---
title: "ഫ്രിഡ്ജിലെ ഭക്ഷണം ചൂടാക്കി കഴിക്കാറുണ്ടോ? ഈ അഞ്ച് തെറ്റുകൾ ഒഴിവാക്കിയില്ലെങ്കിൽ പണികിട്ടും!"
english_title: "Things to keep in mind when reheating food from the fridge"
publisher: "truevisionnews.com"
canonical_url: "https://truevisionnews.com/news/368738/things-to-keep-in-mind-when-reheating-food-from-the-fridge"
published_at: "2026-06-27T11:48:00+05:30"
category: "Health"
language: "ml"
image: "https://cf.zdn.im/img/truevisionnews.com/0/image-uploads/6a3f6bb5cdb10_xcvbnm,.jpg"
keywords: ["Latest News", "Health News", "Reheating Food From The Fridge"]
---

# ഫ്രിഡ്ജിലെ ഭക്ഷണം ചൂടാക്കി കഴിക്കാറുണ്ടോ? ഈ അഞ്ച് തെറ്റുകൾ ഒഴിവാക്കിയില്ലെങ്കിൽ പണികിട്ടും!

> **Lead Summary:** **[**ഫ്രിഡ്ജിൽ സൂക്ഷിച്ച ഭക്ഷണം വീണ്ടും ചൂടാക്കി ഉപയോഗിക്കുന്നത് പലരുടെയും ശീലമാണ്. സമയം ലാഭിക്കാനും ഭക്ഷണം പാഴാകാതിരിക്കാനും ഇത് സഹായിക്കുമെങ്കിലും, ശരിയായ രീതിയിലല്ല ഇത് ചെയ്യുന്നതെങ്കിൽ ഗുരുതരമായ ആരോഗ്യപ്രശ്നങ്ങൾക്ക് കാരണമാകും.

## Article Content

**[**ഫ്രിഡ്ജിൽ സൂക്ഷിച്ച ഭക്ഷണം വീണ്ടും ചൂടാക്കി ഉപയോഗിക്കുന്നത് പലരുടെയും ശീലമാണ്. സമയം ലാഭിക്കാനും ഭക്ഷണം പാഴാകാതിരിക്കാനും ഇത് സഹായിക്കുമെങ്കിലും, ശരിയായ രീതിയിലല്ല ഇത് ചെയ്യുന്നതെങ്കിൽ ഗുരുതരമായ ആരോഗ്യപ്രശ്നങ്ങൾക്ക് കാരണമാകും.

ഭക്ഷണം സുരക്ഷിതമായി വീണ്ടും ചൂടാക്കാൻ ശ്രദ്ധിക്കേണ്ട കാര്യങ്ങളെക്കുറിച്ച് ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) മുന്നറിയിപ്പ് നൽകുന്നു. ഭക്ഷണം വീണ്ടും ചൂടാക്കുമ്പോൾ ശ്രദ്ധിക്കേണ്ട പ്രധാന അഞ്ച് കാര്യങ്ങൾ ഇവയാണ്:

**പഴയതും പുതിയതും ഒരുമിച്ച് ചേർക്കരുത്: **തലേദിവസത്തെ ബാക്കി ഭക്ഷണത്തിലേക്ക് അപ്പോൾ പാകം ചെയ്ത പുതിയ ഭക്ഷണം നേരിട്ട് ചേർക്കുന്നത് ഒഴിവാക്കുക. ഇവയുടെ താപനിലയും കേടുകൂടാതെയിരിക്കാനുള്ള ശേഷിയും വ്യത്യസ്തമായിരിക്കും. പഴയ ഭക്ഷണം പൂർണ്ണമായും ചൂടാക്കിയ ശേഷം മാത്രം ആവശ്യമുണ്ടെങ്കിൽ പുതിയതുമായി യോജിപ്പിക്കുക.

**വീണ്ടും വീണ്ടും ചൂടാക്കരുത്: **ഒരു വലിയ പാത്രത്തിലെ ഭക്ഷണം പലതവണ എടുത്ത് ചൂടാക്കുന്ന ശീലം ബാക്ടീരിയകളുടെ വളർച്ചയ്ക്ക് കാരണമാകും. ചൂടാക്കി വീണ്ടും ഫ്രിഡ്ജിൽ വെക്കുമ്പോൾ ഭക്ഷണത്തിന്റെ സുരക്ഷ കുറയുന്നു. അതിനാൽ ഒരു തവണ ചൂടാക്കിയ ശേഷം ബാക്കി വീണ്ടും ഫ്രിഡ്ജിൽ വെക്കുന്നത് ഒഴിവാക്കുക.

**ആവശ്യത്തിന് മാത്രം ചൂടാക്കുക: **പാത്രത്തിലുള്ള ഭക്ഷണം മുഴുവനായി ചൂടാക്കുന്നതിന് പകരം, എത്രയാണോ കഴിക്കാൻ ഉദ്ദേശിക്കുന്നത് അത്രയും മാത്രം ചെറിയ പാത്രത്തിലേക്ക് മാറ്റി ചൂടാക്കുക. ബാക്കിയുള്ളവ ഫ്രിഡ്ജിൽ തന്നെ സുരക്ഷിതമായി വെക്കാം.

**നന്നായി ഇളക്കി ചൂടാക്കുക: **മൈക്രോവേവ് ഓവനിലോ മറ്റോ ഭക്ഷണം ചൂടാക്കുമ്പോൾ ഉൾഭാഗം തണുത്തു തന്നെയിരിക്കാൻ സാധ്യതയുണ്ട്. ഭക്ഷണത്തിന്റെ എല്ലാ ഭാഗത്തും ഒരേപോലെ ചൂട് ലഭിക്കാൻ ഇടയ്ക്കിടെ നന്നായി ഇളക്കിക്കൊടുക്കാൻ ശ്രദ്ധിക്കണം. ഒരേപോലെ ചൂടാകാത്ത ഭക്ഷണത്തിൽ ബാക്ടീരിയകൾ നശിക്കാതെ അവശേഷിക്കും.

**ഫ്രീസറിലെ ഭക്ഷണം നേരിട്ട് ചൂടാക്കരുത്: **ഫ്രീസറിൽ വെച്ച ഐസ് തണുപ്പിലുള്ള ഭക്ഷണം നേരിട്ട് ചൂടാക്കുന്നത് ആരോഗ്യകരമല്ല. ഇത്തരം ഭക്ഷണം ആദ്യം പുറത്തെടുത്ത് ഐസ് ഉരുകാൻ അനുവദിച്ച ശേഷം മാത്രം അടുപ്പത്തോ ഓവനിലോ വെച്ച് ചൂടാക്കുക.

മുന്നറിയിപ്പ്: ഭക്ഷണം കേടായതാണെന്ന് പുറമെ നോക്കിയാലോ മണത്താലോ ചിലപ്പോൾ മനസ്സിലാകില്ല. ശരിയായ രീതിയിലല്ല ഭക്ഷണം ചൂടാക്കുന്നതെങ്കിൽ ദോഷകരമായ ബാക്ടീരിയകൾ വർധിക്കുകയും ഭക്ഷ്യവിഷബാധയുണ്ടാകുകയും ചെയ്യും. ഇത് ഛർദ്ദി, വയറിളക്കം, വയറുവേദന, പനി തുടങ്ങിയ ആരോഗ്യപ്രശ്നങ്ങളിലേക്ക് നയിക്കാം. അതിനാൽ ഭക്ഷണം ചൂടാക്കുമ്പോൾ അത്യന്തം ശ്രദ്ധ പുലർത്തുക.

### Related Links & Sources
- [Original Story Source](https://truevisionnews.com/news/368738/things-to-keep-in-mind-when-reheating-food-from-the-fridge)