മൊബൈൽ ഉപയോഗം ചോദ്യം ചെയ്തു; അമ്മായിയമ്മയെ കുത്തിപ്പരിക്കേൽപ്പിച്ച മരുമകൾ അറസ്റ്റിൽ

ഗോരഖ്പൂർ: (truevisionnews.com) രാത്രി വൈകി മൊബൈൽ ഫോണിൽ സംസാരിക്കുന്നത് വിലക്കിയതിന് അമ്മായിയമ്മയെ കുത്തിപ്പരിക്കേൽപ്പിച്ച മരുമകൾ അറസ്റ്റിൽ. ഉത്തർപ്രദേശിലെ ഗോരഖ്പൂരിലാണ് സംഭവം. ഉറങ്ങിക്കിടക്കുകയായിരുന്ന അമ്മായിയമ്മയെ കത്തികൊണ്ട് കുത്തുകയായിരുന്നു. തിങ്കളാഴ്ച രാത്രി 11 മണിയോടെയായിരുന്നു ആക്രമണം.

അമ്മായിയമ്മയുടെ പുറകിലാണ് കുത്തേറ്റത്. ഇവരുടെ നിലവിളി കേട്ട് കുടുംബാംഗങ്ങൾ ഉണർന്നതോടെ, മൂന്ന് മാസം പ്രായമുള്ള കുഞ്ഞിനെയും കൂട്ടി മരുമകൾ വീട്ടിൽ നിന്ന് ഓടിപ്പോയി. ഗുരുതരമായി പരിക്കേറ്റ സ്ത്രീയെ എയിംസ് ആശുപത്രിയിൽ പ്രവേശിപ്പിച്ചു.

അമ്മായിയപ്പൻ നൽകിയ പരാതിയുടെ അടിസ്ഥാനത്തിൽ എയിംസ് പോലീസ് കേസെടുത്ത് മരുമകളെ അറസ്റ്റ് ചെയ്തു. രാത്രി വൈകി മറ്റാരോടോ സംസാരിക്കുന്നത് അമ്മായിയമ്മ വിലക്കുകയും വഴക്കുപറയുകയും ചെയ്തതിലുള്ള വൈരാഗ്യമാണ് ആക്രമണത്തിന് കാരണമെന്ന് പരിക്കേറ്റ സ്ത്രീ ആരോപിച്ചു. കൊലപ്പെടുത്തണമെന്ന ഉദ്ദേശത്തോടെയാണ് മരുമകൾ ആക്രമിച്ചതെന്നും ഇവർ മൊഴി നൽകി.

കർഷകനായ അമ്മായിയപ്പന്റെ മൂത്ത മകന്റെ ഭാര്യയാണ് പ്രതി. മകൻ ഡൽഹിയിൽ ജോലി ചെയ്യുന്നതിനാൽ മരുമകൾ അമ്മായിയമ്മയ്ക്കൊപ്പമാണ് താമസിച്ചിരുന്നത്. സംഭവത്തിൽ പോലീസ് അന്വേഷണം തുടരുകയാണ്.

Content Highlight: Daughter-in-law arrested for stabbing mother-in-law

#Latest News #Daughter In Law Arrested #Stabbing Mother In Law