ഒന്ന് കുളിച്ചൂടെ! ശരീരദുർഗന്ധം കാരണം ജിമ്മിൽ നിന്ന് യുവാവിനെ പുറത്താക്കി; പണം തിരികെ നൽകി അധികൃതർ

ചൈന: (truevisionnews.com) ഹാങ്‌ഷൗവിൽ ഒരു യുവാവിനെ കടുത്ത ശരീരദുർഗന്ധത്തെത്തുടർന്ന് ജിമ്മിൽ നിന്ന് പുറത്താക്കി. മറ്റ് അംഗങ്ങളുടെ തുടർച്ചയായ പരാതികളെത്തുടർന്നാണ് ജിം അധികൃതർ ഇത്തരമൊരു കടുത്ത നടപടിയിലേക്ക് നീങ്ങിയത്. യുവാവിന്റെ മൂന്ന് വർഷത്തെ അംഗത്വം റദ്ദാക്കിയ അധികൃതർ, അടച്ച പണം തിരികെ നൽകുകയും ചെയ്തു.

സെജിയാങ് പ്രവിശ്യയിലെ ഹാങ്‌ഷൗവിൽ താമസിക്കുന്ന 'ഷി' എന്ന യുവാവിനാണ് ദുരനുഭവമുണ്ടായത്. 2025 മെയ് മാസത്തിൽ, 2028 ഏപ്രിൽ വരെ കാലാവധിയുള്ള മൂന്ന് വർഷത്തെ അംഗത്വത്തിനായി ഇദ്ദേഹം 6,388 യുവാൻ (ഏകദേശം 89,900 രൂപ) ജിമ്മിൽ അടച്ചിരുന്നു.

പത്ത് വർഷം മുൻപ് 125 കിലോഗ്രാമായിരുന്ന തന്റെ ഭാരം 80 കിലോയിലേക്ക് കുറച്ച ഷി ഒരു കടുത്ത ഫിറ്റ്‌നസ് പ്രേമിയാണ്. ആഴ്ചയിൽ അഞ്ച് ദിവസവും അദ്ദേഹം സ്ഥിരമായി ജിമ്മിലെത്താറുണ്ടായിരുന്നു.

എങ്കിലും, ഷിയുടെ ശരീരദുർഗന്ധം മറ്റ് അംഗങ്ങൾക്ക് വലിയ ബുദ്ധിമുട്ടുണ്ടാക്കി. പലതവണ പരാതികൾ ഉയർന്നതോടെ ജിം അധികൃതർ പ്രതിസന്ധിയിലായി. ഒടുവിൽ അംഗത്വം റദ്ദാക്കി പണം തിരികെ നൽകാൻ ജിം മാനേജ്മെന്റ് തീരുമാനിക്കുകയായിരുന്നു. മറ്റൊരു ജിമ്മിൽ പോയി വ്യായാമം ചെയ്യുന്നതിനായി മൂന്ന് മാസത്തെ സൗജന്യ പാസ് കൂടി നൽകിയാണ് അധികൃതർ ഇദ്ദേഹത്തെ യാത്രയാക്കിയത്. എന്തൊക്കെ സുഗന്ധദ്രവ്യങ്ങൾ ഉപയോഗിച്ചിട്ടും ശരീരദുർഗന്ധം മാറ്റാൻ സാധിച്ചില്ലെന്ന് യുവാവ് തന്നെ സമ്മതിച്ചതായാണ് റിപ്പോർട്ടുകൾ.

Content Highlight: Young man kicked out of gym due to body odor.

#Latest News #China #Young Man Kicked Out Of Gym