#Latest News #Yellow Teeth #Health News
(truevisionnews.com) മറ്റുള്ളവരുമായി ഇടപഴകുമ്പോൾ നമ്മുടെ ആത്മവിശ്വാസം ഇരട്ടിയാക്കുന്നത് മനോഹരമായ ഒരു പുഞ്ചിരിയാണ്. എന്നാൽ പലരെയും അലട്ടുന്ന പല്ലുകളിലെ മഞ്ഞനിറം പലപ്പോഴും മറ്റുള്ളവരുടെ മുന്നിൽ വെച്ച് മനസ്സറിഞ്ഞ് ചിരിക്കുന്നതിൽ നിന്നും ആളുകളെ പിന്നോട്ട് വലിപ്പിക്കാറുണ്ട്.
പല്ലുകളുടെ വെൺമ തിരിച്ചുപിടിക്കാൻ വിപണിയിൽ ലഭിക്കുന്ന കെമിക്കലുകൾ അടങ്ങിയ ബ്ലീച്ചിങ് കിറ്റുകളെയോ ചെലവേറിയ ഡെന്റൽ ട്രീറ്റ്മെന്റുകളെയോ ആശ്രയിക്കുന്നതിന് മുൻപ്, നമ്മുടെ അടുക്കളയിലുള്ള ചില പ്രകൃതിദത്ത മാർഗങ്ങളിലൂടെ ഈ പ്രശ്നം ഒരു പരിധി വരെ പരിഹരിക്കാൻ സാധിക്കും.
പല്ലുകൾക്ക് മഞ്ഞനിറം വരുന്നത് എന്തുകൊണ്ട്?
നമ്മുടെ പല്ലുകളുടെ ഏറ്റവും പുറമെയുള്ള വെളുത്ത നിറമുള്ള കട്ടിയേറിയ പാളിയെയാണ് 'ഇനാമൽ' എന്ന് വിളിക്കുന്നത്. ഇതിന് തൊട്ടടിയിലുള്ള 'ഡെന്റിൻ' എന്ന പാളിക്ക് നേരിയ മഞ്ഞനിറമാണുള്ളത്.
പ്രായമാകുന്തോറും ഇനാമലിന്റെ കട്ടി കുറയുന്നത് മൂലമാണ് പല്ലുകൾക്ക് സ്വാഭാവികമായി മഞ്ഞനിറം വരുന്നത്. ഇതിന് പുറമെ ചായ, കാപ്പി, കടുംനിറമുള്ള സോഡകൾ എന്നിവയുടെ അമിത ഉപയോഗം, പുകവലിയിലൂടെ ശരീരത്തിലെത്തുന്ന നിക്കോട്ടിൻ, ടാർ എന്നിവയും പല്ലുകളിൽ കറയുണ്ടാക്കും.
കൃത്യമായി പല്ല് തേക്കാത്തത് മൂലം പല്ലുകളിൽ പ്ലാക്ക് അടിഞ്ഞുകൂടുന്നതും നിറം മാറ്റത്തിന് കാരണമാകാറുണ്ട്.
പല്ലുകളുടെ വെൺമ നിലനിർത്താൻ ചില ലളിതമായ വീട്ടുവൈദ്യങ്ങൾ:
ബേക്കിങ് സോഡയുടെ ഉപയോഗം: പല്ലിന്റെ ഉപരിതലത്തിലുള്ള കറകളെ മൃദുവായി ഉരച്ചുമാറ്റാൻ ബേക്കിങ് സോഡയ്ക്ക് (സോഡിയം ബൈകാർബണേറ്റ്) സാധിക്കും. അൽപം ബേക്കിങ് സോഡയിൽ കുറച്ചു വെള്ളം ചേർത്ത് പേസ്റ്റ് രൂപത്തിലാക്കി ആഴ്ചയിൽ ഒന്നോ രണ്ടോ തവണ പല്ല് തേക്കുന്നത് കറകൾ മാറാൻ സഹായിക്കും.
എന്നാൽ ഇത് അമിതമായി ഉപയോഗിച്ചാൽ പല്ലിന്റെ ഇനാമൽ തേഞ്ഞുപോകാൻ സാധ്യതയുണ്ടെന്ന കാര്യം ഓർക്കുക.
വെളിച്ചെണ്ണ ഉപയോഗിച്ചുള്ള ഓയിൽ പുള്ളിങ്: വായയിലെ ബാക്ടീരിയകളെ നശിപ്പിക്കാനും പഴുപ്പ് കുറയ്ക്കാനും വെളിച്ചെണ്ണയിൽ അടങ്ങിയിരിക്കുന്ന 'ലോറിക് ആസിഡ്' സഹായിക്കും.
രാവിലെ എഴുന്നേറ്റയുടൻ ഒന്നു മുതൽ ഒന്നര ടേബിൾസ്പൂൺ വെളിച്ചെണ്ണ വായിലൊഴിച്ച് 10-15 മിനിറ്റ് നേരം നന്നായി കുലുക്കുഴിഞ്ഞ ശേഷം തുപ്പിക്കളയുന്നത് പല്ലിലെ പ്ലാക്ക് കുറയ്ക്കാനും കൂടുതൽ തിളക്കം നൽകാനും ഉത്തമമാണ്. (എണ്ണ ഒരു കാരണവശാലും അകത്തേക്ക് ഇറക്കരുത്).
പച്ചക്കറികളും പഴങ്ങളും: ആപ്പിൾ, കാരറ്റ്, വെള്ളരിക്ക എന്നിവ ചവച്ചരച്ച് കഴിക്കുന്നത് പല്ലിലെ കറകൾ നീക്കം ചെയ്യാനുള്ള മികച്ചൊരു 'നാച്ചുറൽ സ്ക്രബ്ബർ' ആണ്. ഇവ കൂടുതൽ ചവയ്ക്കുമ്പോൾ വായിൽ ഉമിനീരിന്റെ ഉത്പാദനം വർധിക്കുകയും, ഇത് വായയിലെ ബാക്ടീരിയകളെയും ഭക്ഷണാവിശിഷ്ടങ്ങളെയും കഴുകിക്കളയാൻ സഹായിക്കുകയും ചെയ്യും.
കൃത്യമായ ദന്തശുചിത്വം പാലിക്കുന്നതിനൊപ്പം ഇത്തരം ലളിതമായ പ്രകൃതിദത്ത മാർഗങ്ങൾ കൂടെ ശീലമാക്കിയാൽ പല്ലുകളുടെ ആരോഗ്യവും വെൺമയും ഒരുപോലെ നിലനിർത്താം.
Content Highlight: What can you do to get rid of yellow teeth
#Latest News #Yellow Teeth #Health News
