---
title: "സംസ്ഥാനത്ത് പനിപ്പേടി; കണക്കുകൾ ഭീതിപ്പെടുത്തുന്നു! പനി ബാധിതരുടെ എണ്ണം പത്തുലക്ഷം കടന്നു, ജാഗ്രത ശക്തമാക്കി ആരോഗ്യവകുപ്പ്"
english_title: "Number of fever cases in the state, Health Department tightens vigilance"
publisher: "truevisionnews.com"
canonical_url: "https://truevisionnews.com/news/366264/number-of-fever-cases-in-the-state-health-department-tightens-vigilance"
published_at: "2026-06-16T10:01:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a23effb0a845_fever.jpg"
keywords: ["Latest News", "Thiruvanandapuram", "Fever Sufferers", "Caution"]
---

# സംസ്ഥാനത്ത് പനിപ്പേടി; കണക്കുകൾ ഭീതിപ്പെടുത്തുന്നു! പനി ബാധിതരുടെ എണ്ണം പത്തുലക്ഷം കടന്നു, ജാഗ്രത ശക്തമാക്കി ആരോഗ്യവകുപ്പ്

> **Lead Summary:** **തിരുവനന്തപുരം: [ **സംസ്ഥാനത്ത് പകർച്ചപ്പനികൾ അതിവേഗം പടരുന്നതായി ആരോഗ്യവകുപ്പിന്റെ റിപ്പോർട്ട്. കഴിഞ്ഞ ശനിയാഴ്ച മാത്രം 11,500-ലധികം പേരാണ് പനി ബാധിച്ച് ചികിത്സ തേടിയത്.

## Article Content

**തിരുവനന്തപുരം: [ **സംസ്ഥാനത്ത് പകർച്ചപ്പനികൾ അതിവേഗം പടരുന്നതായി ആരോഗ്യവകുപ്പിന്റെ റിപ്പോർട്ട്. കഴിഞ്ഞ ശനിയാഴ്ച മാത്രം 11,500-ലധികം പേരാണ് പനി ബാധിച്ച് ചികിത്സ തേടിയത്.

ഷിഗെല്ല, ഡെങ്കിപ്പനി, എലിപ്പനി തുടങ്ങിയ രോഗങ്ങൾ വ്യാപകമാകുന്നതും മരണനിരക്ക് വർധിക്കുന്നതും ആരോഗ്യമേഖലയിൽ വലിയ ആശങ്ക സൃഷ്ടിക്കുന്നുണ്ട്.

**പ്രധാന കണക്കുകൾ:**

പകർച്ചപ്പനി: പനി ബാധിതരുടെ എണ്ണം പത്തുലക്ഷം കടന്നു. മലപ്പുറം (2470), കോഴിക്കോട് (1142) എന്നീ ജില്ലകളിലാണ് കൂടുതൽ കേസുകൾ റിപ്പോർട്ട് ചെയ്തിരിക്കുന്നത്. വയനാട്ടിൽ പനി ബാധിച്ച് പത്തുവയസ്സുകാരൻ മരിച്ചത് വലിയ ഞെട്ടലാണ് ഉണ്ടാക്കിയത്.

**ഡെങ്കിപ്പനി:** ഈ മാസം ഇതുവരെ 3366 പേർക്ക് ഡെങ്കിപ്പനി സ്ഥിരീകരിച്ചു. ഇതിനകം മൂന്നുപേർ രോഗം ബാധിച്ച് മരിച്ചു. കഴിഞ്ഞ ദിവസം മാത്രം 85 പേർക്കാണ് രോഗം റിപ്പോർട്ട് ചെയ്തത്. ഏറ്റവും കൂടുതൽ പേർ ചികിത്സയിലുള്ളത് കോഴിക്കോട് ജില്ലയിലാണ്.

**എലിപ്പനി:** ജൂണിൽ ഇതുവരെ 107 പേർക്ക് എലിപ്പനി സ്ഥിരീകരിച്ചു. രോഗം സംശയിക്കുന്ന 82 പേർ നിരീക്ഷണത്തിലുണ്ട്. രോഗബാധയേറ്റ് ഈ മാസം രണ്ടുപേർ മരിച്ചു.

**മറ്റ് രോഗങ്ങൾ: **ചിക്കൻപോക്സ് (1111 കേസുകൾ) ഉൾപ്പെടെ ഷിഗെല്ല, ഇൻഫ്ളുവൻസ, കോളറ, ടൈഫോയ്ഡ്, മുണ്ടിനീര്, വെസ്റ്റ്നൈൽ, അമീബിക് മസ്തിഷ്കജ്വരം തുടങ്ങിയ രോഗങ്ങളും വിവിധ ഇടങ്ങളിലായി റിപ്പോർട്ട് ചെയ്യുന്നുണ്ട്.

മഴക്കാലത്തെ പെട്ടെന്നുള്ള കാലാവസ്ഥാവ്യതിയാനവും ശുചിത്വക്കുറവുമാണ് രോഗവ്യാപനത്തിന് പ്രധാന കാരണമായി ആരോഗ്യവിദഗ്ദ്ധർ ചൂണ്ടിക്കാട്ടുന്നത്. ഇൻഫ്ളുവൻസ ബാധിച്ച് ഒൻപതുപേരും ഈ മാസം ജീവൻ വെടിഞ്ഞിട്ടുണ്ട്.

രോഗലക്ഷണങ്ങൾ കണ്ടാൽ സ്വയം ചികിത്സയ്ക്ക് മുതിരാതെ ഉടൻ തന്നെ സർക്കാർ ആശുപത്രികളെ സമീപിക്കണമെന്നും, പരിസരശുചിത്വം ഉറപ്പുവരുത്തണമെന്നും ആരോഗ്യവകുപ്പ് കർശന നിർദ്ദേശം നൽകി.

### Related Links & Sources
- [Original Story Source](https://truevisionnews.com/news/366264/number-of-fever-cases-in-the-state-health-department-tightens-vigilance)