---
title: "'സ്ത്രീകൾക്കുള്ള സൗജന്യ യാത്ര മലബാറിനും വേണം'; വടക്കൻ ജില്ലകളിൽ കൂടുതൽ കെഎസ്ആർടിസി ഡിപ്പോകൾ ആവശ്യപ്പെട്ട് വി.ടി ബൽറാം"
english_title: "KSRTC, free travel for women, VT Balram"
publisher: "truevisionnews.com"
canonical_url: "https://truevisionnews.com/news/363738/ksrtc-free-travel-for-women-vt-balram"
published_at: "2026-06-04T11:53:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a211bde67bc8_bt.jpg"
keywords: []
---

# 'സ്ത്രീകൾക്കുള്ള സൗജന്യ യാത്ര മലബാറിനും വേണം'; വടക്കൻ ജില്ലകളിൽ കൂടുതൽ കെഎസ്ആർടിസി ഡിപ്പോകൾ ആവശ്യപ്പെട്ട് വി.ടി ബൽറാം

> **Lead Summary:** **തിരുവനന്തപുരം: ** കെഎസ്ആർടിസിയിൽ സ്ത്രീകൾക്കായി സർക്കാർ നടപ്പിലാക്കിയ സൗജന്യ യാത്രാ പദ്ധതിയുടെ ആനുകൂല്യങ്ങൾ മലബാർ മേഖലയ്ക്ക് പൂർണ്ണമായി ലഭിക്കുന്നില്ലെന്ന് നിയമസഭയിൽ വി.ടി. ബൽറാം എംഎൽഎ.

## Article Content

**തിരുവനന്തപുരം: ** കെഎസ്ആർടിസിയിൽ സ്ത്രീകൾക്കായി സർക്കാർ നടപ്പിലാക്കിയ സൗജന്യ യാത്രാ പദ്ധതിയുടെ ആനുകൂല്യങ്ങൾ മലബാർ മേഖലയ്ക്ക് പൂർണ്ണമായി ലഭിക്കുന്നില്ലെന്ന് നിയമസഭയിൽ വി.ടി. ബൽറാം എംഎൽഎ.

പദ്ധതിയുടെ ഗുണം സംസ്ഥാനത്തെ മുഴുവൻ ജനങ്ങളിലേക്കും ഒരുപോലെ എത്തിക്കാൻ വടക്കൻ ജില്ലകളിൽ കൂടുതൽ കെഎസ്ആർടിസി ഡിപ്പോകൾ അടിയന്തരമായി ആരംഭിക്കണമെന്ന് അദ്ദേഹം ആവശ്യപ്പെട്ടു.

നിയമസഭയിൽ ഉന്നയിച്ച ശ്രദ്ധ ക്ഷണിക്കൽ പ്രമേയത്തിലൂടെയാണ് അദ്ദേഹം ഈ ആവശ്യം മുന്നോട്ടുവെച്ചത്. നിലവിൽ മലബാർ മേഖലയിൽ കെഎസ്ആർടിസി സൗകര്യങ്ങൾ വളരെ പരിമിതമാണെന്നും ഇത് യാത്രാ ആനുകൂല്യങ്ങൾ ലഭ്യമാക്കുന്നതിൽ വലിയ അസന്തുലിതാവസ്ഥ സൃഷ്ടിക്കുന്നുണ്ടെന്നും അദ്ദേഹം ചൂണ്ടിക്കാട്ടി.

പാലക്കാട് മുതൽ കാസർകോട് വരെയുള്ള വടക്കൻ ജില്ലകളിൽ നിലവിൽ നാമമാത്രമായ എണ്ണം കെഎസ്ആർടിസി ഡിപ്പോകൾ മാത്രമാണ് പ്രവർത്തിക്കുന്നത്. ഇത് മൂലം സർക്കാരിന്റെ സൗജന്യ യാത്രാ പദ്ധതിയുടെ ആനുകൂല്യം ഭൂരിഭാഗം വരുന്ന മലബാറിലെ സ്ത്രീകൾക്കും ലഭിക്കാത്ത സാഹചര്യമാണുള്ളത്.

ഈ മേഖലയിലെ യാത്രാ ക്ലേശത്തിന് പരിഹാരം കാണാനും പ്രാദേശികമായുള്ള അസന്തുലിതാവസ്ഥ മാറ്റാനും സർക്കാരിന്റെ പ്രത്യേക ശ്രദ്ധ വടക്കൻ ജില്ലകളിൽ ഉണ്ടാകണമെന്നും കൂടുതൽ ഡിപ്പോകൾ അനുവദിക്കാൻ തയ്യാറാകണമെന്നും വി.ടി ബൽറാം ആവശ്യപ്പെട്ടു.

വി.ടി ബൽറാം ഉന്നയിച്ച ശ്രദ്ധ ക്ഷണിക്കൽ പ്രമേയം അതീവ ഗൗരവമുള്ളതാണെന്ന് ഗതാഗത മന്ത്രി സി.പി ജോൺ മറുപടി നൽകി. വടക്കൻ ജില്ലകളിൽ കെഎസ്ആർടിസി സർവീസുകൾ താരതമ്യേന വളരെ കുറവാണെന്ന വസ്തുത മന്ത്രി സഭയിൽ സമ്മതിച്ചു.

### Related Links & Sources
- [Original Story Source](https://truevisionnews.com/news/363738/ksrtc-free-travel-for-women-vt-balram)