---
title: "ഇവിടെ പെട്രോൾ മാത്രമല്ല കുഴൽപ്പണവും ഒഴുകുന്നുണ്ട്! പെട്രോൾ പമ്പുകൾ വഴി പുതിയ രീതിയിലുള്ള കുഴൽപ്പണ ഇടപാട്; കരിപ്പൂർ സ്വദേശികളായ രണ്ട് യുവാക്കൾ അറസ്റ്റിൽ"
english_title: "Youths arrested for conducting new type of money laundering through petrol pumps"
publisher: "truevisionnews.com"
canonical_url: "https://truevisionnews.com/news/364010/youths-arrested-for-conducting-new-type-of-money-laundering-through-petrol-pumps"
published_at: "2026-06-05T13:58:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a22894d33016_truuu.jpg"
keywords: ["Latest News", "Petrol Pump", "Kozhikode", "Arrest"]
---

# ഇവിടെ പെട്രോൾ മാത്രമല്ല കുഴൽപ്പണവും ഒഴുകുന്നുണ്ട്! പെട്രോൾ പമ്പുകൾ വഴി പുതിയ രീതിയിലുള്ള കുഴൽപ്പണ ഇടപാട്; കരിപ്പൂർ സ്വദേശികളായ രണ്ട് യുവാക്കൾ അറസ്റ്റിൽ

> **Lead Summary:** **കോഴിക്കോട്: [ **പെട്രോൾ പമ്പുകളെ കേന്ദ്രീകരിച്ച് ഡിജിറ്റൽ യുപിഐ ഇടപാടുകളിലൂടെ ലക്ഷങ്ങളുടെ കുഴൽപ്പണ-സൈബർ തട്ടിപ്പ് നടത്താൻ ശ്രമിച്ച സംഭവത്തിൽ രണ്ട് പേരെ മലപ്പുറം പൊലീസ് അറസ്റ്റ് ചെയ്തു.

## Article Content

**കോഴിക്കോട്: [ **പെട്രോൾ പമ്പുകളെ കേന്ദ്രീകരിച്ച് ഡിജിറ്റൽ യുപിഐ ഇടപാടുകളിലൂടെ ലക്ഷങ്ങളുടെ കുഴൽപ്പണ-സൈബർ തട്ടിപ്പ് നടത്താൻ ശ്രമിച്ച സംഭവത്തിൽ രണ്ട് പേരെ മലപ്പുറം പൊലീസ് അറസ്റ്റ് ചെയ്തു.

കരിപ്പൂർ സ്വദേശികളായ രണ്ട് യുവാക്കളാണ് പിടിയിലായത്. ഓൺലൈൻ തട്ടിപ്പ് സംഘങ്ങളുടെ ഇടനിലക്കാരായി പ്രവർത്തിച്ചവരാണ് ഇവരെന്നാണ് പൊലീസിന്റെ പ്രാഥമിക നിഗമനം. സൈബർ ക്രൈമിന്റെ പരിധിയിൽ വരുന്ന കേസ് ആയതിനാൽ സിറ്റി സൈബർ പൊലീസും മലപ്പുറം പൊലീസും സംയുക്തമായാണ് നിലവിൽ അന്വേഷണം നടത്തുന്നത്.

തട്ടിപ്പിൽ ഉൾപ്പെട്ട മറ്റ് പ്രതികളെയും പമ്പുകളുടെ അക്കൗണ്ടുകളിലേക്ക് പണം അയച്ച ഉത്തരേന്ത്യൻ സംഘങ്ങളെയും കണ്ടെത്താനായി കൂടുതൽ കേസുകൾ രജിസ്റ്റർ ചെയ്ത് അന്വേഷണം വ്യാപിപ്പിച്ചിട്ടുണ്ട്.

അതീവ വിചിത്രവും ബുദ്ധിപരവുമായ രീതിയിലാണ് സംഘം പെട്രോൾ പമ്പുകളെ തട്ടിപ്പിനായി ഉപയോഗിച്ചിരുന്നത്. പമ്പുകളിലെത്തി ചെറിയ തുകയ്ക്ക് (ഉദാഹരണത്തിന് 500 രൂപയ്ക്ക്) ഇവർ ഇന്ധനം നിറയ്ക്കും.

തുടർന്ന് പണം ഡിജിറ്റലായി അടയ്ക്കാനെന്ന വ്യാജേന പമ്പിലെ യുപിഐ ക്യുആർ കോഡിന്റെ (QR Code) ചിത്രം മൊബൈലിൽ പകർത്തും. ഈ ചിത്രം ഉടൻ തന്നെ രാജസ്ഥാൻ, മധ്യപ്രദേശ് തുടങ്ങിയ സംസ്ഥാനങ്ങളിലുള്ള തങ്ങളുടെ പ്രധാന കൂട്ടാളികൾക്ക് അയച്ചുകൊടുക്കുകയാണ് അടുത്ത പടി.

അവിടെയുള്ള തട്ടിപ്പ് സംഘങ്ങൾ ഈ ക്യുആർ കോഡ് വഴി പമ്പിന്റെ ബാങ്ക് അക്കൗണ്ടിലേക്ക് 40,000 അല്ലെങ്കിൽ 50,000 രൂപ പോലുള്ള വലിയ തുകകൾ ഒരുമിച്ച് ട്രാൻസ്ഫർ ചെയ്യും. പണം അക്കൗണ്ടിൽ വന്നതിന് പിന്നാലെ, തങ്ങൾക്ക് അബദ്ധത്തിൽ പൂജ്യം കൂടിപ്പോയതാണെന്നും അല്ലെങ്കിൽ തെറ്റായ തുക അയച്ചുപോയതാണെന്നും പമ്പുടമകളെ വിശ്വസിപ്പിക്കും.

തുടർന്ന് പെട്രോൾ അടിച്ച തുക മാത്രം കഴിച്ച് ബാക്കി തുക മുഴുവൻ പമ്പിൽ നിന്ന് നേരിട്ട് പണമായി (Cash) വാങ്ങി സംഘം സ്ഥലം വിടുകയായിരുന്നു.

സംശയാസ്പദമായ ഇത്തരം വൻകിട ഡിജിറ്റൽ ഇടപാടുകൾ നടന്നതോടെ പല പെട്രോൾ പമ്പുകളുടെയും ബാങ്ക് അക്കൗണ്ടുകൾ ബാങ്കുകൾ കൂട്ടത്തോടെ ഫ്രീസ് (Freeze) ചെയ്യാൻ തുടങ്ങി. ഇതോടെയാണ് തട്ടിപ്പിന്റെ വ്യാപ്തി പുറത്തുവരുന്നത്. മലപ്പുറം ജില്ലയിൽ മാത്രം പത്തിലധികം പമ്പുകൾക്ക് ഇത്തരത്തിൽ അക്കൗണ്ട് നഷ്ടമാവുകയോ തട്ടിപ്പിനിരയാവുകയോ ചെയ്തപ്പോഴാണ് പമ്പുടമകൾ പരസ്പരം കാര്യങ്ങൾ പങ്കുവെക്കുന്നതും പോലീസിൽ പരാതി നൽകുന്നതും. മുമ്പ് വിദ്യാർത്ഥികളുടെയും മറ്റും ബാങ്ക് അക്കൗണ്ടുകൾ ചെറിയ കമ്മീഷൻ നൽകി വാങ്ങി ഇത്തരത്തിൽ കള്ളപ്പണം വെളുപ്പിക്കാൻ ഉപയോഗിച്ചിരുന്ന സംഘങ്ങൾ, ആ മേഖലയിൽ പോലീസ് നിരീക്ഷണം ശക്തമാക്കിയതോടെയാണ് സുരക്ഷിത താവളമെന്ന നിലയിൽ പെട്രോൾ പമ്പുകളെ ലക്ഷ്യമിടാൻ തുടങ്ങിയത്. പമ്പുകളിലെ സിസിടിവി ദൃശ്യങ്ങളിൽ നിന്നും ലഭിച്ച സൂചനകളുടെ അടിസ്ഥാനത്തിലാണ് കരിപ്പൂർ സ്വദേശികളെ പൊലീസ് പൊക്കിയത്. സംഭവത്തിൽ കൂടുതൽ പേർ ഉടൻ കസ്റ്റഡിയിലാകുമെന്നാണ് സൂചന.

### Related Links & Sources
- [Original Story Source](https://truevisionnews.com/news/364010/youths-arrested-for-conducting-new-type-of-money-laundering-through-petrol-pumps)