---
title: "'അയ്യേ ....ഏതെങ്കിലും ഒരു വനിതാമന്ത്രി ആയിരിക്കേണ്ടിയിരുന്നു, പുകില്‍ ആയേനെ'; മുഖ്യമന്ത്രിയുടെ പുതിയ 'പൂക്കി എക്‌സ്പ്രഷനെ' വിമര്‍ശിച്ച് എഴുത്തുകാരി ശാരദക്കുട്ടി"
english_title: "Writer Saradakutty criticizes Chief Minister VD Satheesan's new 'Pookie Expression'"
publisher: "truevisionnews.com"
canonical_url: "https://truevisionnews.com/news/369684/writer-saradakutty-criticizes-chief-minister-vd-satheesans-new-pookie-expression"
published_at: "2026-07-01T12:33:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a44bc063c91d_sharathakutty.jpg"
keywords: ["Latest News", "CM Pookie Expression", "V D Satheesan", "Chief Minister", "Saradakutty"]
---

# 'അയ്യേ ....ഏതെങ്കിലും ഒരു വനിതാമന്ത്രി ആയിരിക്കേണ്ടിയിരുന്നു, പുകില്‍ ആയേനെ'; മുഖ്യമന്ത്രിയുടെ പുതിയ 'പൂക്കി എക്‌സ്പ്രഷനെ' വിമര്‍ശിച്ച് എഴുത്തുകാരി ശാരദക്കുട്ടി

> **Lead Summary:** **കൊച്ചി: ** മുഖ്യമന്ത്രി വിഡി സതീശന്റെ പുതിയ 'പൂക്കി എക്‌സ്പ്രഷനെ' വിമര്‍ശിച്ച് എഴുത്തുകാരി ശാരദക്കുട്ടി. മുഖ്യമന്ത്രിയുടെ വൈറല്‍ ആയ ആദ്യ 'പൂക്കി എക്‌സ്പ്രഷ'നിലേക്കു നയിച്ച ചോദ്യം ഉന്നയിച്ച വ്‌ളോഗറെ കണ്ടപ്പോഴുള്ള പുതിയ മുഖഭാവമാണ് വിമര്‍ശനത്തിന് ഇടയാക്കിയിരിക്കുന്നത്.

## Article Content

**കൊച്ചി: ** മുഖ്യമന്ത്രി വിഡി സതീശന്റെ പുതിയ 'പൂക്കി എക്‌സ്പ്രഷനെ' വിമര്‍ശിച്ച് എഴുത്തുകാരി ശാരദക്കുട്ടി. മുഖ്യമന്ത്രിയുടെ വൈറല്‍ ആയ ആദ്യ 'പൂക്കി എക്‌സ്പ്രഷ'നിലേക്കു നയിച്ച ചോദ്യം ഉന്നയിച്ച വ്‌ളോഗറെ കണ്ടപ്പോഴുള്ള പുതിയ മുഖഭാവമാണ് വിമര്‍ശനത്തിന് ഇടയാക്കിയിരിക്കുന്നത്.

പുതിയ മുഖ്യമന്ത്രി ആയതുകൊണ്ടാണ് അന്നത്തെ എക്‌സ്പ്രഷന്‍ കണ്ട് ആളുകള്‍ അത്ഭുതപ്പെട്ടതെന്നും അന്നു കയ്യടിച്ചവര്‍ പോലും ഇപ്പോള്‍ അയ്യേ എന്നു പറയുമെന്നും ശാരദക്കുട്ടി ഫെയ്‌സ്ബുക്ക് പോസ്റ്റില്‍ പറഞ്ഞു. മുഖ്യമന്ത്രി സലിം കുമാറിന്റെ സുഹൃത്തു മാത്രമായിരുന്നു, സലിം കുമാറല്ലെന്നും പോസ്റ്റില്‍ വിമര്‍ശനമുണ്ട്.

കുറിപ്പ്:

***ഇത് Al creation ആണെങ്കില്‍ ഒന്നും പറയാനില്ല. അല്ലെങ്കില്‍ മഹാമോശം. ഒരിക്കല്‍ ഒരുഎക്സ്പ്രഷൻ കാണിച്ചപ്പോള്‍ ആള്‍ക്കാര്‍ അത്ഭുതപ്പെട്ടത് പുതിയ മുഖ്യമന്ത്രി ആയതുകൊണ്ടാണ്. ഒരു സി എമ്മിനെ അങ്ങനെയൊന്നും കണ്ടിട്ടില്ലാത്തതു കൊണ്ടുണ്ടായ 'ആദ്യരോമാഞ്ച കുഡ്മള'മായിരുന്നു അത്. അന്ന് ക്യൂട്ട് എന്ന് കയ്യടിച്ചവര്‍ പോലും ഇന്ന് ഇത് കണ്ടാല്‍ അയ്യേ എന്നുള്ളിലെങ്കിലും പറഞ്ഞു പോകും.***

***സി എം ആയതു കൊണ്ട് കയ്യടിക്കേണ്ടവര്‍ ചിലരുണ്ടാകും. സി എം അല്ലെങ്കില്‍ത്തന്നെയും ഇതൊരു മോശം പ്രവണതയാണ്. ഏതെങ്കിലും ഒരു വനിതാമന്ത്രി ആയിരിക്കേണ്ടിയിരുന്നു. പുകില്‍ ആയേനെ.***

***സി എമ്മിന് ഇഷ്ടമാകുമോ മറ്റൊരാള്‍ അദ്ദേഹത്തെ നോക്കി ഇങ്ങനെ കാണിച്ചാല്‍ ? വീണ്ടും പറയട്ടെ ഇതൊരു Al creation ആയിരുന്നെങ്കിലെന്നാശിക്കുന്നു***

***സി എം മികച്ച നടനായിരുന്ന സലിം കുമാറിന്റെ സൃഹൃത്ത് മാത്രമാണ്. സിനിമയിലെ സലിം കുമാറല്ല. ആകുകയുമരുത്. അങ്ങയോടുള്ള ജനങ്ങളുടെ സ്നേഹം നിലനിന്നു കാണാന്‍ തന്നെയാണാഗ്രഹം.***

### Related Links & Sources
- [Original Story Source](https://truevisionnews.com/news/369684/writer-saradakutty-criticizes-chief-minister-vd-satheesans-new-pookie-expression)