വിജയിയുടെ വെല്ലുവിളിക്ക് പിന്നാലെ സ്റ്റാലിൻ വീണ്ടും മത്സരത്തിന്? തൃച്ചിയിൽ ഉപതെരഞ്ഞെടുപ്പിന് കളമൊരുങ്ങുന്നതായി സൂചന

ചെന്നൈ:( https://truevisionnews.com/)  തമിഴ്‌നാട് രാഷ്ട്രീയത്തെ ചൂടുപിടിപ്പിച്ചു കൊണ്ട് മുൻ മുഖ്യമന്ത്രി എം. കെ. സ്റ്റാലിൻ വീണ്ടും തെരഞ്ഞെടുപ്പ് ഗോദയിലേക്ക് ഇറങ്ങുന്നതായി റിപ്പോർട്ടുകൾ. മുഖ്യമന്ത്രി വിജയ് രാജിവെക്കുന്നതോടെ ഉപതെരഞ്ഞെടുപ്പ് നടക്കാൻ സാധ്യതയുള്ള തൃച്ചി ഈസ്റ്റ് മണ്ഡലത്തിൽ സ്റ്റാലിൻ മത്സരിച്ചേക്കുമെന്നാണ് പുറത്തുവരുന്ന സൂചനകൾ.

ഡി.എം.കെ നേതാവും തൃച്ചി വെസ്റ്റ് എം.എൽ.എയുമായ കെ. എൻ. നെഹ്‌റുവിന്റെ സമീപകാല പരാമർശമാണ് ഈ ചർച്ചകൾക്ക് വഴിതുറന്നത്. സ്റ്റാലിൻ എത്രയും വേഗം നിയമസഭയിലേക്ക് തിരിച്ചെത്തുമെന്ന് അദ്ദേഹം പരസ്യമായി പ്രഖ്യാപിച്ചെങ്കിലും മണ്ഡലം ഏതാണെന്ന കാര്യം ഔദ്യോഗികമായി വെളിപ്പെടുത്തിയിട്ടില്ല.

കഴിഞ്ഞ ദിവസം തമിഴ്‌നാട് നിയമസഭയിൽ വെച്ച് മുഖ്യമന്ത്രി വിജയും പ്രതിപക്ഷ നേതാവ് ഉദയനിധി സ്റ്റാലിനും തമ്മിൽ കടുത്ത വാക്പോര് നടന്നിരുന്നു. പ്രസംഗത്തിനിടെ ഉദയനിധിയെ നോക്കി 'നിന്റെ അച്ഛനെവിടെ' എന്ന് വിജയ് ചോദിച്ച പരിഹാസം വലിയ രാഷ്ട്രീയ കൊടുങ്കാറ്റാണ് സൃഷ്ടിച്ചത്. ഇതിന് പിന്നാലെ, താൻ ജനങ്ങളുടെ ഹൃദയങ്ങളിലുണ്ടെന്ന മറുപടിയുമായി സ്റ്റാലിനും രംഗത്തെത്തിയിരുന്നു.

നിയമസഭയിലെ തന്റെ ഒരു മണിക്കൂർ നീണ്ട പ്രസംഗത്തിൽ സ്റ്റാലിന്റെ മുൻകാലങ്ങളിലെ പ്രശസ്തമായ കൈ കൊണ്ടുള്ള ആംഗ്യങ്ങൾ വിജയ് അനുകരിച്ച് കാണിച്ചതും വലിയ രീതിയിൽ വൈറലായിരുന്നു. ജനങ്ങൾക്ക് നൽകിയ വാഗ്ദാനങ്ങൾ പാലിക്കാൻ തനിക്ക് കൂടുതൽ സമയം വേണമെന്ന് വിജയ് ആവശ്യപ്പെട്ടതിന് തൊട്ടുപിന്നാലെയാണ്, സ്റ്റാലിനെ വീണ്ടും സഭയിലെത്തിക്കാൻ ഡി.എം.കെ കരുക്കൾ നീക്കുന്നത്. തമിഴ്‌നാട്ടിൽ വിജയ്-സ്റ്റാലിൻ പോര് വരും ദിവസങ്ങളിൽ കൂടുതൽ ശക്തമാകുമെന്നാണ് ഈ നീക്കങ്ങൾ സൂചിപ്പിക്കുന്നത്.

Content Highlight: Stalin to contest again? Reportedly, he will contest from Trichy East

#Latest news #Trichy #Stalin #Vijay