---
title: "തകരപ്പറമ്പ് കുട്ടൻ പെട്ടല്ലോ ....! വഴിമുടക്കി കാർ പാർക്ക് ചെയ്തത് ചോദ്യം ചെയ്തു; അച്ഛനും പ്രായപൂർത്തിയാകാത്ത മകനും ക്രൂരമർദ്ദനം, പ്രതി പിടിയിൽ "
english_title: "Car parked in a way that obstructed traffic; Father and son attacked when questioned, suspect arrested"
publisher: "truevisionnews.com"
canonical_url: "https://truevisionnews.com/news/364501/car-parked-in-a-way-that-obstructed-traffic-father-and-son-attacked-when-questioned-suspect-arrested"
published_at: "2026-06-07T15:11:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a253d9b5c64b_AREST.jpg"
keywords: ["Car Parked", "Obstructed", "Traffic", "Father and Son", "Attack", "Suspect"]
---

# തകരപ്പറമ്പ് കുട്ടൻ പെട്ടല്ലോ ....! വഴിമുടക്കി കാർ പാർക്ക് ചെയ്തത് ചോദ്യം ചെയ്തു; അച്ഛനും പ്രായപൂർത്തിയാകാത്ത മകനും ക്രൂരമർദ്ദനം, പ്രതി പിടിയിൽ 

> **Lead Summary:** **തിരുവനന്തപുരം: **വഞ്ചിയൂരിൽ വാഹനം പാർക്ക് ചെയ്യുന്നതിനെച്ചൊല്ലിയുണ്ടായ തർക്കത്തിനിടെ, സ്കൂട്ടറിൽ യാത്ര ചെയ്യുകയായിരുന്ന അച്ഛനെയും പ്രായപൂർത്തിയാകാത്ത മകനെയും ക്രൂരമായി മർദ്ദിച്ച കേസിൽ ഒരാൾ പിടിയിൽ.

## Article Content

**തിരുവനന്തപുരം: **വഞ്ചിയൂരിൽ വാഹനം പാർക്ക് ചെയ്യുന്നതിനെച്ചൊല്ലിയുണ്ടായ തർക്കത്തിനിടെ, സ്കൂട്ടറിൽ യാത്ര ചെയ്യുകയായിരുന്ന അച്ഛനെയും പ്രായപൂർത്തിയാകാത്ത മകനെയും ക്രൂരമായി മർദ്ദിച്ച കേസിൽ ഒരാൾ പിടിയിൽ.

വട്ടിയൂർക്കാവ് വലിയവിള ഇലിപ്പോട് സ്വദേശി തകരപ്പറമ്പ് കുട്ടൻ എന്നറിയപ്പെടുന്ന ശ്യാംകുമാർ (49) ആണ് അറസ്റ്റിലായത്. വെള്ളിയാഴ്ച രാത്രി 8:30 ഓടെയായിരുന്നു സംഭവം.

കൈതമുക്ക് - പുന്നപുരം റോഡിൽ നിന്നും ശ്രീകണ്ഡേശ്വരം ഭാഗത്തേക്ക് പോകുന്ന ഇടറോഡിൽ ഗതാഗത തടസം സൃഷ്ടിക്കുന്ന രീതിയിൽ കാർ പാർക്ക് ചെയ്തിരുന്നു. ഇതുവഴി സ്കൂട്ടറിൽ വന്ന സമീപവാസിയായ പിതാവും മകനും കാർ മാറ്റിയിടാൻ ആവശ്യപ്പെട്ടതാണ് ആക്രമണത്തിന് കാരണമായത്.

ഇതിലുള്ള വൈരാഗ്യം മൂലം ഇയാളും സുഹൃത്തും ചേർന്ന് ഇരുവരെയും തടഞ്ഞുനിർത്തി ക്രൂരമായി കൈയേറ്റം ചെയ്യുകയായിരുന്നു. ആക്രമണത്തിൽ പരിക്കേറ്റ പിതാവും മകനും നിലവിൽ ആശുപത്രിയിൽ ചികിത്സയിലാണ്.

​വഞ്ചിയൂർ സ്റ്റേഷനിലെ റൗഡി ഹിറ്റ് ലിസ്റ്റിൽ ഉൾപ്പെട്ടിട്ടുള്ള വ്യക്തിയാണ് പിടിയിലായ ശ്യാംകുമാർ. ഇയാൾക്കെതിരെ വഞ്ചിയൂർ, പേട്ട സ്റ്റേഷനുകളിലായി എട്ടോളം ആക്രമണക്കേസുകൾ നിലവിലുണ്ടെന്ന് പൊലീസ് അറിയിച്ചു.

സംഭവത്തിൽ ശ്യാംകുമാറിനെ സഹായിച്ച മറ്റൊരു പ്രതിക്കായി പൊലീസ് അന്വേഷണം ഊർജ്ജിതമാക്കിയിട്ടുണ്ട്. അറസ്റ്റിലായ പ്രതിക്കെതിരെ കർശന നിയമ നടപടികൾ സ്വീകരിച്ചു വരികയാണെന്ന് വഞ്ചിയൂർ പൊലീസ് വ്യക്തമാക്കി.

### Related Links & Sources
- [Original Story Source](https://truevisionnews.com/news/364501/car-parked-in-a-way-that-obstructed-traffic-father-and-son-attacked-when-questioned-suspect-arrested)