---
title: "പിണറായി വിജയന്റെ ചെരുപ്പിന്റെ വാറഴിക്കാന്‍ യോഗ്യതയുണ്ടോ? നനഞ്ഞ കോഴി പരാമര്‍ശത്തില്‍ ജി സുധാകരന് മറുപടിയുമായി എച്ച് സലാം"
english_title: "H Salam responds to Pinarayi Vijayan's nananja kozhi remark, G Sudhakaran. G Sudhakaran nananja-kozhi-remark"
publisher: "truevisionnews.com"
canonical_url: "https://truevisionnews.com/news/364614/h-salam-responds-to-pinarayi-vijayans-nananja-kozhi-remark-g-sudhakaran-new-update"
published_at: "2026-06-08T10:14:00+05:30"
category: "Politics"
language: "ml"
image: "https://cf.zdn.im/img/truevisionnews.com/0/image-uploads/6a26491aea1c1_sudhkaran_.jpg"
keywords: ["H Salam", "Pinarayi Vijayan", "Nananja kozhi Remark", "G Sudhakaran"]
---

# പിണറായി വിജയന്റെ ചെരുപ്പിന്റെ വാറഴിക്കാന്‍ യോഗ്യതയുണ്ടോ? നനഞ്ഞ കോഴി പരാമര്‍ശത്തില്‍ ജി സുധാകരന് മറുപടിയുമായി എച്ച് സലാം

> **Lead Summary:** **ആലപ്പുഴ: ** പിണറായി വിജയനെതിരായ നനഞ്ഞ കോഴി പരാമര്‍ശത്തില്‍ ജി സുധാകരന് മറുപടിയുമായി എച്ച് സലാം. പിണറായി വിജയന്റെ ചെരുപ്പിന്റെ വാറഴിക്കാന്‍ യോഗ്യതയുണ്ടോ എന്ന് ചോദിക്കുന്ന എച്ച് സലാം ജി സുധാകരന്‍ രാഷ്ട്രീയ കോമാളിയാണെന്നും പറയുന്നു. ഫേസ്ബുക്ക് പോസ്റ്റിലായിരുന്നു പ്രതികരണം.

## Article Content

**ആലപ്പുഴ: ** പിണറായി വിജയനെതിരായ നനഞ്ഞ കോഴി പരാമര്‍ശത്തില്‍ ജി സുധാകരന് മറുപടിയുമായി എച്ച് സലാം. പിണറായി വിജയന്റെ ചെരുപ്പിന്റെ വാറഴിക്കാന്‍ യോഗ്യതയുണ്ടോ എന്ന് ചോദിക്കുന്ന എച്ച് സലാം ജി സുധാകരന്‍ രാഷ്ട്രീയ കോമാളിയാണെന്നും പറയുന്നു. ഫേസ്ബുക്ക് പോസ്റ്റിലായിരുന്നു പ്രതികരണം.

'താനൊഴികെ നാട്ടില്‍ വേറെയാര്‍ക്കും ഒരു വിവരവും ഇല്ല എന്നാണ് അദ്ദേഹത്തിന്റെ വിചാരം. പാര്‍ട്ടിയെയും നേതാക്കളെയും നിരന്തരം അതിക്ഷേപിക്കുമ്പോഴും ഞങ്ങള്‍ കാണിക്കുന്ന അവധാനത ദൗര്‍ബല്യമാണെന്ന് കരുതരുത്. പിണറായി വിജയന്‍ എന്ന മനുഷ്യന്റെ കാരുണ്യം കൊണ്ടാണ് ജി സുധാകരന്റെ അഴിമതിവിരുദ്ധ മുഖംമൂടി കീറിപോകാതിരുന്നത് എന്ന സത്യം മറന്നു പോകരുത്

2021 ല്‍ ഞാന്‍ മത്സരിച്ച നിയമസഭ തെരഞ്ഞെടുപ്പില്‍ സ്ഥാനാര്‍ത്ഥി അല്ലാതിരുന്ന ജി സുധാകരന്‍ എന്തിന് പണം പിരിച്ചു? അന്ന് താങ്കള്‍ പിരിച്ചെടുത്ത പണത്തിന്റെ കണക്ക് പരസ്യപ്പെടുത്താന്‍ തയ്യാറാകണം. ആരില്‍ നിന്നൊക്കെ എത്ര ലക്ഷങ്ങള്‍ പിരിച്ചുവെന്ന് വെളിപ്പെടുത്താന്‍ ജി സുധാകരന് ധൈര്യമുണ്ടോ?', എച്ച് സലാം ചോദിക്കുന്നു.

'താങ്കള്‍ക്കും വീട്ടില്‍ രണ്ടു മൂന്നു പേര്‍ക്കും അറിയാവുന്ന രഹസ്യങ്ങള്‍ പലതും ഇന്ന് പരസ്യമാണ് എന്ന് മറക്കേണ്ട. താങ്കളുടെ വീട്ടിലെ സ്ത്രീയെയും ഒരുത്തി എന്നാണോ വിളിക്കുന്നത്. എല്‍ഡിഎഫിന്റെ മുന്‍ വനിതാ ചെയര്‍പേഴ്‌സണെ ജി സുധാകരന്‍ അധിക്ഷേപിച്ചത് ഒരുത്തി എന്ന് വിളിച്ചാണ്. മുന്‍പ് ഷാനിമോള്‍ ഉസ്മാനെയും ഉഷാസാലിയെയും സി എസ് സുജാതയെയും സ്ത്രീവിരുദ്ധ പരാമര്‍ശങ്ങള്‍ നടത്തി അധിക്ഷേപിച്ചു.

കൊല്ലത്തുനിന്ന് നിങ്ങളെ ആലപ്പുഴയ്ക്ക് പാര്‍ട്ടി കടത്തിയതിന്റെ കാരണം ഞങ്ങളെ കൊണ്ട് പറയിക്കരുത്. വിവരക്കേട് പറയുമ്പോള്‍ ഒരു പരിധിയൊക്കെ വെക്കുന്നത് നല്ലതാണ്. നാട്ടില്‍ ഒരു കുപ്പികള്ള് വാങ്ങികൊടുത്താല്‍ ആരെയും തെറിവിളിക്കുന്ന ഒരാളെ കാണാന്‍ പറ്റുമായിരുന്നു. ഈ കോമാളിത്തരം കാണുമ്പോള്‍ ജനങ്ങള്‍ക്ക് അതാണ് ഓര്‍മ്മ വരുന്നത്', എച്ച് സലാം കുറിച്ചു.

പിണറായി വിജയന്‍ സഭയില്‍ നനഞ്ഞ കോഴിയെന്നായിരുന്നു കഴിഞ്ഞ ദിവസം ജി സുധാകരന്‍ എംഎല്‍എ പറഞ്ഞത്. വെള്ളത്തില്‍ വീണ നനഞ്ഞ കോഴിയുടെ അവസ്ഥയിലാണ് അദ്ദേഹമെന്നും സുധാകരന്‍ പരിഹസിച്ചു. നിയമസഭയിലെ മറ്റ് സിപിഐഎം നേതാക്കളെയും ജി സുധാകരന്‍ പരിഹസിച്ചിരുന്നു.തന്റെ എംഎല്‍എ ഓഫീസ് ഉദ്ഘാടന വേളയിലായിരുന്നു ജി സുധാകരന്റെ വിമര്‍ശനം.

### Related Links & Sources
- [Original Story Source](https://truevisionnews.com/news/364614/h-salam-responds-to-pinarayi-vijayans-nananja-kozhi-remark-g-sudhakaran-new-update)