---
title: "എപ്പോഴും കറുത്ത വസ്ത്രങ്ങൾ ധരിക്കുന്നവരാണോ നിങ്ങൾ? മനഃശാസ്ത്രം പറയുന്ന കാര്യങ്ങൾ ഇതാണ്!"
english_title: "This is what the psychology of those who wear black clothes says"
publisher: "truevisionnews.com"
canonical_url: "https://truevisionnews.com/news/366760/this-is-what-the-psychology-of-those-who-wear-black-clothes-says"
published_at: "2026-06-18T14:57:00+05:30"
category: "Fashion"
language: "ml"
image: "https://cf.zdn.im/img/truevisionnews.com/0/image-uploads/6a33bc2856b52_xcdrgg.jpg"
keywords: ["fashion", "black dress", "bold look", "psychology"]
---

# എപ്പോഴും കറുത്ത വസ്ത്രങ്ങൾ ധരിക്കുന്നവരാണോ നിങ്ങൾ? മനഃശാസ്ത്രം പറയുന്ന കാര്യങ്ങൾ ഇതാണ്!

> **Lead Summary:** ചില ആളുകളുടെ അലമാര തുറന്നാൽ കറുപ്പ് നിറമുള്ള വസ്ത്രങ്ങളുടെ ഒരു വലിയ ശേഖരം തന്നെ കാണാം. ഒരേ നിറത്തിൽ, പലതരം പാറ്റേണുകളിലുള്ള വസ്ത്രങ്ങൾ! മറ്റുള്ളവർ തിളക്കമുള്ള നിറങ്ങളും പുതിയ ട്രെൻഡുകളും പരീക്ഷിക്കുമ്പോൾ ഇവർ കറുപ്പ് മാത്രം തിരഞ്ഞെടുക്കുന്നു. ഇത് വെറും ഒരു ഫാഷൻ താല്പര്യം മാത്രമല്ല, ഇതിന് പിന്നിൽ വ്യക്തമായ ചില മനഃശാസ്ത്രപരമായ കാരണങ്ങളുണ്ടെന്ന് ഗവേഷകർ പറയുന്നു.

## Article Content

ചില ആളുകളുടെ അലമാര തുറന്നാൽ കറുപ്പ് നിറമുള്ള വസ്ത്രങ്ങളുടെ ഒരു വലിയ ശേഖരം തന്നെ കാണാം. ഒരേ നിറത്തിൽ, പലതരം പാറ്റേണുകളിലുള്ള വസ്ത്രങ്ങൾ! മറ്റുള്ളവർ തിളക്കമുള്ള നിറങ്ങളും പുതിയ ട്രെൻഡുകളും പരീക്ഷിക്കുമ്പോൾ ഇവർ കറുപ്പ് മാത്രം തിരഞ്ഞെടുക്കുന്നു. ഇത് വെറും ഒരു ഫാഷൻ താല്പര്യം മാത്രമല്ല, ഇതിന് പിന്നിൽ വ്യക്തമായ ചില മനഃശാസ്ത്രപരമായ കാരണങ്ങളുണ്ടെന്ന് ഗവേഷകർ പറയുന്നു.

മനുഷ്യ സംസ്‌കാരത്തിൽ കറുപ്പ് നിറത്തിന് ഗാംഭീര്യത്തിന്റെയും അധികാരത്തിന്റെയും പ്രൗഢിയുടെയും സവിശേഷ സ്ഥാനമുണ്ട്. ശവസംസ്‌കാര ചടങ്ങുകൾ മുതൽ പ്രമുഖ ആഡംബര ബ്രാൻഡുകളുടെ ഫാഷൻ ഷോകളിൽ വരെ കറുപ്പിനാണ് മുൻഗണന. റോക്ക് സ്റ്റാറുകൾ, കലാകാരന്മാർ, വലിയ ബിസിനസ്സ് പ്രമുഖർ എന്നിവരിലൊക്കെ ഈ നിറത്തോടുള്ള ഇഷ്ടം കാണാം.

മഞ്ഞ: ഉന്മേഷം നൽകുന്നു.  ചുവപ്പ്: ഊർജ്ജത്തെയും വികാരത്തെയും സൂചിപ്പിക്കുന്നു. പിങ്ക്: മൃദുത്വത്തെയും പ്രണയത്തെയും സൂചിപ്പിക്കുന്നു.  കറുപ്പ്: കൂടുതൽ സങ്കീർണ്ണവും നിഗൂഢവുമാണ്.

**കറുപ്പ് ഇഷ്ടപ്പെടുന്നവരെക്കുറിച്ച് മനഃശാസ്ത്രം പറയുന്നത്:**

**1. ആത്മവിശ്വാസത്തിന്റെ നിറം**

വർണ്ണ മനഃശാസ്ത്രത്തെക്കുറിച്ച് (Color Psychology) പഠനം നടത്തിയ ഗവേഷകരായ ആൻഡ്രൂ എലിയറ്റും മാർക്കസ് മേയറും വ്യക്തമാക്കുന്നത്, ആളുകൾ കറുപ്പിനെ അധികാരം, കഴിവ്, ഗൗരവം എന്നിവയുമായി ബന്ധപ്പെടുത്തുന്നു എന്നാണ്. യുകെയിലെ ഒരു പ്രമുഖ ഫാഷൻ റീട്ടെയ്‌ലർ നടത്തിയ സർവേയിൽ ആത്മവിശ്വാസം, ബുദ്ധിശക്തി, ആകർഷണീയത എന്നിവയുമായി ഏറ്റവും കൂടുതൽ ചേർന്നുനിൽക്കുന്ന നിറം കറുപ്പാണെന്ന് കണ്ടെത്തിയിട്ടുണ്ട്.

**2. പെട്ടെന്ന് തീരുമാനമെടുക്കാൻ കഴിയുന്നവർ**

എപ്പോഴും കറുത്ത വസ്ത്രം ധരിക്കുന്നവർ തീരുമാനങ്ങൾ എടുക്കാൻ മടിക്കാത്തവരാണ്. എല്ലാ ദിവസവും എന്ത് വസ്ത്രം ധരിക്കണം എന്ന് ആലോചിച്ച് അവർ സമയം കളയാറില്ല. സ്റ്റീവ് ജോബ്സ്, ബരാക് ഒബാമ തുടങ്ങിയ പ്രമുഖർ ദിവസവും ഒരേ മാതൃകയിലുള്ള വസ്ത്രങ്ങൾ ധരിച്ചിരുന്നത് വസ്ത്രധാരണത്തെക്കുറിച്ച് ചിന്തിച്ച് സമയം കളയാതിരിക്കാനായിരുന്നു.

**3. വൈകാരിക സുരക്ഷിതത്വം **

2012-ൽ പുറത്തുവന്ന ഒരു മനഃശാസ്ത്ര പഠനപ്രകാരം, നമ്മൾ ധരിക്കുന്ന വസ്ത്രങ്ങൾ നമ്മുടെ ചിന്തകളെയും മാനസികാവസ്ഥയെയും സ്വാധീനിക്കും. പലരും കറുത്ത വസ്ത്രങ്ങളെ ഒരു വൈകാരിക സുരക്ഷിതത്വമായി കാണുന്നു. തിളക്കമുള്ള നിറങ്ങളെ അപേക്ഷിച്ച് കറുപ്പ് ആളുകളുടെ ശ്രദ്ധ അനാവശ്യമായി ആകർഷിക്കുന്നില്ല. അതിനാൽ വലിയൊരു ആൾക്കൂട്ടത്തിൽ അധികം ശ്രദ്ധിക്കപ്പെടാതെ ഇഴുകിച്ചേരാൻ ഇത് സഹായിക്കും.

**4. ആകർഷകമായ നിഗൂഢത**

കറുത്ത വസ്ത്രങ്ങൾ ധരിക്കുന്നവരുടെ കൃത്യമായ മാനസികാവസ്ഥ മറ്റുള്ളവർക്ക് പെട്ടെന്ന് പ്രവചിക്കാൻ കഴിയില്ല. ഈ അവ്യക്തത അവരിലേക്ക് ഒരു നിഗൂഢതയും കൗതുകവും ജനിപ്പിക്കുന്നു. ഫാഷൻ ഫോട്ടോഗ്രാഫിയിലും സെലിബ്രിറ്റി സ്റ്റൈലിംഗിലും കറുപ്പ് എന്നും ജനപ്രിയമായി തുടരുന്നതിന്റെ രഹസ്യവും ഇതാണ്.

എപ്പോഴും കറുപ്പ് ധരിക്കുന്നവർ ദുഃഖിതരോ, വിഷാദരോഗികളോ, ഒറ്റപ്പെടാൻ ആഗ്രഹിക്കുന്നവരോ ആണെന്നത് ഒരു വലിയ തെറ്റിദ്ധാരണയാണ്. മനഃശാസ്ത്രം ഈ വാദത്തെ പിന്തുണയ്ക്കുന്നില്ല.

ഗവേഷകരായ സ്റ്റീഫൻ പാമറും കാരെൻ ഷ്ലോസും നടത്തിയ പഠനത്തിൽ, ഒരാൾക്ക് ഒരു നിറത്തോടുള്ള താല്പര്യം അയാളുടെ വ്യക്തിപരമായ അനുഭവങ്ങൾ, സാംസ്‌കാരിക പശ്ചാത്തലം എന്നിവയെ ആശ്രയിച്ചിരിക്കുന്നു എന്ന് കണ്ടെത്തി. അതായത്, ഒരാൾക്ക് കറുപ്പ് നൽകുന്നത് വലിയ ആത്മവിശ്വാസവും ലാളിത്യവുമായിരിക്കാം.

ട്രെൻഡുകൾ മാറിമറിഞ്ഞാലും ഫാഷൻ ലോകത്ത് കറുപ്പിന്റെ സ്ഥാനം എന്നും മാറ്റമില്ലാതെ തുടരുന്നു. കാരണം അത് ശരീരഘടനയോ പ്രായമോ നോക്കാതെ എല്ലാവർക്കും ഒരുപോലെ ഗാംഭീര്യം നൽകുന്ന നിറമാണ്.

### Related Links & Sources
- [Original Story Source](https://truevisionnews.com/news/366760/this-is-what-the-psychology-of-those-who-wear-black-clothes-says)