---
title: "ഷേവിങ് അത്ര നിസ്സാരമല്ല! ചർമ്മത്തെ സംരക്ഷിക്കാൻ ഈ 5 കാര്യങ്ങൾ ശ്രദ്ധിക്കാം "
english_title: "Health tips to know when shaving and trimming"
publisher: "truevisionnews.com"
canonical_url: "https://truevisionnews.com/news/367377/health-tips-to-know-when-shaving-and-trimming"
published_at: "2026-06-21T15:09:00+05:30"
category: "Health"
language: "ml"
image: "https://cf.zdn.im/img/truevisionnews.com/0/image-uploads/6a37b17f10904_GFJGJ.jpg"
keywords: ["HEALTH", "shaving  trimming", "Health tips"]
---

# ഷേവിങ് അത്ര നിസ്സാരമല്ല! ചർമ്മത്തെ സംരക്ഷിക്കാൻ ഈ 5 കാര്യങ്ങൾ ശ്രദ്ധിക്കാം 

> **Lead Summary:** നിങ്ങൾ ക്ലീൻ ഷേവ് ചെയ്യാൻ ഇഷ്ടപ്പെടുന്ന ആളാണോ, അതോ വെട്ടിയൊതുക്കിയ താടിയും മീശയും നിലനിർത്താൻ ആഗ്രഹിക്കുന്ന ആളാണോ? ഇടയ്ക്കിടെ താടിയും മുടിയും വെട്ടിയൊതുക്കുന്നതും ഷേവ് ചെയ്യുന്നതുമൊക്കെ നമ്മുടെ നിത്യജീവിതത്തിലെ സാധാരണ ശീലങ്ങളാണ്. എന്നാൽ, വ്യക്തിശുചിത്വത്തിന്റെയും ആകർഷകമായ ലുക്കിന്റെയും ഭാഗമായി നമ്മൾ ചെയ്യുന്ന ഈ കാര്യങ്ങൾ ചർമ്മത്തിന്റെ ആന്തരിക ആരോഗ്യവുമായി നേരിട്ട് ബന്ധപ്പെട്ടിരിക്കുന്നു എന്ന യാഥാർഥ്യം പലർക്കും അറിയില്ല.

## Article Content

നിങ്ങൾ ക്ലീൻ ഷേവ് ചെയ്യാൻ ഇഷ്ടപ്പെടുന്ന ആളാണോ, അതോ വെട്ടിയൊതുക്കിയ താടിയും മീശയും നിലനിർത്താൻ ആഗ്രഹിക്കുന്ന ആളാണോ? ഇടയ്ക്കിടെ താടിയും മുടിയും വെട്ടിയൊതുക്കുന്നതും ഷേവ് ചെയ്യുന്നതുമൊക്കെ നമ്മുടെ നിത്യജീവിതത്തിലെ സാധാരണ ശീലങ്ങളാണ്. എന്നാൽ, വ്യക്തിശുചിത്വത്തിന്റെയും ആകർഷകമായ ലുക്കിന്റെയും ഭാഗമായി നമ്മൾ ചെയ്യുന്ന ഈ കാര്യങ്ങൾ ചർമ്മത്തിന്റെ ആന്തരിക ആരോഗ്യവുമായി നേരിട്ട് ബന്ധപ്പെട്ടിരിക്കുന്നു എന്ന യാഥാർഥ്യം പലർക്കും അറിയില്ല.

ആരോഗ്യ വിദ​ഗ്ധരുടെ അഭിപ്രായത്തിൽ ഷേവിങ് എന്നത് നമ്മൾ വിചാരിക്കുന്നതുപോലെ അത്ര ലളിതമായൊരു കാര്യമല്ല. രോമങ്ങൾ നീക്കം ചെയ്യുന്നത് ശരീരത്തിന്റെ മൊത്തത്തിലുള്ള ആരോഗ്യത്തിന് നല്ലതാണെങ്കിലും, ശരിയായ രീതിയിലല്ല ഇത് ചെയ്യുന്നതെങ്കിൽ ചില ഗുരുതരമായ ചർമപ്രശ്നങ്ങൾക്ക് അത് വഴിതെളിച്ചേക്കാം. ഷേവിങ്, ട്രിമ്മിങ് ശീലങ്ങളുടെ ഗുണങ്ങളും ശ്രദ്ധിക്കേണ്ട കാര്യങ്ങളും എന്തൊക്കെയെന്ന് പരിശോധിക്കാം:

**ഷേവിങ്ങും ട്രിമ്മിങ്ങും നൽകുന്ന ആരോഗ്യ ഗുണങ്ങൾ**

വിയർപ്പും ദുർഗന്ധവും കുറയ്ക്കുന്നു: അമിതമായി രോമമുള്ള ഭാഗങ്ങളിൽ വിയർപ്പ് തങ്ങിനിൽക്കാനും ബാക്ടീരിയകൾ അതിവേഗം വളരാനും സാധ്യതയുണ്ട്. രോമങ്ങൾ വെട്ടിയൊതുക്കുമ്പോൾ ചർമം ഉണങ്ങിയിരിക്കുകയും ബാക്ടീരിയ മൂലമുള്ള അണുബാധകൾ തടയുകയും ചെയ്യും.

ചർമത്തിലെ അസ്വസ്ഥതകൾ ഒഴിവാക്കുന്നു: കടുത്ത ചൂടുകാലത്ത് രോമങ്ങൾ അമിതമായാൽ ചർമത്തിലേക്കുള്ള വായുസഞ്ചാരം കുറയും. ഇത് വിയർപ്പുകുരുക്കൾക്കും കടുത്ത ചൊറിച്ചിലിനും കാരണമാകും. രോമങ്ങൾ കൃത്യമായി പരിപാലിക്കുന്നത് ഇത്തരം പ്രശ്നങ്ങൾ കുറയ്ക്കാൻ സഹായിക്കും.

**ശ്രദ്ധിച്ചില്ലെങ്കിൽ ഉണ്ടാകുന്ന പ്രശ്നങ്ങളും പരിഹാരങ്ങളും**

ട്രിം ചെയ്യുന്നതിന് പകരം ബ്ലേഡ് ഉപയോഗിച്ച് തുടർച്ചയായി ഷേവ് ചെയ്യുമ്പോൾ രോമങ്ങൾ ചർമത്തിന് ഉള്ളിലേക്ക് വളരാൻ സാധ്യതയുണ്ട്. ഇത് ആ ഭാഗത്ത് ചെറിയ കുരുക്കളും കടുത്ത വേദനയും ഉണ്ടാക്കും.

 ഒരേ ബ്ലേഡോ ട്രിമ്മറോ വൃത്തിയാക്കാതെ വീണ്ടും ഉപയോഗിക്കുന്നത് ചർമത്തിലുണ്ടാകുന്ന ചെറിയ മുറിവുകളിലൂടെ അണുബാധകൾ ശരീരത്തിൽ പ്രവേശിക്കാൻ കാരണമാകും. അതിനാൽ ഉപകരണങ്ങൾ എപ്പോഴും വൃത്തിയായി സൂക്ഷിക്കുക.

പൂർണമായി ഷേവ് ചെയ്യുന്നതിനേക്കാൾ ട്രിം ചെയ്യുന്നതാണ് ചർമത്തിന് എപ്പോഴും സുരക്ഷിതമെന്ന് ഡോക്ടർമാർ വ്യക്തമാക്കുന്നു. കാരണം, ട്രിം ചെയ്യുമ്പോൾ ചർമത്തിന് നേരിട്ട് പരിക്കുകൾ ഏൽക്കുന്നില്ല.

 വരണ്ട ചർമ്മത്തിൽ നേരിട്ട് ബ്ലേഡ് ഉപയോഗിച്ച് ഷേവ് ചെയ്യുന്നത് ഗുണത്തേക്കാളേറെ ദോഷം ചെയ്യും. ഇത് ചർമത്തിന്റെ സ്വാഭാവികമായ ആവരണത്തെ നശിപ്പിക്കും.

 ഷേവ് ചെയ്യുന്നവർ നല്ല നിലവാരമുള്ള ഷേവിങ് ക്രീമുകളും മോയ്സ്ചറൈസറുകളും നിർബന്ധമായും ഉപയോഗിക്കേണ്ടതുണ്ട്. എപ്പോഴും ലൂബ്രിക്കേഷനോടെ (ക്രീം അല്ലെങ്കിൽ ജെൽ ഉപയോഗിച്ച്) മാത്രം ഷേവ് ചെയ്യാൻ പ്രത്യേകം ശ്രദ്ധിക്കുക.

### Related Links & Sources
- [Original Story Source](https://truevisionnews.com/news/367377/health-tips-to-know-when-shaving-and-trimming)