കോളടിച്ചല്ലോ! പൊങ്കൽ ആഘോഷത്തിന് റേഷൻ കാർഡ് ഉടമകൾക്ക് തമിഴ്നാട് സർക്കാരിൻ്റെ സൗജന്യ വസ്ത്ര വിതരണം;300 കോടി അനുവദിച്ചു

ചെന്നൈ: (truevisionnews.com) വരാനിരിക്കുന്ന പൊങ്കൽ ഉത്സവത്തിന് മുന്നോടിയായി സംസ്ഥാനത്തെ റേഷൻ കാർഡ് ഉടമകൾക്ക് സൗജന്യമായി സാരിയും മുണ്ടും നൽകാനുള്ള പദ്ധതിക്ക് തമിഴ്നാട് സർക്കാർ ഭരണാനുമതി നൽകി. പദ്ധതി നടപ്പിലാക്കുന്നതിൻ്റെ ഭാഗമായി വസ്ത്രങ്ങൾ നിർമ്മിക്കുന്നതിനും സംഭരിക്കുന്നതിനുമായി ആദ്യഘട്ടത്തിൽ 300 കോടി രൂപയാണ് സർക്കാർ അനുവദിച്ചിരിക്കുന്നത്.

കൈത്തറി, കരകൗശല, വസ്ത്രവകുപ്പ് ഇത് സംബന്ധിച്ച ഉത്തരവ് പുറപ്പെടുവിച്ചു. സംസ്ഥാനത്തെ പരമ്പരാഗത കൈത്തറി മേഖലയെ പ്രോത്സാഹിപ്പിക്കുന്നതിൻ്റെ ഭാഗമായി, സഹകരണ സംഘങ്ങളിലെ നെയ്ത്തുകാരിൽ നിന്ന് നേരിട്ടാണ് വസ്ത്രങ്ങൾ സംഭരിക്കുന്നത്. ഹാൻഡ്‌ലൂം ഡയറക്ടറേറ്റിൻ്റെ നേരിട്ടുള്ള മേൽനോട്ടത്തിലായിരിക്കും നിർമ്മാണ പ്രവർത്തനങ്ങൾ. പൂർത്തിയാകുന്ന വസ്ത്രങ്ങൾ തമിഴ്നാട് സിവിൽ സപ്ലൈസ് കോർപറേഷൻ്റെ ഗോഡൗണുകളിൽ സൂക്ഷിക്കും.

ആകെ 642.88 കോടി രൂപയാണ് ഈ പദ്ധതിക്കായി സർക്കാർ വകയിരുത്തിയിട്ടുള്ളത്. ഇത്തവണ പൊങ്കൽ വിതരണത്തിനായി പുതിയ ഡിസൈനുകളിലുള്ള സാരികളും മുണ്ടുകളും അവതരിപ്പിക്കാൻ സർക്കാർ തീരുമാനിച്ചിട്ടുണ്ട്.

അതിനാൽ നിലവിൽ സ്റ്റോക്കുള്ള പഴയ വസ്ത്രങ്ങൾ ദീപാവലി പ്രമാണിച്ച് വാർധക്യ പെൻഷൻ ഗുണഭോക്താക്കൾക്ക് വിതരണം ചെയ്യും. കണക്കുകൾ പ്രകാരം ഏകദേശം 2.27 കോടി സാരികളും 2.25 കോടി മുണ്ടുകളുമാണ് സംസ്ഥാനത്ത് വിതരണത്തിനായി വേണ്ടിവരിക.

Also read: പൊലീസുകാരന്റെ മുഖത്തടിച്ച് കെ.എസ്.യു ജില്ലാ പ്രസിഡന്റ്; കൽപ്പറ്റയിൽ യൂത്ത് കോൺഗ്രസ് മാർച്ചിൽ വൻ സംഘർഷം

പദ്ധതിയുടെ സുഗമമായ നടത്തിപ്പ് ഉറപ്പാക്കാൻ റവന്യൂ അഡ്മിനിസ്ട്രേഷൻ കമ്മീഷണർ, സിവിൽ സപ്ലൈസ് കമ്മീഷണർ, ഹാൻഡ്‌ലൂം ആൻ്റ് ടെക്സ്റ്റൈൽസ് ഡയറക്ടർ എന്നിവരടങ്ങുന്ന ഉന്നതതല മേൽനോട്ട സമിതിയെയും സർക്കാർ നിയോഗിച്ചിട്ടുണ്ട്. നിശ്ചയിച്ച സമയത്തിനുള്ളിൽ തന്നെ വസ്ത്രവിതരണം പൂർത്തിയാക്കാൻ ഈ സമിതി കർശന നിരീക്ഷണം നടത്തും.

Content Highlight: Tamil Nadu government's free clothing distribution for Pongal celebrations

#Latest News #Chennai #Pongal Celebrations #Tamil Nadu Government's Free Clothes Distribution