---
title: "വെറും വയറ്റിൽ നാരങ്ങാവെള്ളം കുടിക്കുന്നത് നല്ലതാണോ? അറിയേണ്ട കാര്യങ്ങൾ"
english_title: "Is it good to drink lemon water on an empty stomach? Things to know"
publisher: "truevisionnews.com"
canonical_url: "https://truevisionnews.com/news/364067/is-it-good-to-drink-lemon-water-on-an-empty-stomach-things-to-know"
published_at: "2026-06-05T16:37:00+05:30"
category: "Health"
language: "ml"
image: "https://cf.zdn.im/img/truevisionnews.com/0/image-uploads/6a22ae98b596d_lemon_water.jpg"
keywords: ["Health", "Lemon Water Benefits", "Morning Routine Health", "Weight Loss Tips", "Healthy Habits"]
---

# വെറും വയറ്റിൽ നാരങ്ങാവെള്ളം കുടിക്കുന്നത് നല്ലതാണോ? അറിയേണ്ട കാര്യങ്ങൾ

> **Lead Summary:** വെറും വയറ്റിൽ നാരങ്ങാവെള്ളം കുടിച്ച് ദിവസം ആരംഭിക്കുന്ന നിരവധി പേരുണ്ട്. ദഹനം വർദ്ധിപ്പിക്കുന്നതിനും, ശരീരത്തിലെ വിഷാംശം നീക്കം ചെയ്യുന്നതിനും, ശരീരഭാരം കുറയ്ക്കുന്നതിനും മൊത്തത്തിലുള്ള ആരോഗ്യം മെച്ചപ്പെടുത്തുന്നതിനുമുള്ള ഒരു മികച്ച പാനീയമായിട്ടാണ് പലരും ഇതിനെ കാണുന്നത്. എന്നാൽ യഥാർത്ഥത്തിൽ ഇത് ശരീരത്തിന് നല്ലതാണോ? വിദഗ്ദ്ധർ പങ്കുവെക്കുന്ന വിവരങ്ങൾ താഴെ നൽകുന്നു.

## Article Content

വെറും വയറ്റിൽ നാരങ്ങാവെള്ളം കുടിച്ച് ദിവസം ആരംഭിക്കുന്ന നിരവധി പേരുണ്ട്. ദഹനം വർദ്ധിപ്പിക്കുന്നതിനും, ശരീരത്തിലെ വിഷാംശം നീക്കം ചെയ്യുന്നതിനും, ശരീരഭാരം കുറയ്ക്കുന്നതിനും മൊത്തത്തിലുള്ള ആരോഗ്യം മെച്ചപ്പെടുത്തുന്നതിനുമുള്ള ഒരു മികച്ച പാനീയമായിട്ടാണ് പലരും ഇതിനെ കാണുന്നത്. എന്നാൽ യഥാർത്ഥത്തിൽ ഇത് ശരീരത്തിന് നല്ലതാണോ? വിദഗ്ദ്ധർ പങ്കുവെക്കുന്ന വിവരങ്ങൾ താഴെ നൽകുന്നു.

**നാരങ്ങാവെള്ളം കുടിക്കുന്നതിന്റെ ഗുണങ്ങൾ**

ശരീരത്തിൽ ജലാംശം നിലനിർത്തുന്നു: രാവിലെ നാരങ്ങാവെള്ളം കുടിക്കുന്നതിന്റെ ഏറ്റവും വലിയ ഗുണം ശരീരത്തിൽ ജലാംശം (Hydration) നിലനിർത്താൻ സഹായിക്കുന്നു എന്നതാണെന്ന് ഫരീദാബാദിലെ യാതാർത്ഥ് സൂപ്പർ സ്പെഷ്യാലിറ്റി ആശുപത്രിയിലെ ഗ്യാസ്ട്രോഎൻട്രോളജി ആൻഡ് ഹെപ്പറ്റോളജി കൺസൾട്ടന്റ് ഡോ. ധ്രുവ് കാന്ത് മിശ്ര പറയുന്നു.

കൂടുതൽ ഊർജ്ജം നൽകുന്നു: നാരങ്ങാവെള്ളം കുടിച്ച് ദിവസം ആരംഭിക്കുന്നത് ദിവസം മുഴുവൻ കൂടുതൽ ഊർജ്ജത്തോടെ ഇരിക്കാൻ സഹായിക്കുമെന്ന് ഗുരുഗ്രാമിലെ മാക്സ് ഹോസ്പിറ്റലിലെ ഇന്റേണൽ മെഡിസിൻ സീനിയർ ഡയറക്ടർ ഡോ. ശൈലേഷ് സഹായ് അഭിപ്രായപ്പെടുന്നു.

ദഹനം സുഗമമാക്കുന്നു: നാരങ്ങയിൽ അടങ്ങിയിരിക്കുന്ന സിട്രിക് ആസിഡ് ദഹനരസങ്ങളുടെ ഉത്പാദനത്തെ ഉത്തേജിപ്പിക്കുകയും പകൽ സമയത്ത് ദഹനപ്രക്രിയ കൂടുതൽ കാര്യക്ഷമമാക്കാൻ സഹായിക്കുകയും ചെയ്യും.

വയറിന്റെ അസ്വസ്ഥതകൾ കുറയ്ക്കുന്നു: മലവിസർജ്ജനം സാധാരണമാക്കാനും ദഹനം മന്ദഗതിയിലാകുന്നത് മൂലമുണ്ടാകുന്ന വയറുവേദനയോ അസ്വസ്ഥതയോ ലഘൂകരിക്കാനും ചെറുചൂടുള്ള നാരങ്ങാവെള്ളം കുടിക്കുന്നത് നല്ലതാണെന്ന് പഠനങ്ങൾ വ്യക്തമാക്കുന്നു.

ചർമ്മ സംരക്ഷണം: രോഗപ്രതിരോധ ശേഷി വർദ്ധിപ്പിക്കുന്ന വിറ്റാമിൻ സി, ആന്റിഓക്‌സിഡന്റുകൾ എന്നിവ നാരങ്ങയിൽ ധാരാളമുണ്ട്. ഈ ആന്റിഓക്‌സിഡന്റുകൾ ചർമ്മകോശങ്ങളെ കേടുപാടുകളിൽ നിന്ന് സംരക്ഷിക്കുകയും ആരോഗ്യമുള്ള ചർമ്മം നിലനിർത്താൻ സഹായിക്കുകയും ചെയ്യും.

ശരീരഭാരം നിയന്ത്രിക്കാൻ: ഇത് നേരിട്ട് കൊഴുപ്പ് കുറയ്ക്കുന്നില്ലെങ്കിലും, പഞ്ചസാര അടങ്ങിയ സോഡകൾക്കും ഉയർന്ന കലോറിയുള്ള പാനീയങ്ങൾക്കും പകരമായി നാരങ്ങാവെള്ളം ഉപയോഗിക്കുന്നത് ശരീരഭാരം നിയന്ത്രിക്കാൻ സഹായിക്കും.

**പ്രചരിക്കുന്ന ചില തെറ്റിദ്ധാരണകൾ**

നാരങ്ങാവെള്ളത്തെ ചുറ്റിപ്പറ്റിയുള്ള ഏറ്റവും വലിയ അവകാശവാദങ്ങളിലൊന്ന് അത് ശരീരത്തിലെ വിഷാംശം (Detoxification) പൂർണ്ണമായി നീക്കം ചെയ്യുമെന്നതാണ്. എന്നാൽ ഇത് വെറുമൊരു തെറ്റിദ്ധാരണ മാത്രമാണെന്ന് ഡോക്ടർമാർ പറയുന്നു. നാരങ്ങാവെള്ളം ശരീരത്തിൽ നിന്ന് വിഷവസ്തുക്കളെ പുറന്തള്ളുന്നു എന്നതിന് കൃത്യമായ ശാസ്ത്രീയ തെളിവുകളൊന്നുമില്ല.

**ആരെല്ലാം ശ്രദ്ധിക്കണം?**

ആസിഡ് റിഫ്ലക്സ്, ജി.ഇ.ആർ.ഡി (GERD), ഗ്യാസ്ട്രൈറ്റിസ്, പെപ്റ്റിക് അൾസർ, അല്ലെങ്കിൽ സെൻസിറ്റീവ് വയറുള്ളവർ എന്നിവർക്ക് നാരങ്ങയിലെ അസിഡിറ്റി ദഹനപ്രശ്നങ്ങൾ ഉണ്ടാക്കാം. ചിലരിൽ ഇത് നെഞ്ചെരിച്ചിൽ കൂടാനും കാരണമായേക്കാം. അതിനാൽ, ഇത്തരം അസുഖങ്ങളുള്ളവർ നാരങ്ങാവെള്ളം ദിവസേനയുള്ള ശീലമാക്കുന്നതിന് മുൻപ് ഒരു ഡോക്ടറുടെ ഉപദേശം തേടുന്നത് നന്നായിരിക്കും.

### Related Links & Sources
- [Original Story Source](https://truevisionnews.com/news/364067/is-it-good-to-drink-lemon-water-on-an-empty-stomach-things-to-know)