാം പര്യവസാനിക്കുമെന്നുമായിരുന്നു അദ്ദേഹത്തിന്റെ മറുപടി. അതേസമയം വിഴഞ്ഞത്തെ വിദേശനിക്ഷേപ വിവാദത്തില്‍ കെ സി വേണുഗോപാല്‍ പ്രതിരകരിച്ചില്ല. ഇന്നത്തെ തന്റെ ഫോക്കസ് അയോധ്യ എന്നായിരുന്നു വിശദീകരണം.

### Related Links & Sources
- [Original Story Source](https://truevisionnews.com/news/371752/kc-venugopal-serious-allegations-ayodhya-ram-temple-donations)